مصر موتورز مجتمع السيارات - حل عملى لمشكلة انخفاض الالنترا

الاخوه الاعزاء بالمنتدى .تحيه طيبه وبعد..
فى البدايه امتلك عربيه النترا مانيوال موديل 2010 وعامل بيها تقريبا 40000كم.
انا واجهنى مشكلة انخفاض العربيه مع ركوب اكثر من شخص بالمقاعد الخلفيه,او مع تحميل العربيه.
وطبعا زى مانتوا عارفين مع وجود المطبات الجميله (طبعا هى بارتفاع الجبال الشاهقه)كانت العربيه بتتبهدل من الاحتكاك بيها ويا سلام لو انت بتنزل من منزل جراج اسمع يا جميل صوت الهبد واتحسر.
او لو ماشى على طريق مستوى بسرعه عاليه , والطريق حدث به انخفاضات مفاجئه نسبيا فى المنسوب (ظاهرة المطبات الهوائيه) اللى حيحصل ان المساعد الخلفى بينزل لاقصى مستوى له وتسمع صوت رزع شديد , طيب ايه العمل.
وبعد تفكير هدانى المولى عزوجل لفكرةازاى اقصر شوط المساعد الخلفى فى الانضغاط مع هبوط السياره , ورحت لعفشجى محترم وشاورته فى الفكره وقمنا بتنفيذ التالى:

فك المساعدين الخلفيين للعربيه.
شراء كاوتش مساعد لعربيه نصف نقل وعلى فكره التكلفه فى حدود 20 جنيه قيمة اربع كاوتشات قصيره (2 لكل مساعد)
قمنا بوضع الكاوتش اسفل الكاوتش الاصلى للمساعد .
ثم ارجعنا تركيب المساعد فى مكانه الاصلى.

ملحوظه هامه :انا لم اقم بتعلية العربيه حتى لا يؤثر على الثبات وبكرر مرفعتش العربيه من الخلف.

الفكره الرئيسيه انك تحاول تقصر مشوار او شوط انضغاط المساعد الخلفى وذلك عن طرق وضع الكاوتش الخلفى , حيث انه عند انخفاض العربيه من الخلف نتيجه للتحميل يحدث انضغاط للمساعد ناحية الداخل مما يؤدى لانخفاض جسم العربيه ومن ثم يحدث الاحتكاك ووجود الكاوتش يساعد على وجود عائق انضغاط اى لا ينضغط المساعد بالكامل .

الموضوع بسيط جدا وجملة التكلفه 20جنيه ثمن 4 كاوتشات المقاس الصغير +30 جنيه مصنعيه.
النتيجه النهائيه انك لو مش محمل العربيه ومش معدى على مطبات العربيه حتكون زى الحلاوه ولا يظهر اى تاثير لكاوتش الصدادات الخلفى.
وفى حالة التجميل او انك بتجتاز مطب يقوم كاوتش الصدادات الخلفى بتقليل شوط انضغاط المساعد ولاتالى عدم احتكاك العربيه.
الخلاصه وبعد التجربه يفضل وضع عدد 1كاوتشة صداده بكل مساعد وليس عدد 2 بكل مساعد جتى لا يؤدى ذلك لان العربيه تتنطط على السرعات العاليه بشكل حتى لو بسيط.
سمعت انه هناك انواع من كاوتش الصدادات من الاسفنج المضغوط وده حيكون افضل لليونته وعدم قساوته ولو انى جربت كاوتش صدادات من اللى بيركب للعربيات النصف نقل(الدبابه) وبصراحه ممتاز والعربيه لم تعد تحك نهائيا بأى مطب.
وبكده تكون حليت المشكله باقل تكلفه .
وطبعابدون ما تعلى العربيه وتجيب ييات وسوست اعلى مما يؤثر على الثبات.

ارجو ان اكون قد افدت وهذا من واقع تجربتى والله ولى التوفيق.