[krim71]

والله انا اتخنقت من شكل ام اللانوس ده اللي موجود من التسعينات زائد كمان انها مش عربية حلوة اساساً و ماتورها تعبان و بيعد يكركر..
انا مش مجرب العربيات دي (الا اللانوس طبعاً) بس من القراءة و البحث انا شايف ان احسن عربية في السعر ده هي البروتون ساجا عربية شكلها انيق (متكلف يعني) و اوبشاناتها حلوة و سعرها هايل الصراحة و شركة بروتون محترمة فوق ما تتصور بس بقى الله يعينك من التوكيل و مراكز الخدمة و قطع الغيار مش رخيصة و مش منتشرة (يعني لو حبيت تجيب تيواني ولا حاجة مش سهل تجيبه مش زي اللانوس) و سعر اعادة البيع لو بتحب تغير العربية كتير سعر اعادة البيع هتفرق معاك اما عن نفسي انا.. انا بيجيب عربية تعد معايا 5 سنين ولا 6 او اكتر طبعاً فسعر اعادة البيع مش هيفرق معايا و قطع الغيار عمري ما بجيب قطع غيار من برا التوكيل علشان العربية متتنيلش و اسعار قطع غيار التوكيلات كلها قريبة من بعض
ناقص بس التجربة...
و بعديها انا شايف الاسبرانزا A5 مع ان شكلها مش لاطيف اوي بس الطابلو بتاعها حلو و القعدة فيها مريحة جداً و واسعة و كل حاجة و اختبار الامان بتاعها كويس انا شوفته و عفشتها ناعمة في المطبات (عن تجربة الكلام ده انا والدتي معاها العربية بقالها 3 سنين و داخلة على الرابعة) بس خلي بالك ان العربية بتميل للاستخدام الحريمي اكتر او العناية علشان عفشتها ضعيفة يعني بيتهيألي الشباب بياخدوا العربيات يهبدوها فالعربية دي مش بتاعت هبد فبيعيبوا عليها كده فهي عايزة استخدام افضل في المطابات و كده و بس غير كده عربية هايلة و بالذات في الراحة و العزل و صوت الماتور غير المسموع
ده عن الجديد.....
اما الفديم فانا شايف ان افضل حاجة نوبيرا 2003 مانوال و عن تجربة برده العربية دي من اقوى العربيات اللي شوفتها هنا في مصر ماتورها في السحب شديد و بيديك صوت رياضي تحس انك راكب عربية بورش و شكلها تحفة بيجمع بين الفخامة و الشبابية شكلها انيق جداً و عفشتها قوية جداً بتستحمل ياما اكلت مطبات و شافت اسوأ الظروف من نقر و حجر حاجات كتيرة و العربية بقالها 7 سنين و لسة الحمدلله روحها فيها و بتدي الاداء المطلوب.. بس خلي بالك ان فيه بعض العربيات النوبيرا فيها عيوب صناعة ده على حد ما سمعت فلو هتشتري عربية مستعمل عايزك تكشف عليها كويس اوي و عموماً سعر النوبيرا موديل 2003 بيبقى في حدود 50-54 كده يعني هتوفرلك فلوس قشطة.
اسف على الاطالة