مصر موتورز مجتمع السيارات - حاكم البلاد هو من يقرر مصير العباد ولا دستور ولا دياولو

السلام عليكم
طبعاً العنوان مش غريب عليكم
لانكم متعودين دايماً ههههههه
بس الغريب انه بعد الثوره مازالوا
يدرسون لاطفالنا إن اللص من يعاقبه ليس القانون
ولا قاضى القضاه
ولا حتى قسم الشرطه
لان فى آخر درس للغه العربيه للصف الثالث الابتدائى عام 2011/2012
وانا براجع لابنى الدروس عشان الامتحانات
على البواب وكل سنه وانتم طيبين
لقيت آخر درس عنده بيحكى حكايه
بالنسبه للسن ده هابله جداً
وبيقول ان فى احدى القرى
كان فى راجل سولت له نفسه
انه احضر قدر فارغ
وقال لاهل القريه
ان هذا القدر من يضع فيه طعامه يزيد الضعف
وطبعاً اهل القريه السزج اللى ما يعرفوش
يتولوا امورهم لوحدهم
صدقوا الكلام
واحضروا له طعامهم لكى يزيد بدون تعب
وبعد ما حطوا الطعام الراجل النصاب
ضحك عليهم واكله كله
وقال لهم ان القدر ابتلع الطعام
وطبعاً اكيد هما صدقوه بس كانوا متضايقين
عشان اكلهم ضاع
وهب راحوا ماسكين الراجل
وودوه فين بقى
لالالالا
مش قسم الشرطه
امال فين
لالالالالا
مش للقاضى
ودووه
للكبير قوى
حاكم البلاد
خلوا بالكوا
بدية القصه كانت
فى إحدى القرى يعنى مش فى إحدى البلاد
وبقدرة قادر بقى ليها حاكم بلاد مش عمده ولا قاضى المهم
انا ماكنتش قريت القصه العقيمه
انا كنت بحل مع ابنى الاسئله وبتابعه فقط
وعندما جئنا الى سؤال عندما أمسكو بالنصاب أين ذهبوا به
فجاوب ابنى إجابه مظبوطه
قالى إلى حاكم البلاد
بس سألنى سؤال والله والله
مابقيتش عارف أجاوبه
قالى بابا هو إزاى قريه صغيره
والناس راحوا سلموه لحاكم البلاد
طبعاً انا ماعرفتش أجاوبه
وقلتله حل السؤال زى ما هما عايزين
وانتقلنا للسؤال الثانى وهو اجمل من السؤال الاول
ومالوش دعوه بالدرس بس هما حشروه
علشان يراضوا وزارة الداخليه على قفانا
جايبين جمل وعايزين الطلاب يرتبوها
ان الاهالى رأوا لصاً
وجروا ورائه
واثناء وهما بيجروا يعنى
رئآهم رجل الشرطه
وأستلمه منهم وبرضه راح وداه فين
وداه لحاكم البلاد ههههههههه
أصل حاكم البلاد ده قاعد على مصطبه
وكل ما يمسكوا حرامى يودوه لحاكم البلاد هاى هىء يطول عمره يطول أجله ينصره على مين يعاديه هههههههههه
وطبعاً الاشياء المستفاده من الدرس ده
ان حاكم البلاد هو اللى بيحبس اللى مش بيمشى عدل واللى مش بيسمع الكلام
وان رجل الشرطه جاهز دايماً
يعنى اى حد يجرى ورا حرامى ويمسكه
مش هايتعب ويروح يوديه القسم والروتين الفارغ ده
لان رجل الشرطه
هاتنشق الارض وتلاقيه واقف امامك
وكمان اوبشن زياده هو اللى هايودى الحرامى
مش للقسم لالالالا
لحاكم البلاد على طول
وانت هاتروح بيتك سعيد ومطمئن
وماتخافش على عربيتك
وتفضل تحطلها جرس وزمامير
وأجهزة إنذار وشركات تضحك عليك
وتبيعلك بلونه بزماره وتقولك
ده أحدث جهاز إنذار فى الشرق الاوسط
آه بصحيح هو يعنى الشرق الاوسط ده يبقى كام بلد لانه أتظلم معانا
كل واحد بيفتح محل كوشرى يقولك أحدث
محل كوشرى على مستوى الشرق الاوسط
هو يعنى الشرق الاوسط ده منين لفين
وبيركبولو اوتوبيس كام ههههه
سلام بقى صدعتلكو دماغكم
http://im26.gulfup.com/2012-04-29/1335714012975.jpg
http://im26.gulfup.com/2012-04-29/1335714012756.jpg
http://im26.gulfup.com/2012-04-29/1335714019887.jpg
http://im26.gulfup.com/2012-04-29/1335714019228.jpg