السلام عليكم .. ازيكم يا فيرناوية ..

باختصار كده أنا أول عربية أركبها هيا اللي معايا دلوقتي ..

دايهاتسو تيريوس موديل 2000 جير عادي ..

السيارة دي كانت مستعملة و معايا بقالها 6 سنين و هيا 1300 سي سي

ما اشتكيتش من المكنه الحمد لله بس العفشة طلعت عيني الحمد لله برضو :)

قطع غيارها غالية جدا بالنسبالي ( المساعد الواحد ب 600 جنيه ) :12B1B3~136:

و طبعا أنا من المنصورة و هنا في المنصورة مليش غير فلاتر و سيور انما اي حاجة تانية

لازمة اروح اجيبها استيراد من بور سعيد او من القاهرة و الموضوع ده متعب

و انا بفكر جديا دلوقتي ابيعها و اشتري فيرنا جديده على قدي

بس لما قريت كل مواضيع المنتدى هنا و شفت عيوب التصنيع خفت

و انا عايز اعرف بالنسبة لصيانة التوكيل ( غبور اللعين :) ) موجوده في المنصورة ؟

أنا ركبت الفيرنا كتير تاكسيات و بصراحة كنت بخاف من كتر ما هيا بتجري

و ما سبتش سواق تاكسي إلا و سألتو عليها و الجواب كالتالي :

1- أصحاب التاكسيات الفيرنا ( لأ العربية تمام يا بيه و زي الفل بس عيبها انها واطيه
شوية زي كل العربيات ما هيا واطيه انما مكنه و عفشة و اعطال زي الفل )

2- جدو حبيبي .. الناس الكبار أصحاب الشاهين و ال 504 ( لالالالا اوعى ..
دي بسكوته متستحملش خليك في الياباني .. دا التاكسيات بيشتكو منها )

و هتجنن مش عارف آخد قرار بجد

عربيتي لو بعتها مستعملة تجيب حوالي 35

و أنا لو اتنططت مش هعرف اكمل غير 70

و مش عايز حاجة اتبهدل معاها و إلا يبقى بناقص انا مشاويري مش كتير

افيدوني افادكم الله :)

حاجة أخيرة بقى .. سمعت ان غبور اخر سنة ليه في الفيرنا 2012 و خد سنة كمان سماح لحد 2013 .. لو الكلام ده صح هل معنى كده انو معدش في فيرنا ؟؟
طب و قطع الغيار ؟؟ ده هيا دي اكتر حاجة حبيتها في الفيرنا ان حاجتها عند أي سوبر ماركت :)