صني 2013
 

أنا حاجزه نيسان صني 2013 بقالي شهرين من التوكيل وكنت حجزاها ب 100 ألف جنيه وكان اتفاقي معاهم أني استلمها بعد شهر واحد وكل ماكلمهم يتحججوا بأي حاجه لحد امبارح بكلمهم قالولي أدامك شهر كمان وكمان سعر العربية زاد 2000 جنيه
أنا مش عارفه اعمل إيه معاهم أستني ولا الغي الحجز خصوصا أن العربية عجباني . ولا أجيب حاجه مستعمله وخلاص أنا قدامي سيراتو 2011 هاي لاين ب 95 ألف - واوكتافيا 2007 ب 110 ألف إيه رأيكوا ؟؟

رد: صني 2013
 

انت حضرتك غلطان انك حجزت بالمبلغ ده وعشان كده هيركنك للاخر خالص وممكن كمان هوه اللي يقلك مفيش عربيات وتعالي خد فلوسك ويكون هوه شغل فلوسك ديه شهرين تلاته انا رايي انك تسحب فلوسك فورا عشان الوكيل ده بيستغلك عشان انا حصلت معايا من السبع فرع المنصوره ومعظم المعارض والتوكيلات في بلدك كده وانا شايف ان حضرتك تزود علي 100 الف 8 تلاف ج واجيب كيا سيراتو زيرو اوتوماتيك اول فئه وهي والله برقبه الصني الجديده ديه وع فكره الصني الجديده فيها مكونات هندي وصيني كتيره جدا غير ان موتورها 1500 سي سي وفيها عيب تزييق في المسعدين اللي ورا وياريت كل واحد حاجز العربيه يقاطعها فتره كده وخليها تصدي وع فكره العربيه في الخليج محدش بيركبها ومش منتشره خالص هناك الصني الجديده ديه بس الشعب المصري شعب طيب جدا عشان كده مقبل ع العربيه ديه وا لدليل ع ذلك ان نيسان قررت تتوسع باستثماراتها بمصر عشان استغربت علي الاقبال الكبير ع العربيه فياريت الناس تاخد موقف من الوكلاء والموزعين عشان يغيرو سياسيتهم المستغله لشعبنا الطيب وكل عام وانتم بخير

رد: صني 2013
 

أكيد حضرتك تقصدى ان وقت ما تم حجزها كان سعرها 100 ألف بس أكيد حضرتك حجزتى بألف جنيه و لا حتى 5 آلاف مش كده و لا ايه
على العموم أنا حجزت و استلمت بعد شهرين و نص تقريبا و ده بسبب ضغط الحجز على المصنع و هى فعلا نيسان زودت سعر العربية الرسمى الأوتوماتيك الى 102 الف
فموضوع تأخير الاستلام و زيادة السعر مش ذنب الموزع الصراحة
وتقدرى حضرتك تتأكدى من الكلام ده من نيسان نفسها مش من الموزع على الرقم المختصر الخاص بنيسان ايجيبت 16244 وممكن كمان تسأليهم على امتى هتستلمى بس هيحتاجوا بياناتك الشخصية و بيانات ايصال الحجز

رد: صني 2013
 

أخيرا لقيت حد جاب العربية :CONGRA~238:
ياريت حضرتك تقولي رأيك في العربية وتستاهل أني أستني شهر كمان وبالسعر الجديد ولا أشوف حاجه تانيه وياريت حضرتك تقولي العربية فعلا فيها عيب في المساعدين وبتزيق ؟
شكرًا لرد حضرتك ومستنيه ردك علي اسالتي

رد: صني 2013
 

بالنسبة لان حضرتك تشترى اوكتافيا فطبعا عربية جميلة بس مستعمل انصحك تبعدى عنه و بالطبع السيراتو عربية منتشرة و كورى آه بس مفيهاش وسائل أمان و واطية على الأرض انا شخصيا ما عجبتنيش هتلاقى كلام كتير عليها فى المنتديات ان فيها حدفة شمال كل ده خلانى ابعد عنها

واضح ان حضرتك فى نفس حيرتى قبل ما كنت اشترى العربية هأسأل حضرتك سؤال حضرتك احتياجك ايه من العربية أنا هأفترض انه نفس احتياجى و هو عربية عائلية و موفرة للبنزين و واسعة و فيها وسائل امان وخدمة ما بعد البيع تكون جيدة

أنا كنت بأدور من رنج سعر 80 حتى 115 تقريبا فعجبنى اللوجان الأوتوماتيك بـ 80 الف و هى واسعة و عالية عن الأرض و الصنى أوسع و عالية عن الارض برضه خاصة ان كان عندى عقدة من الموضوع ده بسبب اللانوس لكن اللوجان قطع غيارها غالية و مفيش فيها ABS للفرامل لكن فيها مالتى فنكشن

عجبنى برضه الكيا الريو بس لما شوفتها فى الوكيل اوبشنها مش كتير و أغلى فى السعر و ضيقة و تقفيلها معجبنيش و الاكسنت الجديدة شكلها شبابى زيادة عن اللازم و مفيش فيها وسائل أمان و أغلى و ضيقة عن الصنى حتى روحت شوفت الأوبترا كمان ما عجبتنيش




نيجى لرأيى فى النيو صنى و السعر

على فكرة لو حضرتك مش مستعجلة و محتاجة المالتى فنكشن زى اللوجان ممكن تستنى الفئة الأعلى من الصنى بس مش أقل من شهر على ما يعلنوا عنها و فيها كمان جنوط سبور و عدادات ليد وشوية حاجات تانية سعرها تقريبا هيبقى من 113 الى 116 الف



أما العربية الـ Ex فهى معايا زى الفل الحمد لله وعلى فكرة هو كان معروف من زمان ان سعرها أعلى و نيسان عملت تخفيض عليها الى 100 فعلشان كده وانا بأحجز كنت عارف ان السعر ممكن يزيد و المفروض الموزع كان بلغك بده و انتى بتحجزى لكن هى طبعا تستاهل بدليل ان ناس بتحجزها كتير لدرجة ان باب الحجز اتقفل و اتفتح مرتين والناس بتضطر تجيبها بالأوفر برايس بسعر اعلى من 8 آلاف الى 10 آلاف فحضرتك السعر زاد معاكى ألفين بس يبقى تمام أوى و هى طبعا تستساهل سعرها

الحمد لله الدفعات الجديدة من بعد عيد الفطر مفيهاش مشكلة المساعدين و دى كانت فى الدفعات القديمة فى عدد صغير من العربيات مش كلها و تم تلافى المشكلة حاليا و تم تغيير البطارية الى جافة و ده معنها اهتمام من الشركة بعملائها و بشكاويهم بعد البيع

الاوتوماتيك بتاعها جميل و رائع و مش بتحسى بيه لما بينقل مش زى اللوجان مثلا و تانك البنزين يمشيكى 500 كيلو

وطبعا العربية واسعة جدا وده راجع لان العربية نفس طول النيسان الشكل القديم لكن مساحة الموتور بتاعها أقل و الصالون أطول

واى استفسار تانى انا جاهز للتوضيح
وعلى فكرة كل اللى كتبته ده رأيى الشخصى وممكن يكون مختلف مع حد بس أنا حبيت أوضح تجربتى و أنا بأدور على عربية لغاية لما ربنا كرمنى بالنيو صنى

و بأنصحك بصلاة الاستخارة
.