مصر موتورز مجتمع السيارات - شاركونا بالرأى فى مشروع رحلة العمر : مشروع رحلة عمره

بسم الله الرحمن الرحيم
اصدقائى أعضاء مصر موتورز
النهارده انا بعمل الموضوع دا علشان عايز اخد رأيكم فى رحله أو بمعنى أدق مشروع رحله ... اعتقد إنها هتبقى رحله مختلفة عن اى رحله عملناها فى المنتدى أو هنعملها بعد كده
هتبقى رحلة العمر

ومشروع رحلتنا دى هي

رحلة للعمرة

المشروع دا هيحكمه ضوابط وشروط تضمن لكل واحد فينا فلوسه وحقوقه
وبنود الرحلة دى المبدئيه كالاتى :-
1- يبدأ التنفيذ في مشروع الجمعية في الأول من ابريل 2012 والموافق 9 جمادى الأول 1433 هـ ولمدة 16 شهر ميلادي
2- تاريخ الرحلة هو العشر الأوائل من رمضان 1434 هـ الموافق عام 2013 م

والهدف من انها تكون فى الـ 10 الاوائل

ان تكلفتها هتكون اقل من الـ 10 الاواخر بحوالى 1000 ج على الاقل
دا غير ان العشر الاواخر هيكون فيهم زحام رهيب مش هيخلينا نستمتع بالرحله ونؤدى مناسكها ونتعبد لله على الوجه الاكمل

شروط الرحلة

1- سيتم الاشتراك بمبلغ ثابت يتم دفعه شهريا
2- سيتم الدفع عن طريق اليد أو احد الحسابات داخل البنوك أو داخل حساب فى البوسطه
3- سيتم اختيار 2 من الموافقين على فكره الرحلة ليكونوا مسئولين عن ما يتم دفعه أمام أعضاء الرحلة وسيكون الحسابات التي سيتم فتحها داخل البنك أو البوسطه باسمهم مجتمعين أو منفردين في مقابل أن يقوموا بإعطاء من قام بدفع الاشتراك الشهري إيصال أمانه يثبت حقه
4- يتم دفع الاشتراك في الأول من كل شهر ميلادي في الأماكن التي سيتم تحديدها وان قام احد أعضاء الرحلة بطلب الخروج من الاشتراك بالرحلة فمن حقه سحب جميع الاشتراكات التي قام بدفعها بدون خصم اى مبالغ ماليه ما لم يتم حجز التأشيرات في رجب 1434 هـ
5- من حق اى فرد الاشتراك بالرحلة في اى وقت أثناء المشروع بشرط أن يقوم بسداد قيمة كل الأشهر التي تعداها
6- من حق جميع المشتركين في الرحلة الاطلاع على اى رسوم أو مصروفات تم دفعها بواسطة أمناء هذا المشروع

طبعا الموضوع مش كامل وبنوده من نهائيه وكمان قيمة الاشتراك الشهري لسه متحددتش
انا بس حبيت أخد رأيكم في الفكرة
مع العلم اننا مش هنخلى بأى حال من الاحوال قيمة الاشتراك الشهرى تتعدى الـ 400 ج

ارجوا إنكم تشاركوني في رحلتنا برأيكم فيها وان كنتم مرحبين وعلى استعداد للاشتراك معايا في الرحلة دى ولا لا

وأخيرا

اشهد أمام الله وأمامكم أن هدفي من الرحلة ليس سوى كسب مرضاة الله عز وجل
وفقنا الله وإياكم إلى ما يحبه ويرضاه
منتظر تعليقاتكم وارائكم وكمان تصويتكم على الاستطلاع اللى فى اول الموضوع

والسلام عليكم ورحمة الله وبركاته