مشاكل بالجمله فى الاكسارا 1
 

تقريبا عربيتى اتحسدت !!!!!!!!
ومحدش يضحك من كلامى لانى موعود بالحسد

المهم خلينا فى العربيه

الكاسيت: زراير الاستيرينج كلها شغاله بس بتهيس يعنى تدوس على اللى بيعلى الصوت تلاقيه بيبحث فى الراديو وهاكذا كل الزراير الباقيه

حد حصل معاه الموضوع ده ؟؟؟ ويا ترى فى طريقه للريسيت للكاسيت مع العلم ان الكاسيت اول ما بيفتح بيطلب الرقم السري وطبعا انا عارفه وبستخدمه


ثانيا وده الاهم كنت نازل مشوار للفيوم اول امبارح واول ما وصلت سمعت زنه غريبه اول ما ادوس على الدبرياج الصوت يختفى

مستنيتش ولا دقيقه ورحت لميكانيكى هناك (شاطر بس محدش هناك متخصص ستروين خالص) قلتله المشكله قام مشيك على زيت الفتيس ملقاش فيه ولا نقطه طبعا انا مكنتش اعرف لانى لسه شاريها من شهر
المهم حطلها 2 كيلو زيت دريكسيون لقيت الصوت قل شويه وقالى لو حظك حلو الصوت ممكن يروح خلال يوم او اتنين بالكتير ولو مرحش يبقى الفتيس حصله حاجه وهاتستعوض ربنا وتغيره

دبرونى اعمل ايه ؟؟ مع العلم ان الصوت رجع زى الاول

ولو كلام الميكانيكى مظبوط الفتيس ده هايكلف كام ومنين واستيراد ولا جديد

اسف جدا على الاطاله تحياتى لكل الاعضاء اللى هايردو او حتى هايشرفونى بالمرور

رد: مشاكل بالجمله فى الاكسارا 1
 

ضرورى تحقق اتصال مع المالك السابق
اكيد فى سبب لاختفاء الزيت
تسريب مثلا
لازم توصل للسبب و هل ينفع علاجه ؟
ممكن يكون الصوت بتاع بلية الدبرياج و ممكن فعلا لا قدر الله الصوت من اجزاء الفتيس الداخلية

و لازم تسأله عن مشكلة الزراير هل حصلت معاه و لا اول مرة ؟
ممكن ببساطة تكون بسبب دخول رطوبة او مادة تنظيف عاملة تلامس
فان شاء الله حد متخصص يفك وش الزراير و يرش اكاى الازرق يمكن يجيب نتيجة

رد: مشاكل بالجمله فى الاكسارا 1
 

زي ما قالك الاستاذ احمد بالنسبه للزراير
فك الوش اللي فالدركسيون وطلع الكارته ونضفها
وافصل البطاريه ١٠ دقايق وركبها علشان تعمل ريستارت للسيستم
وانشاء الله يتضبط

بالنسبه للفيتيس انت الفيتيس عندك مانيوال ولا اوتوماتيك ؟؟؟
لو اوتوماتيك هيعمل استيراد حوالي ٢٠٠٠ جنيه
لو مانيوال هيعمل ٧٠٠ جنيه
بس انا ميال ان الموضوع من بلية الدبرياج اكتر
وانشاء الله يكون خير

رد: مشاكل بالجمله فى الاكسارا 1
 

فعلا انا لسه واحد صاحبي مغير فيتيس مانيوال ب650 وكمان كان معاة اسطوانه وديسك وكان حالته ممتازه وحس بتغيير رهيب وكان شاريه من والوكاله

رد: مشاكل بالجمله فى الاكسارا 1
 

الف شكر على الرد

هل ممكن يكون بتسرب زيت من غير ما الاقى نقط زيت تحت العربيه ؟؟
لانى بتأكد من الارضيه اللى تحت العربيه مش بلاقى حاجه

وان شاء الله هاوديها للميكانيكى بس السؤال لو طلع الصوت من بليه الدبرياج
هيه البليه ممكن تتباع لوحدها ولا لازم طاقم دبرياج كامل ؟؟؟