مصر موتورز مجتمع السيارات - مقارنة بين لانوس و أفيو , على قدي

السلام عليكم , هحاول أقارن بين العربيتين من حيث تجربتي ,أنا سقت العربيتين و جربتهم , و في ناس كتير محتارة ما بينهم هحاول على قد ما أقدر أقارن بينهم هنا حسب تجربتي فيهم

هو أول حاجة لازم نعرف ان عالميا الأفيو حلت محل اللانوس في 2002 تحت اسم دايو كالوس بعدين لما اتقلبت شيفرولية بقى اسمها أفيو , زي ما اللاسيتي بقى اسمها اوبترا كدا

الجيل الأول من الأفيو كان من 2002 ل 2006 و دا كان شكلة

http://upload.wikimedia.org/wikipedi...atch_front.jpg

بعدين نزل الشكل الجديد ال هو متوافر دلوقت من 2007 لحد 2011 و دا ال هنقارنة باللانوس و دي صورتة ال كلنا عارفنها

http://upload.wikimedia.org/wikipedi...Aveo_sedan.jpg

أول حاجة لما أي حد ييجي يقارن هيقولك الزاي تشتري عربية حلت محل عربية تانية انت مجنون ؟ و بجيلين اتنين كمان ؟ هو ينفع تشتري كورولا 2000 بدل واحدة 2010 ؟ , لكن هنا الوضع مختلف لان لو قارنا بين اللانوس و الأفيو هنلاقي الاتي :

أولا بالنسبة للماتور اللانوس ماتورها 1498 سي سي و 86 حصان , الأفيو الماتور هو هواة 1498 سي سي لكن عدد أحصنة أقل 83 حصان , و دا معناة ان ماتور اللانوس أقوي , طبعا دي مهزلة لكن الوكيل حط الماتور الضعيف دا قاصد عشان انتشار العربيتين

بالنسبة للتسارع اللانوس تتسارع من الثبات لل100 كيلو في 12.5 ثانية , لكن الأفيو تتسارع في 12.1 ثانية بس , تقريبا فرق لا يزكر

السرعة القصوى لللانوس 180 كيلو في الساعة , لكن للأفيو 177 , بردو فرق لا يزكر عشان تقريبا الماتورين واحد

بالنسبة لتجربة القيادة أنا سقت اللانوس و نزلت بيها على الطريق الدولي ال ف اسكندرية , الماتور كسول أوي , أو ممكن تقول علية تلم , عمال ادوس و ادوس و العربية بتسرع براحة , لكن الكلام في ال ار بي ام الواطي بعد كدا لما ال ار بي ام وصل ل 2500 لقيت العربية بتطير بسرعة و انطلقت و حسيت ان الماتور قوي جدا و انة مستحيل 1500 بس , الطريق كان فاضي و يسمحلك تجري فضلت طاير أشوف العربية سرعتها كام و عديت ال 160 و كنت لسا بادوس أشوف اخرها كام , وصلت أخيرا ل 180 , لكن هنا مفيش خمس أو ست ثواني و شميت ريحة شياط جامدة أوي ف خفت و بدأت أفرمل

و هنا لازم أنوة لحاجة , أوعى تجري على الطريق السريع غير و انت حافظة صم و بتمشي فية كل يوم و عارف كل حاجة فية , مش مثلا تمشي فية مرة في الشهر ولا حاجة , و في التأني السلامة

معلش خرجت من الموضوع , المهم على 180 بدأت أفرمل , وهنا أنوة ان فرامل العربية وحشة جدا و ضعيفة , مش قوية انها تعرف تكتف العربية , فضلت أكارك عالفرامل يجي 20 مرة لحد ما السرعة خفت لكن الفرامل سيئة

بالنسبة للأفيو الوضع مش يختلف كتير , مع العلم ان أقصى سرعة مشيتها بيها كانت 130 , لكن الأفيو أريح بكتير في السواقة و دا عن تجربة , و ممتعة أكتر و أوسع

فرامل الأفيو أفضل من اللانوس , و ان كانت الفرامل مش ممتازة

بالنسبة للعلو عن الأرض السيارتين عاليين , لكن الأفيو أعلى بسنتيمترات قليلة , عامة كل العربيات التقفيل المصري بيراعوا فيها مسألة العلو و بيخلوها عالية عشان تناسب المطبات

قدرة السيارتين عالمناورة في السرعة العالية ممتازة

على السرعة العالية السيارتين غير ثابتين بالمرة , الثبات سيء , لكن في اللانوس أنا حليت المشكلة دي بتركيب جنوط سبور كويسة للعربية و كانت العربية ثابتة مني أوي حتى على 180 , أما بالنسبة للأفيو فمش عارف حل المشكلة دي اية , عشان مفتيش

بالنسبة للشكل فا دي مسألة أزواق أولا و أخيرا , لكن كرأيي الشخصي أنا ركنت الاتنين ورا بعض و قارنت , الأفيو أضخم و أوسع , جمبها اللانوس مختفية شوية , في رأيي الأفيو أحلى

بالنسبة للكماليات اللانوس بتيجي معاها كماليلت زيادة عن الأفيو و هي الفوج لايت , و ال 4 شبابيك بالكهربا

الأفيو بتيجي من غير فوج لايت , و الازاز ال قدام بس هو ال كهربا , و دي مش مشكلة ممكن تشتري فوج لايت و تركبة , و هنا أنوة انك تشتري بتاع الكروز , و ازاز الكهربا ال ورا حلة بسيط ممكن تشتري مكنة ب 75 جنية و تركبة

من جوا الأفيو أحلى بكتير , و زي ما قلنا انها 2007 يعني تابلوهها تصميم جديد و عصري , و أحرجت العربيات ال أغلى منها

اللانوس من جوا شكلها تقليدي , تابلوة تصميم 1997 و متغيرش من ساعتها

الأفيو أوسع من جوا

التكييف في السيارتين أقل من المتوسط , و لا أنصح بتشغييلة اثناء القيادة

استهلاك البنزين ممتاز في العربيتين , و ان كانت اللانوس تستهلك أقل من الأفيو

الشنطة كويسة في العربيتين لا واسعة ولا ضيقة

صوت المحركين مش عالي , لكن الأفيو أهدى شوية , اللانوس تحس ان الماتور قاعد عالكرسي ال جنبك , و ان كان مش مزعج لية زنة معينة كدا هتاخد عليها

سواقة الأفيو أريح بكتير , الباور ستيرينج في العربيتين كويس

الرؤية الخلفية في اللانوس هتتعبك شوية عشان الشنطة عالية و الازاز ال ورا صغير ,الرؤية الخلفية افضل في الأفيو

صاج العربيتين ضعيف أوي , و الأفيو فيها عيب انة من أقل حاجة كلبسات الاكصدام الادماني بيقع

يمكن من المقارنة نشوف تفوق نسبي للأفيو , لكن اللانوس تتفوق في السعر بكتير اللانوس الكاملة ب 69000 , الأفيو 78000

و في الاخر احط صورة للانوس عشان مبقاش ظلمتها

http://rtoosh.com/up/images/rl1sb1jstcbfjy9146f.jpg

و الله الموفق و اتمنى كل ال يقرا يستفاد