[المناور]

بيتهيألى العربية النقل دى بتاعة البلدية أنا دايما بشوفهم بيبقوا ماشيين بعربية بوكس فيها العساكر ووراهم نص نقل أو نقل علشان يلموا فيها البياعين ببضاعتهم .

حصل عندنا فى وسط البلد من بتاع سنتين كده ان البلدية كانت كل شوية تعمل غارة وكان البياعين زى الرز فى وسط البلد وحاطين عيل ناضورجى على أول الشارع أول ما يشوفهم ينبه الباقيين يقوموا يستخبوا وتلاقى كبير البياعين يلم من كل بياع حاجة من البضاعة يعنى كام شراب على كام حاجة كده ويروح يسلم على الظابط ويدهاله وبعد ما يمشوا يطلعوا تانى واللى كان يتمسك يروح القسم معاهم وتلاقيه تانى يوم راجع .

وفى مرة قفشت البلدية عيل وحطوه فى العربية النقل وابتدى البياعين يتلموا حولين العربية كانهم بيراضوا الظابط ومرة وحدة ماتعرفش ايه اللى حصل الواد نط من النقل والعيال التانية زقت العساكر والظابط وفى ثوانى كلهم فص ملح وداب مفيش إلا هو واحد بس اتمسك وعدموه العافية من غيظهم وجت كام عربية بوليس علشان تستقر الأمور ومن بعدها بقت البلدية بايتة فى المنطقة دى واختفى البياعين خالص من المنطقة