[خالدخليفة]

من اغرب المفارقات سواق قطار قصير جدا وراجل كبير بس جريمة فى السرعة زى حالاتى بس حظه زفت كل ميركب قطر الاقصر الجرار يبوظ فى بنها
(ده قطار سريع بيقوم من الاقصر 10 صباحا يوصل القاهرة 6:30 اخر النهار ويقوم 7:15 االى الاسكندرية ويوصلها 10 بالليل وبيتغير عليه 3 سواقين من الاقصر الى اسيوط ثم من اسيوط الى القاهرة ثم من القاهرة الى الاسكندرية)
المهم صاحبنا ده كل م ييجى دوره على القطار ده يعطل فى بنها يعنى القطار ماشى من الاقصر لبنها 10 ساعات متواصلة بدون تأخير لدرجة انى بقيت اشوفه على رصيف المحطة اسلم عليه ازيك ياعم احمد يقول اهلا ياباشا اقول له عندك ايه النهاردة يقول 157 (رقم ا لقطار ) اقول فى سرى اااااه ه ه ه عطلنا ف بنها والحمد لله وفعلا نوصل بنها فى الميعاد وييجى يقوم من بنها الجرار يزرجن ويتأخر زى كل مرة ساعة الا ربع والغريبة انه فى كل مرة بعد ساعة الا ربع الجرار يشتغل عادى لحد اسكندرية المهم أخر مرة قابلته جينا ف بنها روحت له وانا بضحك فبص لى وقال بغيظ انا مش هركب القطار ده تانى والعجيب ان كان له رئيسه غالبا بيكرهه لانه المفروض لما يحصل تأخير بسبب عطل يبلغ القاهرة علشان ميوصلش متأخر ويلغو الحوافز وكنت اسمعه بيكلم القاهرة فى اللاسلكى ويقول لرئيسه ازاى ياريس اوصل فى المعاد واسمع رئيسه لان اللاسلكى عالى بيقول له مليش دعوةة تتصرف وتوصل بالقطار فى المعاد وكنت استعجب الراجل ده مجنون والا ايه ؟ طب والارواح اللى فى القطار طب مهو السواق هيضطر يجرى وقد كان اخدها من بنها لطنطا فى 16 دقيقة وهيا مفروض نص ساعة ومن طنطا لدمنهور نص ساعة وهيا مفروض 45 دقيقة ومن دمنهور لسيدى جابرتلت ساعة وهيا مفروض 35 دقيقة المهم قابلته فى اسكندرية وانا بضحك وبقول له حمد الله على السلامة وبغمز له بعينى قال هتنطق بأى كلمه هقدم استقالتى فقلت له و على ايه ياعم العيال تصرف منين لما تقدم استقالتك وضحكنا ومشيت
اللى جاية دى مصيبة (الله ينتقم من منصور وزير النقل السابق )
مرة رايح اركب من اسكندرية ووصلت متاخر وبسال على القطار اتااريهم غيرو الرصيف بتاعه وجريت المهم شاورت للسواق من بعيد علشان يستنى المهم لقيته حاطط ايده على دماغه ووشه باين عليه مصيبة بقول له مالك فى ايه قال مفيش الحق ارجع علشان تركب لان وقتنا جه خلاص المهم ركبت ووصلنا مصر فروحت له بقول له ايه العيال فيهم حاجة قال لا لكن الجرار اللى كنا طالعين بيه مكانش بيمسك فرامل واجبرونى اطلع بالقطار وكنت شغال على حاجة اسمها (قال اسم غريب مش فاكره ) (تقريبا رجل الميت) المهم هيا زى فرامل اليد فى العربية يعنى تخيل عربية ماشية بسرعة 120 على فرامل اليد
اخيرا نختمها بحكاية طريفة
مرة روحت اركب من اسكندرية فقالو مفيش حجز لحد بكرة وكنا 9 بالليل فقلت اركب العادى بيقوم 10 الا ربع وسريع جدا وكنا فى الشتا والجو تلج واركب القطار الاقى مفيش شبابيك والعربية اللى بعدها شرحه لفيت القطار كله ولا عربيه فيها شبابيك والقطار سريع
المهم تتصرف كيف ياعبد الرحيم تتصرف كيف ياعبد الرحيم
روحت رايح مشترى جرنان وقلعت الجاكيت ولفيت الجرنان حوالين جسمى وكان الاهرام جرنان دسم ولبست الجاكيت تانى والناس بتتفرج عليا واشتريت شنطة بلاستيك شفافة ولبستها على راسى وقعدت وفوجئت كل الناس عملت زيى كان المنظر تحفة
دخل الكمسارى ولقان كلنا كده فقال بسم الله الرحمن الرحيم هو انا دخلت بيت الاشباح والا ايه شوية وسقع فجالى قلت له عامل حسابك وطلعت شنطة من جيبى واديته ورقتين من الجرنان فقال هات صفحة الرياضة فرد واحد من الركاب يعنى انت هتقراها وضحكنا واحنا نازلين مصر كان المنظر تحفة لان فى ناس سابت الاكياس على راسها هههههههههههه