[Dr. Bolbolan]

السلام عليكم يا اخوانا - بعد فترة الاستراحه الاجباريه واللى كانت كلها موز ( مع الاعتذار للآستاذ اسلام جلال ) !

نكمل بطريقة السرد العقيمه اللى مابعرفش غيرها والله المستعان !

بعد ربع ساعه وكنت شايف العربيات بتزيد وكل واحد جايب معاه واحد أو اثنين ؟ لقيت نفسى وحيد و واتسلقت من

الشمس الحاميه ! رحت جريت واحده من البنات وأنا مكشر طبعآ ولكنها ندهت على المهندس (م) ! لآنه تقريبا كل

رقم أو مجموعه من الآرقام تبع أحد المهندسين ! المهم جاء شخص سفروته كده ولابس بدله وبيكلمنى بخفه كده ما

معناه عايز ايه ؟ خلص ؟ قلت له صيانة الآلف ! قال لى هات الرخصه و ح تكلفك 265 جنيه ! قلت له ماكو مشكله !

بس ح تعملوا فيها ايه ؟؟ بص لى باستغراب كده وقال لى حنريحها لك و نظبطها ونغير زيت الفتيس والفلتر !

قلت له ياريت نظبط هواء العجل ! فقال لى ده أساسى ؟ قلت له و طبعآ بتغسلوا العربيه ! قال لى طبعآ ! بس غسيل

الموتور على حسابك ؟ قلت له اشمعنى ؟ فقال لى علشان بيتغسل بالفوم ؟ وقالها بطريقه كأن الفوم ده معجزة المعجزات

أو كأنى ما أعرفش عنه حاجه ! وبعدين قال لى سيب المفتاح و تعالى السعه 1 بعد الظهر ! واحنا كنا الساعه 10

ونصف ! قلت له أولا أنا مش رايح فى حته ! أنا سأجلس فى الاستراحه وياريت تخلصها بدرى شويه ! ثانيآ : حضرتك

لم تسألنى عن ما اذا كان لى ملاحظات على السياره ؟ أنا مش جاى أغسلها وأغير الزيت وأسلم على حضرتك وبس !

فقال لى بصبر نافذ ! اتفضل قول ! قلت له عمومآ ليش لى أى ملاحظات سوى عن موضوع الحدفه الشمال ! أنا

يصراحه مش حاسسها قوى ! فياريت تطمأنوا على الزوايا ولا تعمل بها شىء الا لما تسألنى ! فقال لى لآ موضوع

الزوايا ده خارج الضمان ! لو عايز بنعملها ب 80 ج و غسيل الموتور ب 25 ج !! طبعا ذهلت ! قلت له ازاى يا أستاذ

لو أنا شارى سياره وجاى صيانة الآلف وكانت بتحدف فعلا ماتكونش من ضمن الضمان ؟؟ فقال لى بنزق ! علشان

ممكن تكون نزلت فى مطب لخبط لك الزوايا واحنا مش مسئولين عنه ؟؟ قلت له طب والدركسيون مابيلفش بسلاسه فى

اليوترنات ! فقال لى بكل الخبره والحنكه ! علشان العفشه رياضيه ؟ طبعآ بيكلمنى وهوه مش قرفان بالضبط !

بس عايز يحسسنى بأهميته وانه مش فاضى ( مع ان ده صميم شغله ) والآهم عايز يفهمنى انه مهندس ! بس أقطع

دراعى لو ده مهندس ! يبقى البلد راحت فى داهيه ! المهم أنا قلت أخلص فى اليوم اللى مش فايت ده ! رغم انى كنت

مريض ( برد ورشح جامد ) مع الحر والملابس تقيله طبعآ ! تركت السياره و نزلت الى الاستراحه ( تحت الآرض ) !

واسعه و كئيبه وبها تلفزيون ! والشاى والقهوه جدعنه من كيا ! طبعآ بعد شويه طلعت أدخن سيجاره ولم أجد السياره

يعنى لاترى ايه اللى بيحصل فيها ! وفى الاستراحه يوجد مونيتور مكتوب عليه أسماء أصحاب السيارات و نوع السياره

و رقمها والوقت اللى دخلت فيه و حتخرج فيه ! و دى لمسة التقدم الوحيده فى الموضوع ! طبعآ مر الوقت بصعوبه

وكل 5 دقائق سيجاره فى الخارج فتعرفت على المكان و طبعا فيه ساحه كده فيها السيارات اللى عامله حوادث !

