[m.genedy]

وبالفعل انتهى هذا الوقت الصعب ولكن ......
جاء الاصعب منة وقد حدث هذا بعد الافاقة واسترداد الوعى وان كان هذا استغرق بضعة ايام اجريت وقتها جراحة فى العين نتيجة الزجاج المتناثر وما ظننة انا انها دموع ساخنة -كانت مجرد دماء ......وقدر الله وماشاء فعل حادثة وعدت ونكتفى بهذا القدر من التفاصيل فى هذا الشأن-
وناتى الى الفروتة -اللى اتعجنت ولا تصلح مرة اخرى -يعنى على المقبرة على طول - طبعا امامى شهور طويلة علشان اسوق سيارة تانى--وخرجت من المستشفى بعد 18 يوم وطبعا اخويا جاء اخدنى بسيارتة -حاولت اقنعة انة يسبنى اسوق لكنة اكد لي انة مش مستغنى عن عمرة --
جاء الى زيارتى صديقى اشرف البنهاوى يؤكد لي انة كان مكسوف يجي يشوفنى -لاحسن اكون فاكر ان عنية الوحشة هى سبب الحادثة لانه كان نفسة فى السيارة-طبعا انا لم اعلق-دة كلة قدر ومكتوب-
وتطرق الحديث عن السيارات وقاللى سيارتى تحت امرك فى اى وقت(طبعا كداب -لانى لو قلت لة انا عاوزها دلوقتى كان ح يرفض ) وكان ح يقوللى برضة انا مش مستغنى عنها -لكن اهى مجاملة رقيقة منة برضة... طلبت منة ان يشوف لي سيارة اخرى جديدة وحبذا لو كانت جولف-وحدث بالفعل واشتريت جولف جديدة وكنت تقريبا خلاص اقتنعت انى مستحيل اركب غير الجولف وهو ماحد بعد ذلك فعلا وركبت بعدها 7 سيارات فولكس واجن مابين بولو وجولف وبورا وباسات-
واستغرق هذا طيلة عامان لم تكن فيهم اى حوادث ولكن بنهايتهم كنت افتتحت شركة التاكسى مع احد اصادقائى وليس مع طارق الذى اشترى محل -مطعم - واستقر فية -
وبدأنا الشركة ب3 سيارات مرسيدس وبعد عام اصبحوا 4 سيارات-

-وبعد العام طلبوا منى الذهاب لتجديد الرخصة وللاسف لم يحدث وتم رفض تجديد الرخصة وتم فض الشركة وعند بيع السيارات
طلبت ان احتفظ باحدى السيارات لنفسى - وقد كان وكانت المرة الاولى التى اغير فيها الجولف بعد عامان-وركبت المرسيدس كسيارة شخصية وبعد فترة لقيت ان التعليقات اللى بسمعها ونظرات الناس وانا سايق السيارة حاجة لا تطاق وهى فعلا موجودة فى الشعب الهولندى مع اى حد يركب المرسيدس لانها بالنسبة لهم رمز للرفاهية وممكن الاستغناء عنها-المهم انى ماعرفتش ابقى حاجة من الحاجات دية واخترت ابقى بطبيعتى وبعت المرسيدس-و اشتريت مرة اخرى جولف بيضاء-

تحفة كانت عند رجل هولندى كنا نعمل معا فى نشاط جديد وقتها كان قطع غيار الكمبيوتر وعرفت انة يعرض سيارتة للبيع واشترتها فورا--هذة السيارة بالتحديد-تقريبا ذهبت بها اماكن كثيرة--منها فرنسا وبلجيكا والمانيا وتقريبا لفيت بيها هولندا محافظة محافظة---
واستمرت معى كثير... برغم انها لم تعجب اولادى وكنت تسبب لهم الام فى المعدة - وعليها قررت ان ابيعها--واتخذ الامر بعض الوقت وفى احدى المرات وكنت وقتها راجع من مدينة اسمها -هريفيين-وكان معي واحد صديقى اسمة - محمود- من المنصورة محمود دة كان اول مرة اسلم علية ماشفتوش لانة جاء لزيارتى وقت ماكنت فى المستشفى عندما عرف من الجامع الذى نصلي فية بالحادثة وجاء وبعدها اصبحنا صديقين - المهم محمود من المنصورة اصلا -- ومش عارف يمكن انا بس اللى بيتهيئلى كدة لكن بحس ان كل الناس اللى جاية من المنصورة شبة بعض وبيتكلموا زي بعض يعنى لغاية دلوقتى كل ما اشوف او اكلم محمود احس انى بكلم الفنان يونس شلبى -الله يرحمة - برضة كان من المنصورة---ماعلينا واحنا راجعين من هريفيين لقينا على يمين الطريق السريع --سيارة مكتوب عليها للبيع على يافطة فى حجم السيارة وقلت لمحمود -اية رايك
قاللى وهو انت لحقت تشوف منها حاجة --
قلت لة السيارات فى البلاد دية بتكون كويسة واسعارها كويسة.. قاللى ياعم يالا نروح انا عصافير بطنى بتصوصو--قلت لة 10 دقائق بس -- وبالفعل اخدنا اول يمين فى اول شمال فى اول شمال ركبنا الطريق السريع مرة اخرى وبعدها اول يمين فى اول شمال فى اول شمال طلعنا الطريق السريع فى اتجاة السيارة المعروضة للبيع--وبالفعل وصلنا وتأكدت انها ستيشن وماركة فورد ايسكورت-

كنت بشوفها كتير لكن عمرى مافكرت اركبها -وكان لونها اسود وسعرها كان مفاجاة-واخدنا نتعارف اكثر على صاحب السيارة وعندما عرف اننا مصريين -رحب بنا وحكى انة زارها منذ زمن بعيد وعزمنا على قهوة عندة فى المنزل وذهبنا معة وهناك وجدنا فى حديقة منزلة كمية كبيرة من -البقر- طبعا لقيت محمود صديقى وقف امام -البقر- وهو مبتسم وبداء يسأل الرجل فى تفاصيل التفاصيل وانتهى الحوار بأتفاق على تصدير البقر على مصر - طبعا انا واثق ان مافيش اى حاجة من دية ح تتم -لانى عارف محمود كويس - وهو ماحدث بعد ذلك فعلا ولكنى وقتها كنت مضطر استحمل محمود لانة هو اللى ح يرجع بالسيارة التانية وكمان كان الجوع زاد علية اوى-وركب محمود سيارتى الجولف البيضاء وركبت انا الفورد الجديدة طبعا اول حاجة-دخلت على اول بنزينة فى الطريق--وتوجهنا الى امستردام--
واصبح امامى ان ابيع السيارة الجولف وكنت وقتها اجهز للنزول الى مصر وكان لازم تتباع وهو ما جعلنى اوافق ان ابيعها بسعر قليل.....
يتبع

<!-- / message --><!-- attachments -->