مصر موتورز مجتمع السيارات - الطريق للبى ام يبداء بسيات 133

البدايه من تحت الصفر

طبعا فيه ناس كتير بتبداء من الصفر لكن فيه ناس اكتر بتبداء من تحت الصفر

بس مش معنى انك بتبداء حياتك من تحت الصفر انك مستحيل توصل او ان المشوار طووووووووووويل بلا نهايه ابداً وبالعكس مشوار النجاح مش كله مرار وفيه لحظات حلوة وامانى احلى بتدفعك لقدام وتحول مرار السنين اللى فاتت لذكريات فخر واعتزاز

وعلشان تكون راجل عملى وتحسبها صح مفيش اصلا حاجة اسمها تبداء من الصفر

ولا من قبل الصفر

هقولك ليه ..

كل واحد فينا الصفر الحقيقى لحياتة العملية فى سن 14 سنة
لان ده بدايه السن الطبيعى والفطرى لانك تتحول لراجل وشخصية مستقلة وانسان منتج
طبعا التحول ده بياخد شوية وقت وبيختلف من حد للتانى بس ده المتوسط الطبيعى

طيب مين فى السن ده مبيبقاش عنده الى حد كبير طموحات واضحة وامال ويمكن خطط كمان (( ده لو خيالة واسع))

طيب مين فى السن ده مش بيبقى اتعلم اساسيات الحساب والقرائه والعلوم الحديثة (هندسة جبر احياء ,,,,)

انا بقولك ده كفايه كمرحلة صفر كل اللى قبليها ممهد للمرحلة ديه وكل اللى بعدها حاسم ومؤثر بعد كده

ومن هنا اول درس عملى ممكن يتقال انك تحسب عمرك من سن ال 14 مش من بعد التخرج زى ما اغلب الشباب للاسف بيغلطو ويعملو كده ولازم كل سنة من بعد الاعدادى تستعد فيها بطريقة او اخرى للعمل

يتبع .....

[SIZE="5"]
تطبيقا للكلام اللى فات ومن واقع تجربتى العملية

فترة الاعدادى بالنسبالى كانت صعبه جداً فعلى اثر ظروف عائلية انتقلت من مدرسة القائد فى مصر الجديدة (مدرسة خاصة) لمدرسة على ابن ابى طالب الابتدائيه فى مدينة السلام
بمعنى اخر من سندوتشات الجبنة الكيرى ولانشون صلاح وعبد الفتاح مع كيس شيبسى ونايتى وبنخبى فى الشنطة الجيم بوى اول ما طلع وبنلعب بالخيط والبازلز والمكعبات

الى سندوتشات الجبنه التلاجة والبيض وقراطيس الب السورى والدوم وام الخلول والبتاعة اللى كانت عباره عن بسكوتة كده ومتلحوسة عسل اسود واحيانا بيبقى فيها شلن كنوع من المسابقات على غرار بم بم كده وكله كوم والدوم ده كوم تانى

http://www.arabw-pearl.com/vb/temp2/15_1312725953.jpg

حاجة كده عاملة زى الظلطة العيال كانت بتنزل فيها عض ياعنيى طول النهار متعرفش من الجوع ولا من الغل وتلاقى العيال فى الحوش اللى مليان رملة وطوب محيلتهاش غير الرملة والطوب للعب حتى السندوتشات بياكلوها بالرملة والغبار اللى مالى الحوش من الجرى

اه نسيت اقولكم انى كنت من اول الناس اللى اتلغى عندهم سنة سادسه فكنا ما يسمى وقتها دفعة مزدوجة فيها اللى طالع من سنة خامسة على اولى اعدادى واللى طالع من سنة سادسه على اولى اعدادى وبالتالى المدارس كانت مكتظة بشكل غير مسبوق والتعليم الحكومى كان فى اسواء حالته وده على الاقل كان كافى لتدمير كل حياتى ومشروعاتى فى الوقت ده

بس علشان احكيلكم على مشروعاتى وطريقه تفكيرى فى الوقت ده هرجع بيكم شوية لابتدائى ومواليد اواخر السبعينات يفتكرو الاتارى والكمبيوتر صخر والبيزك وفاكرين الساعات الكاسيو الديجتال واللعب اللى بريموت وموتور ومسلسل مازينجر ونايت رايدر ومصطفى محمود وسلاحف النينجا والمغامرون الخمسة وملف المستقبل لنبيل فاروق حط كل دول فى الخلاط فى فترة الابتدائى يطلع الاتى

