[حازم شاهين]

أنا تجربتى مع الكورى و الكيا بالذات كانت لمدة سنة واحدة مع كيا ريو أمريكانى موديل 2002
و بصراحة كانت ناجحة معانا جدا و بنت حلال على الأخر و قيادتها ممتعة و أداءها كان جيد بصفة عامة
كان عيبها الوحيد ضيق صالونها و خاصة للركاب فى الخلف

أما السيراتو فأنا وقعت فى غرامها أول ما شوفتها فى معرض سيارات على الطبيعة
لكن بسبب شكلها فقط و إمكانياتها لكن معنديش أى تجربة حقيقية معها
و تحليلى للحادث مكانش دفاع عن العربية بقدر ما كان تشكك فى رواية اللى حصلتله الحادثة... فالرواية فيها أكتر من نقطة مش منطقية و فيها مبالغة واضحة فكان لازم توضيح النقطة دى للناس علشان متبقاش كل الردود من نوع "شكرا على النقل و حمد الله على السلامة" لكن لازم إللى يقرا الموضوع يفكر شوية و يشغل دماغة شوية قبل ما يسلم بالرواية ... إللى بالمناسبة مش بقول إنها من إختراع صاحبها "حاشا لله" لكن بقول إن صاحبها كمل الأجزاء المفقودة و غير المعلومة ليه بتصورات و تخيلات صعب تصمد أمام تشكيك و إنتقادات من أشخاص عاديين حتى مش متخصصين و فى رأيى إن ده سببه مش خلل فى شخصية الراوى "حشا لله" لكن زى ما أشار دكتور بولبولان و أخرين إن اللى فى الموقف ده بيحاول يتخلص من شعور بالذنب و الصدمة بمحاولة إلقاء اللوم على العفريت .... بمعنى حاجة من نسج الخيال ... و العفريت فى السيراتو كان المقصات و العفشة و الحدفة و غيرها .

لكن العربية جميلة جدا و فيه منها كمية محترمة بتجرى فى كل حته فى العالم مسمعناش عنها أى أخبار سيئة و هى أصلا قبل ما بتنزل بشكل تجارى بتاخدلها كذا سنة فى إختبارات من كل نوع
فمطلوب منك تنسى الكلام إللى بقوله الناس و تستمتع بالعربية بتاعتك و تحافظ عليها و ما تهملهاش و تتبع إجراءات السلامة لأنها ملهاش لازمة فى 99.9999 % من الوقت لكن ساعة ما يبقى ليها لازمة ممكن يتوقف عليها حياة أو موت