الموضوع ده بصراحه محيرني وهقولكم ليه :

في مصر أول ما اشتريت اللانسر وبما إنها كانت أول عربية زيرو كنت مدلعها على الآخر وكان ناقص أدخلها الشقة تنام جنبي ، يعني الغسيل والتنظيف كان شبه يومي ، مغطرات ، منظفات ، إكسسوارات ، وكل يوم لازم أبص على الميه والزيت وكل حاجه مع إنها كانت زيرو .

لما سافرت بره واشتريت الصني المستعملة الاهتمام قل بالنظافة والاكسسوار وزاد بالميكانيكا لأنها كانت مستعملة وأنا بصراحة كنت خايف منها بس طلعت أصيلة وكمان صيانة المستعمل هنا مكلفة جدا بس برضه كنت مهتم بيها جدا .

المشكلة بقه عروستي الجديدة الكرولا ، لا يوجد أي اهتمام بيها تماما ومش عارف ليه ولا إيه السبب ؟ يعني لا جبت معطر ولا أي إكسسوار والغسيل كل فين وفين ، حتى صيانة الألف في التوكيل بعت السواق وداها وجابها ولا سألت حتى عملوا فيها إيه !!!!!!!!!!!! مع إنها عربية جميله جدا جدا وأنا حاببها والله بس مسألة الاهتمام والدلع ده قل جدا عندي مش عارف ليه ؟

دلوقتي بقه عايزين كل عضو يقولنا بيدلع عربيته إزاي ؟ وبيعملها إيه ؟ وهيا بالنسبة له إيه ؟ ومدى اهتمامه بيها ؟