وفيه كاراج صغير زى المشحمه مكتوب عليه الصيانه السريعه ! و كان فيه نيوسيراتو مرفوعه بداخله ! فسألت العامل

اللى شغال عليها ! يعنى ايه صيانه سريعه ! فقال لى يعنى مثلا صيانة الآلف ! اذن المكان ده للمحاسيب ! أما المتاعيس

فبياخدوا سياراتهم الى ورشة أمنا الغوله وما حدش يشوفها لحسن الغوله تأكله ! المهم نزلت تحت السياره وركزت على

العفشه الخلفيه ! هى بسيطه جدآ و دنجل أو بار حديدى عريض بين العجلتين والمساعدين ! وكل شىء عادى بس لاحظت

حاجه فى منتصف السياره بعد الدنجل ده عامله زى التوستر بتاع العيش ! وسألت الباشمهندس ايه ده ؟ فقال لى بكل ثقه

ده ( الكامستر ) ؟؟ فلما سألته يعنى ايه و بتاع ايه ؟؟ اتلخبط وارتعش وقال لى خاص بالبنزين والآبخره وكده ؟؟؟

فياريت اللى يعرف عنه حاجه يشرح لنا ! أخيرا 1 ونصف ندهوا على اسمى لاستلام السياره ! أنا قلت ح ألاقى عروسه

بتلعلط أمامى ! طلعت لقيت السياره واقفه لوحدها يا عينى ووصل دفع الفلوس على السقف وفوقه المفتاح ! منتهى

قلة الاحترام والصفاقه ! أخذتهم وذهبت الى الخزنه ولقيت المبلغ 295 ج يعنى 300ج منهم 25 غسيل موتور بالفوم

الجبار ! ( ملحوظه بأغسل الكورولا بره و جوه وموتور وشنطه بالفوم برده ب 25 ج شامل البقشيش ) ! ptmnlo123per144

و لم أجد أحدآ أكلمه أو ألكمه ! والسياره لم تنظف اطلاقا من الداخل أو الشنطه ! و من الخارج مطرطشه ميه والبواب

بتاعنا بيلمعها أجدع من التوكيل ! طبعآ قرفت ولم أفتح حتى الكبوت الآمامى لآطمأن على غسيل الموتور و مشيت وأنا

بأقول حقى برقبتى و حار و نار فيهم ال 300 ج والمشوار ال62 كيلو رايح وزيهم جاى ! يعنى كانت روكسى أحسن !

وطبعآ الله أعلم لو كانوا غيروا زيت الموتور أو الفلتر ! و حسبى الله و نعم الوكيل ! التقطت بعض الصور للسياره !

و كمان واحده سيراتو 2009 هاتش باك مستعمله أول مره أشوفها و واحده جديده كوبيه ! وتوكلت على الله توجهت

الى طريق المحور ! وبعد لما لفيت اليوترن لقيت كام صول و ضابط قفلوا اليوترن و لقيت نفسى ماشى لوحدى وأمامى

فاضى و خلفى فاضى ! طلعت طلعة المحور لقيته فاضى بعد شويه لقيت من خلقى 2 سياره شيروكى بيج و أمامهم

موتوسيكل وسارينه ! ففهمت انه أحد الوزراء فأخدت يمين و خليته يعدونى ! و طلعت سياره جيش رقم 1 و خلفها سيارة

حراسه ( بطل 461 ) ! قلت أنا فرصه أمشى وراهم يفتحوا لى السكه ! الحمدلله لقيت السياره ماشيه بسلاسه و يسر !

وبأبص على العداد لقيت السرعه 160 ( يالهوى ) ! طبعآ ما خفتش من السرعه بس اندهشت انى لم أحس بها والتكييف

شغال ! لا صوت الموتور على ( الراديو طبعآ شغال ) ولا حسيت ان السياره بتعمل أى مجهود ! انتبهت بأه ان دى

فرصه أجرب السياره ! يمين شمال ! تجاوب رائع ! رفعت يداى عن الدركسيون ! ما أقدرش أقول حدفه شمال أبدآ !

