رد: تجربة قيادة هوندا بايلوت 2009
السلام عليكم يا رجالة مصر موتورز
طبعا بعد التقرير الشامل اللي عملو محمد باشا مش عارف اقول ايه ؟؟؟
و الحق يقال الفترة القصيرة اللي جربت فيها العربية صعب يتقال عليها تست دريف لاني لم يتسني لي تجربة التسارع لكن انا كنت مركز في حاجة واحده و كان هدفي اوصلها لمحمد باشا الا و هي اني اقارن الهوندا بعربيتي.
زي ما قال محمد العربية مريحة جدا و عجبني سمك و تنجيد الفرش بتاعها اي نعم انا اتصهيصت و انا قاعد ورا و محمد باشا بيجرب التسارع و التنقل بين الحارات و الفرملة لكن بشكل عام و في ظروف القيادة الطبيعية العربية مريحة جدا.
تاني ملاحظة بعد الراحة هي العزل العربية ما شاء الله معزولة كويس جدا و عند غلق الشبابيك لا تكاد تسمع شيئ و العربية تضاهي الالماني من الناحية دي.
بعد كده فيه نظام التعليق و اللي زي ما محمد وضح ناعم و سلس و بيمتص عيوب الطريق بجدارة و انا عشان اتاكد قصدت اني امشي في حته غير معبدة و زهلت بصراحة من الراحة و طبعا ده بيجي علي حساب الثبات في المنعطفات لكن العربية احسن بكتير من غيرها في نفس الفئة.
و بالمقارنة بالكايين الثبات اضعف لكن الراحة اكتر و بمراحل الكايين في الطرق الغير معبده غير مريحة بالمرة و لولا التقفيل الالماني انا متاكد اني كنت هسمع اصوات غير لطيفة و هشوف حاجات بتتخلع من كل اتجاة و هي دي فلسفة الالمان عموما.
ده باختصار راي المتواضع من حكم تجربتي القصيرة للعربية و هو ميختلفش عن راي محمد باشا و انا شايف ان لو ربنا نولهاله هينبسط منها جدا و هتريحة.
و احب اكمل اكم بقي الجولة و من دلوقتي اللي بيتعقد يروح.
بعد الهوندا طلعنا علي توكيل المازدا عشان نشوف ال CX9 و نقارنها بالبايلوت و بما ان شفت العربية مع واحد قريبي كنت عارف انها اصغر بكتير من البايلوت و قد كان.
بعد كده اتجهنا الي توكيل الاودي لاني كنت قريت خبر نزول ال A5 Sportback و كنا عايزين نشوفها. المهم روحنا المعرض الاقرب و لفت نظرنا كمية العربيات المستعملة اللي قدامة و كلهم حاجات تفرح اشي A6 و A8 و RS4 و فوجئنا ببي ام X5 و مش عايز اقولكم بشوكها. بعد ما دخلنا المعرض لقينا نفسنا محاوطين بوحوش S8 و RS4 و RS6 و S6 و صعقتا لما اكتشفنا ان ده معرض المستعمل و اقدم عربية عندهم كانت موديل 2007 مع تواجد كثيف لموديلات 2009 و بعد كده عرفنا من البايع ان ال X5 اللي كانت برة موديل 2010 و بقالها اسبوع بس و صاحبها بدلها ب Q7 2009 سبيشيال اوردر بعد الصاعقة دي و شوية صدمات كهربائية من الاسعار قررنا ناخدها من قاصرها و نروح معرض الجديد نتفرج عشان نشوف ال A5 الجديدة و نخلص.
و صلنا المعرض و دخلنا و طبعا كوكبة من الاوديهات واقفة منورة و قعدنا تدور علي ال A5 و مش شايفنا بعدين لقينا عربية شكلها غريب مستخبة ورا كونتر كده و لما قربنا لقنيها هي ال A5 Spotback و للاسف العربية طلعت اقل من كل التوقعات. العربية عبارة عن بروفيل بس غير كدة الوش و الظهر هما هما بتوع ال A4 و صعب علي الغير خبير التمييز بينهم مع اختلاف الانتريور و ده فصلنا جدا بصراحة و انا راي انها صعب تقف قدام المنافسة . بعد كدة خدنا جولة سريعة و ركبنا كام عربية كدة علي الماشي و اتاكدت بالدليل القاطع و البرهان الساطع ان بالفعل الاودي انظف تقفيل ممكن تشوفه و فارق عن اقرب المنافسين. و للاسف مش عارفين سر التدهور الرهيب في سعر اعادة البيع و ده اللي مطفش الناس منها.
بس كده هو ده خلاصة اليوم تعقيد و تضرع اللي الله انه يفك ازمة مصر و العربيات اللي زي دي تدخلها بسلام
__________________
Sharief Mansy
Farewell my Cayenne, you were the best car i ever had and driven
|