المشروع الاول : وده كان مبكر جداً وكان عباره عن انى اجيب عصيان المقشات وجنازير واعمل بيها مونشاكو زى بتاع بروسلى وسلاحف النينجا وابيعة

http://taerk2005.jeeran.com/bruce_lee10_gross.jpg
http://im19.gulfup.com/2012-01-27/1327661877531.jpg

بس للاسف فشل لظروف انقطاع مسلسل سلاحف النينجا وتركيزى مع مسلسل مايزنجر

المشروع التانى : تصميم لعبه مازينجر بس اقرب للحقيقه فمثلا الاشعة المدمرة هتبقى لمبات لونها ازرق تركب عادى والرياح المدمرة تبقى من ماتور فيها مروحة وممكن نعمل زى تانك هوا ونحط فيه شوية طباشير علشان تبان الرياح والقبضتين المدمرتين يتفكو ويتركبو وممكن يتحط فيهم سوست علشان ينطرو وهكذا كانت المشكلة عندى بس ازاى اعمل ميكانيكا حركة الرجلين

http://desmond.imageshack.us/Himg141...jpg&res=medium

الصاروخ الطائر

اما المشروع التالت والاكثر نضوجا فكان مستوحى من درس الصاروخ فى كتاب العلوم بتاع اولى اعدادى وهو عبارة عن صاروخ مزود بجناحات فى الجناب تضم وهو طالع ولما يجى يميل تتفرد وتبقى طيارة وترجع تانى زى المكوك وكنت مجهز التصميم ومدبر انى هجيب الصاج اللى هنعمل بيه الكابوت من مصنع قريب بيعمل عبوات سمنة تقريبا او جبنة معرفش اللى هى صفائح صاج كبيرة كده والبنزين الازم للصاروخ هنشتريه من البنزينة وكنت هجيب الواد عادل صاحبى الرخم يركب فيه اول مرة زى الكلبة لايكا واول اطلاق يبقى من فوق البلوك بتاعنا بس الموضوع كان محتاج تمويل ودعم فنى وده الاهم ومكانش فيه قدامى غير استاذ وليد مدرس العلوم وكان دايما بيشجعنى فى المزاكرة لدرجة انه كان بيخلينى اشرح للطلبة فقولت اكيد اكيد هيساعدنى فى المشروع ده

يتبع ،،،،،

http://a3.sphotos.ak.fbcdn.net/hphot...748_3550_n.jpg

http://a4.sphotos.ak.fbcdn.net/hphot...739_1242_n.jpg

الصور فى سن 11 و 12 سنة (5 ابتدائى - اولى اعدادى)

نسيت اقولكم انى كنت بحب الرسم جداً انا انقطعت عنه بعدين على اثر التزامى دينيا بس فى الفترة ديه كنت لسه برسم وعلشان كده رسمت سكتش للتصميم الصاروخ واخدت معايا كتاب العلوم صفحة الصاروخ وروحت لاستاذ وليد وزى ما قولتلكم كان بيحبنى وبيشجعنى دراسياً وعموماً كان محبوب من كل الطلبه لشخصيتة الكارزمية وخاصة بعد واقعة شهيرة كان بطلها لما قفش فيها حرامى كان داخل المدرسة ونزل ونزلنا معاه فيه ضرب لحد ما سلمناه للقسم

واثناء حصة العلوم وبينما استاذ وليد متبرم كالعادة ومنهمك فى تصحيح الواجبات قمت واستاذنتة وعرضت عليه الرسمة والفكرة وخدتنى الجلالة لحد ماااااااااااااخلصت
قالى طيب واخد من ايدى الرسم والكتاب وحطهم على الديسك وبس !!!
ديه كانت اخر حاجة ممكن اتخيلها
ياريته كان ناقشنى حتى لكن اهمالة لمشروعى كان مهين جداً ومستفز فى نفس الوقت
ومن ساعتها مبقتش احب استاذ وليد وان كنت فضلت احب مادة العلوم
اما عن المشروع فانا قررت اعملة بس كان لازم اشتغل
وفى ظل سفر الوالد والوالدة واقامتى مع جدى وجدتى وانتهاء السنة الدراسية (اولى اعدادى) كان سهل اقنعهم بفكره الشغل لكن الاصعب انى الاقى الشغل ده نفسه