أينعم السياره كانت بتتسحب للشمال ببطآ شديد غير ملحوظ ! بس على سرعة 160 ما أقدرش أبدآ أقول حدفه !

لآنها لو كانت حدفه يعن الدركسيون بينتش منك ولو على سرعة 100 كانت السياره طارت الى الآرض الزراعيه !

لكن ممكن تموج الطريق ! و ممكن علشان أنا بس اللى راكب السياره على الشمال ! و ممكن ولا حاجه خالص !

بس عمومآ هوه الدركسيون مش طبيعى زى الكورولا مثلا ! بمعنى انك لو تركت يديك و كان منحرف مللى واحد

يمين أو شمال ! بيظل على انحرافه ولا يرتد للمنتصف بالضبط ! عمومآ احنا ايه اللى يخلينا نسيب ايدينا ؟ هوه

احنا فى السيرك ؟؟ كمان حكاية عدم الارتداد بسهوله فى اليوترن اتحسنت خالص ! وشاء السميع العليم انى من

يومين ولمدة اليومين دول تطلع لى مشاوير بالسياره لا يقل المشوار الواحد عن 200 كم داخل القاهره مره واحده !

أداء السياره كان أكثر من ممتاز ! وبرده حكاية الهبده اللى فى الخلف قلت خالص و مش متأكد هل ده نتيجة انى أصبحت

أحرص على عدم النزول فى مطبات أم اتعودت و مابقتش آخد بالى ! بس والله نزلت فى مطبات كثيره ولم أشعر بها

الا كسياره عاديه ! نيجى بأه لخلاصة الكلام اللى فات ده كله ! طبعآ كلام كثير و ممل للبعض ! بس مهم للبعض اللى

يحب يستخلص النتائج بنفسه ! أما اللى عايز الاجابه النهائيه فى برشامه و يحب يستعين بصديق ! اليكم الآتى :-

1- مراكز الصيانه كلها زى بعض ! ولا فرق بين روكسى والقطاميه ولا المركز الرئيسى !

2- معاملة الموظفين ( المتهندسين ) فى مراكز الصيانه غير لائقه ! ولا يبدوا عليهم انهم بيفهموا أى شىء !

3- لن تعرف ماذا تم فى السياره ! وأسعار الصيانه مغالى فيها ! و كفايه عليك صيانة الآلف و بس !

4- السياره اعتماديه و جيده و مش عايز أقول ممتازه ! فراملها أكثر من رائعه وسحبها ممتاز بتكييف و بدون !

وتوجيهها دقيق بس ما تسيبش الدركسيون اللى هوه أصلا تقيل شويه و ممكن يوجع لك ايدك لو كنت حنين شويه !

5- تقفيل السياره أكثر من ممتاز و مافيش غلطه و تابلوها رائع وسهل الوصول لكل أجزائه والماتى فنكشن مريح جدآ .

6- المنطقه أسفل بانل التكييف فعلا بتسخن شويه ! يعنى المكان اللى بتحط فيه الموبايل والسجاير وكده ( مش مهم ) !

7- لم أقيم استهلاك البنزين لآنى لم أسافر بها بعد ! والعدادات تحفه و عداد اللفات مضبوط جدآ والسلانسيه 6000 لفه !

8- السياره تساوى كل قرش مدفوع فيها ! ولا أعتبرها غاليه وبصراحه سقتها أسبوع ! عجبتنى ! وسافرت قلقت تانى

من كلام المنتديات ! بس لما رجعت واستعملتها فى الزحمه الشديده و فى الطوالى ! غيرت رأيى نهائيآ الى الاعجاب !

أخيرآ : كلامى ده رأيى الشخصى و غير متحمل ذنب أى شخص يسمع كلامى و بعدين يشوف هوه العكس !

يا ريت أن لا يفهم البعض انى خايف من المسئوليه ؟ أنا شايل مسئوليت و عيلتى والناس اللى بأعالجهم على

كتفى ! أما شـراء سياره فهى مسئولية كل مواطن ! ( السيراتو ضاره بالصحه وركوبها مسئولية كل مواطن ) !

Dr. Bolbolan