[mesho70]

من الاسعار اللى حضرتك ذكرتها يبقى انت بتكلم عن الكلاسيك الخليج ودى اول فئة
والاوبشن اللى فيها 1600 اتوماتيك 2010 ( تكييف – باور – 4زجاج كهرباء
الفتيس ستريبترونك اى اتوماتيك ومانيوال – العدادات الجديدة – الطارة
شبة الشارك – كاوتش 195/60/15R H88 - سنتر بمفتاحين ريموت)
ومن خلال تجربتى وبحثى طوال الفترة الماضية وكانت النتيجة :-
1 – الخليجى الاماراتى ( دبى ) وهى بضمان مباشر على الرواس ويقترب سعرها
من سعر الوكيل كثيرا ً بسبب الضمان وهى معى بالفعل من شهر 11 الماضى وكانت بـ 115 الف وتم تركيب سى دى كينود بالمعرض ودة اللينك بتاع الموضوع
http://www.masrmotors.com/vb/showthread.php?t=15592

2 – الخليجى كويتى ودى ناس كتيير بتشكر فيها وبيقولوا انها افضل الخليجى
وان كنت انا فضلت الضمان خصوصا ً انة لما اشتريت عربيتى مكنش لسة نزل
منها موديل 2010 واكيد دلوقتى موجود وممكن تلاقى الهاف منها اى يذيد فى
الاوبشن ( كاسيت او سى دى – اسبويلر خلفى – ABS - فوج لايت – جنوط اسبور ) وممكن تلاقيها بسعر الكلاسيك الاماراتى او قريبة منة لكن الضمان !!

3 – الخليجى السعودى هى وسط وان كان دايما ً تلاقى فيها سى دى كينود
اعتقد ممكن تلاقى منها 2009 لانها كانت كتير وانا بدور

4 – الخليجى الاردنى وبعض الناس حتى مندوبى المبيعات تلاقية يقولك " ابعد
عن الاردنى " مع انى شايف انها عربية ممتازة وسعرها اقل من كل مثيلاتها من
نفس الفئة وانا جنبى 3 من جيرانى معاهم الاردنى والعربية زى الفل

الخلاصة :-
* طالما حضرتك بدور على الخليجى ويهمك الضمان وانا وجة نظرى
انة مهم جدا ً يبقى تركز بحثك عن الاماراتى وهتلاقى عناوينهم وتليفوناتهم فى
الموضوع بتاعى السابق
* اما ان كان موضوع الضمان ميفرقش معاك يبقى الكويتى افضلهم وممكن تجيب الهاف بنفس سعر كلاسيك الوكيل
* ثم السعودى ثم الاردنى بنفس الترتيب مع ملاحظة ان جميع تلك العربيات يابانى
وموضوع اختلاف البلاد دى مجرد مواصفات واوبشن يطلبة وكيل تلك السيارات ليس الا من الشركة الام فاليابان
موديل 2009 بالنسبة للكويتى اسأل عند سمير ريان وان ملقتهاش وفر مجهودك وبحثك يبقى مش هتلاقيها
اما السعودى 2009 ممكن تدور اكتر عليها ممكن تلاقيها
ياريت مكنش توهتك معايا واى استفسار انا فالخدمة
وبالتوفيق ان شاء الله