رد: استطلاع هام جدا ( أدخل بسرعة )
بلد المصنع
الامان
الرفاهيه
اقتصادية التشغيل
اسعار قطع الغيار
سعر اعادة البيع
واسمحولى انى اقولكم انا ليه رتبتها كده
اولا : بلد المصنع .. فبلد المصنع عليه عامل كبير فى العربية اللى خارجه منه ولو بلد المصنع غير موثوق فيه عمر عنصر الامان ما هيتوفر وكمان هيتاثر عنصر سعر اعادة البيع وعنصر قطع الغيار لان بلد المصنع لو اى كلام ممكن المصنع ينهى تصنيعه او الوكيل يبطل الاستيراد وبالتالى سعر اعادة البيع هيبقى فى النازل وسعر قطع الغيار هيبقى مولع لندرة قطع الغيار
ثانيا : الامان .. ودى اهم حاجه فى العربية .. يا فرحتى ب سى دى تشنجر و شاشه ال سى دى وتكييف ثلاجه فى عربية مافيهاش امان وممكن لا قدر الله اى خبطه العربية هتعتدمر ولا اى سرعه زياده شويه هلاقى نفسى فى تعداد الاموات
ثالثا : اقتصادية التشغيل .. لان طبيعى ان العربية اول ما هتشتريها مش هتصرف عليها غير البنزين والزيت والكلام دا فطبيعى دى اول حاجه هتحتك بيها وعمرها بعد ما هتشتريها حتى بسنه هتقولك عايزه حاجات فى العفشه او فى الكهربا وغيره
رابعا : اسعار قطع الغيار .. ودا طبعا بعد ما العربيه تقعد معاك فتره حلوه تبتدى بقى تفتح بقها وتاكد لو انت مظبطها اول باول ومهتم بيها عمرها ما هتفتح بقها فى كتير .. دا غير ان كل ما نوع العربيه قدم فى السوق كل ما قطع الغيار بتاعتها رخصت
خامسا واخيرا: سعر اعادة البيع . انا عارف طبعا ان فيه عناصر كتير بتحدد سعر اعادة البيع زى سوق العربية فى مصر وتوافرها وسنة الصنع والوكيل ومدى قوته فى السوق بس كمان من ضمن الحاجات دى هو حالة العربية عند اعادة البيع وصدقونى لو حافظت على عربيتك هتاخد وش القفص
دا مجرد راى ولو حد عندة راى مخالف ياريت يفيدنا
|