حب ما تعمل لكى تعمل ما تحب

مكانش قدامى غير صاحبى الرخم عادل فى الحقيقه هو مكانش رخم بس كان تقليدى اوى وانا كنت بحب اغيظة وارخم عليه ففى الحقيقة انا اللى كنت رخم مش هو لكن هو كان فى الحقيقة جدع معايا جداً
المهم يا عادل عايز اشتغل قالى طيب انا شغال فى ورشة فى الحرفيين تعالى معايا
طيب والمرتب كام يا عادل
قالى ان المرتب بالاسبوع وكان ساعتها 20 جنيه فى الاسبوع
ضربتهم فى اربعة طلعو 80 جنية قولت ميه مية زى الفل خاصة ان زى ما فهمت من عادل باخدهم فى ايدى كاملين والاسطى اللى شغال معاه هيدينى مصروف يومى وانا مكنتش اكيل اوى واتخن اتوبيس كان بربع جنيه فكانت الحسبه ميه مية وافقت ونزلت معاه الشغل من اول لاسبوع

طبعا كنت فاكر ان الشغل فى الحرفيين يعنى عربيات وكده وفى الحقيقه مكانش فى دماغى عن الموضوع ده غير مقاطع الافلام بتاعة بليه والعذاب وطوله السان اللى ممكن اشوفها من الاسطى بتاعى وكان عزائى الوحيد انى هشتغل فى العربيات اللى بحبها وكمان هاخد فلوس كفايه اعمل بيها الصاروخ وبعد الاجازة اثبت لاستاذ وليد وللمنطقة كلها انى مخترع وعبقرى اجمد من عبقرينو نفسه

الحقيقه المرة

للاسف الورشة مطلعتش عربيات ،،، هى فى الحرفيين فعلاً وفى المبانى بتاعتها لكن دور فوق وشغالة ورشة جلود ،،، ايوه جلود طبعاً جلود ديه تحتمل شنط واحزمة وجزم كمان !!!

انا اشتغل فى ورشة جزم يا عادل انا اشتغل جزمجى !!! رد عادل بانها بتعمل شنط بس وبعدين فيها ايه جزم ولا مش جزم انت مش هتعمل حاجة غير انك تناول الاسطى اى حاجة وبس انت فاكر نفسك هتشتغل ايه وكل الشغل زى بعضه واعمل ما تحب حتى تحب ما تعمل !!

عجبتنى الكلمة بصراحة وقررت اكمل اليوم ولو معجبنيش مش هروح تانى
اليوم مكانش وحش كان مغامرة بالنسبالى ورشة وصنايعية وكل صنايعى ليه صبيان وجلود وسلوك واكسسوارت بتتحول بمهارة لشنط فخمة جداً وشيك جداً فى تناقض صارخ مع هيئه وحال اللى بيعملوها
بس بعد كده عرفت ان الاسطوات دول بيكسبو كتير بالافات فى الشهر بس هما اللى شكلهم كده !!
المهم يوم ورا التانى عدى وشوية شوية اخدت على الجو خاصة سفالة الاسطوات مع بعضهم والحمد لله انها عمرها ما طالتنى ولسبب ما كان الاسطى بتاعى بيحبنى وعمرة ما زعق لى او طول لسانة
لحد ما جه يوم السبت
يوم القبض
افتكر اننا اتذنبنا كذا سااااااااااعة بعد الشغل عقبال ما صرفولنا القبض
وده ضايقنى ساعتها اوى بس ما ان مسكت العشرين جنية فرحتى بيها نستنى خنقة الانتظار وشقى الاسبوع كله
مش فاكر بصراحة صرفتها فى ايه بالظبط لكن اعتقد انها اتصرفت ومحوشتش منها حاجة على عكس ما كنت مفكر بس قولت الاسابيع جايه كتير وهحوش
ومشيت الايام بعدها ممله اكتر لحد ما جه يوم كنت مخنوق فيه مش عارف من ايه وكان الجو حر جداَ
وكان فيه كولمان بنملاه من اخر الطرقة فى المبنى ونشرب منه طول النهار
روحت اشرب من الكولمان لقيته مش موجود سالت قالولى ان واحد من الصبيان راح يملاه
وانا كنت عطشان جداً فقولت اروح وراه واشرب
روحت فقابلتة فى الطرقة معاه الكولمان ومليان على اخرة وبيطرطش
ات يابنى اشرب
لاء لما الاسطى يشرب الاول
يابنى هات اشرب عطشان وبعدين ابقى وديه للاسطى
رد تانى بمنتهى الا مبالاه وهو مستمر فى المشى للورشة لاء لما الاسطى يشرب الاول
مش فاكر كررتها تالت ولا لاء بس انتهى الموضوع بانى ضربته وحميته بالكولمان
وسبت الشغل ...

يتبع ,,,,,