عاوز أزيل بقايا لصق الفاميه من على زجاج السيارة
 

السلام عليكم / وانا برخص فى المرور خلونى أشيل الفاميه من على الزجاج و بقايا اللزق مش عاوزه تتطلع من على الزجاج ومخليه الزجاج كأنه مصنفر ياريت لو حد يعرف طريقة سهلة ومضمونه أنظف بيه الزجاج يقولى

رد: عاوز أزيل بقايا لصق الفاميه من على زجاج السيارة
 

ممكن تنضفه ببنزين بس حيتعبك شويه
او روح لاي واحد بتاع كماليات حيعملهولك

رد: عاوز أزيل بقايا لصق الفاميه من على زجاج السيارة
 

عندي ليك حل تافه جدا

تكلفته تكاد تكون معدومة

مضمون

مجرب قبل كده الف مره

اثاره السلبية لا توجد

طريقه ولا أسهل

أي خدمة

بص يا سيدي روح عند اي مكتبه وجبلك كاتر من ابو تلاته تعريفه ويفضل يكون من العريض مش الرفيع عشان ما تعاورش ايدك وده المهم

شوية ماية في قزازة بخاخة يا اما جلانس ولو مافيش سفنجة فيها ماية وصابون
امسح المنطقة اللي عاوز تشيل بقايا الفاميه اياكش يكون معتق على القزاز بقاله سنين ، المهم بله كويس مش لازم تغرقه يعني ،،،
طلع الكاتر ( السلاح ) من الغلاف البلاستيك بتاع الكاتر نفسه ، يعني استخدم السلاح بس وامسكه بحيث يكون على المايل ويكون كله ملامس القزاز وابتدي اكحت يا معلم في اتجاه واحد كانك بتكشط مع الضغط البسيط ، حتلاقي مع مره واتنين بتظبط ايدك وحتلاقي كل الكلام ده بيتشال ،،، ما تقلقش القزاز مش حيتجرح لانك مش بتحز فيه والماية والصابون عشان تسهيل عملية التنظيف وعشان انزلاق الكاتر على سطح القزاز ، في ثواني حتلاقي الدنيا رجعت تنور تاني
وتحياتي ليك

رد: عاوز أزيل بقايا لصق الفاميه من على زجاج السيارة
 

الحل السحري الذي لا يعرفه الكثير من الناس هو " البيروسول"
جرب و ادعيلي

رد: عاوز أزيل بقايا لصق الفاميه من على زجاج السيارة
 

ألف شكر استاذ حاتم وكل من شارك معى أنا جربت طريقة استاذ حاتم والزجاج نظف وبسهولة بس كان فيه شوية قطع صغيرة أوى نظفتها بعد كده ب WD40 على قطنه والزجاج بقى مرايا ألف شكر وربنا يبارك فيك