[mr/medo]

حضرتك بالنسبه لموضوع انهم خبطوا عليك الفجر اكيد دول تنفيذ الاحكام وغلطانين فى العنوان ولا حاجه ،وبالنسبه انه من حقه فهو من حقه لانه معاه احكام عايزه تتنفذ وناس لازم تتحبس وفى الغالب الحمله بتبقى بالليل لان دا هو الوقت المضمون ان الناس تكون فى بيوتها ، وللامانه انا اعرف ناس بتنزل الحمله العصر وبعربيه ملكى وبيخدوا الناس بهدوء وبدون قله ادب ولا اى تجاوز بس دول طبعا الظباط المحترمين اللى عندهم اخلاق وللاسف دول قليلين جدا ويعتبروا عمله نادره .
اما بالنسبه لتفتيش العربيه او حتى تفتيش الشخص بالنسبه للقانون العادى - قانون الاجراءات الجنائيه - دا ممنوع ومش من حقه يفتش حد الا باذن نيابه او فى حاله التلبس ، لكن طبعا ومع قانون الطوارىء اللى بيمنحهم صلاحيات ملهاش حدود بيعملوا اى حاجه فى اى حد واللى مش عاجبه يشرب من البحر ولما تروح المحكمه ابقى قول اللى انت عايزه .
وعلشان كدا كل القضايا اللى بيلفقوها للناس نتيجة التفتيش على الطريق بتاخد براءة لان الاجراءات بتكون باطله . لدرجه ان فى مره كان عندى قضيه واحد متلفقله قضيه مخدرات وهو معملش اى حاجه هما اساسا وخدينه من الشارع فيوم الجلسه بعد ما ثبت حضورى ولسه هتكلم القاضى قالى مش مستهله كلام يا استاذ براءة .بس عرفت بعد كدا هو ليه عمل كدا لانه طلع كان ظابط شرطه واتعين فى النيابه فا عارف النظام .

وبالنسبه لدفع الفلوس فدا مش عند الشرطه بس يا باشا دا كل المصالح والوزارات الحكوميه . ببساطه الرشوه بقيت اقتصاد موازى للاقتصاد الشرعى للاسف بقيت نظام فى البلد وللاسف كمان النظام دا مش هيختفى الا اذا نسفت النظام الاساسى وعملت نظام جديد مبنى على نظافه .