مصر موتورز مجتمع السيارات - مش عارفين راسنا من رجلينا

مصر موتورز مجتمع السيارات (https://www.masrmotors.com/vb/index.php)

- ثورة الحرية 25 يناير (https://www.masrmotors.com/vb/forumdisplay.php?f=177)

- - مش عارفين راسنا من رجلينا (https://www.masrmotors.com/vb/showthread.php?t=62119)

مش عارفين راسنا من رجلينا

إللى بيحصل اليومين دول خلانا مش عارفين راسنا من رجلينا
محدش يشكك فى وطنيتنا ولا فى تأييدنا للثوره .....كنا من اول الناس المؤيدين للثوره .
لما نشوف شويه بلطجيه رايحين يتهجموا على مسرح البالون ويكسروه ويكسروا العربيات إللى قدامه ....والناس تقول عليهم دول متظاهرين وليه الشرطه تقاومهم متسبوهم يكسروا فى أملاك الدوله ؟؟؟؟.

لما مجموعه مسلحه من البلطجيه تروح تهاجم وزاره الداخليه وعايزين يحرقوها.....والناس نقول عليهم دول متظاهرين وليه الشرطه تدافع عن وزاره الداخليه مكانوا سابوا المتظاهرين البلطجيه يحرقوها ؟؟؟...

لما شويه بلطجيه معاهم مولوتوف ويروحوا ميدان التحرير ويضربوا الناس بالمطاوى والمولوتوف وعايزين يكسروا المحلات والمنشئات العامه وتيجى الشرطه عشان تحمى المنشئات ويضربوها بالمسكاكين والطوب والمولوتوف .....الناس تقول عليهم دول متظاهرين وتقول ليه الشرطه بتدافع عن نفسها وتستخدم الغازات متسيبوا البلطجيه يضربوا الشرطه وهى الشرطه هترجع تدافع عن نفسها تانى ؟؟؟؟..

لما نلاقى شباب وحركات بيدعوا الناس للتظاهروالاعتصامات دفاعا عن الفوضى ودفاعا عن البلطجيه وعايزين يعملوا ثوره ضد الثوره ؟؟؟؟ ....أصبحنا مش عارفين راسنا من رجلينا .

رد: مش عارفين راسنا من رجلينا

كلامك مظبوط 100*100 يا دكتور والله واضح أوى ان دول من أعوان النظام السابق
الواحد فعلن محروق دمه على بلده والى بيحصل فيها انما أول مشفت الى بيحصل ده قولت مش ممكن الناس دى يكون وراها أشغال وأعمال واولاد عايزين يربوهم كويس

رد: مش عارفين راسنا من رجلينا

يا دكتور كمال الناس حاسه انها بيضحك عليها مفيش محكمات عادله والفلوس اللى بره مرجعتش وحكومة عصام شرف تحركتها بطى قوى
اهالى الشهداء حاسين ان دم ولادهم ضاع فين القناصه والظباط الى ضربوا المتظهرين بالنار فى كل المحافظات
ده غير رموز النظام القديم اللى كل واحد فيهم جايب اكبر محامين فى البلد
والمحامى فريد الديب اللى طالع يقولحسنى مبارك مكنش هيورث ابنه وحسنى مبارك اضحك عليه فى معركة الجمل وحسنى مبارك معندوش اى فلوس بره مصر وكل اللى عنده 6 مليون جنيه فى بنوك مصريه
يعنى شويه شويه هيبقا الشعب المصرى هوه اللى غلطان فى العصابه كلها
عايزين رئيس الورزاء كل اسبوع مثلا يطلع يهدى الناس ويوقلهم احنا وصلنا لفين وبنعمل ايه ويرد على اسئلة الناس
مش عيزين نعيدوا تانى تبقا الحكومه فى حته والشعب فى حته

رد: مش عارفين راسنا من رجلينا

واللى حصل فى التحرير اليومين اللى فاتوا نتيجة حل المجالس المحليه اللى هما اعوان واعضاء الحزب الوطنى المنحل

رد: مش عارفين راسنا من رجلينا

هو اى حد يعمل حاجه مش مضبوطه تقولوا من اعوان النظام السابق ايه يا جماعه هو النظام السابق كان مين ؟ كان انت وانى ومعظم الناس حاول تصلح نفسك اولا ومش كل مصيبه يقولوا عليها النظام السابق