مصر موتورز مجتمع السيارات - مساعدة يا جماعة بعد ازنكم 0000للخبراء فقط

مصر موتورز مجتمع السيارات (https://www.masrmotors.com/vb/index.php)

- أطقم الصوت والمالتى ميديا (https://www.masrmotors.com/vb/forumdisplay.php?f=125)

- - مساعدة يا جماعة بعد ازنكم 0000للخبراء فقط (https://www.masrmotors.com/vb/showthread.php?t=41881)

مساعدة يا جماعة بعد ازنكم 0000للخبراء فقط

بسم الله الرحمن الرحيم

معلش يا جماعة انا عايز مساعدتكم ضرورى انا عندى سيارة رينو لوجان و كنت عايز اظبطها شوية فرحت لكذا واحد وبعدين قالى انا عندى صب و ماسورة البازوكا مستعمل بس شكلة نضيف اوى ب 400 جنية و دى صورة الصب بس انا اخدها بصراحة من موضوع تانى فى المنتدى

http://photos-c.ak.fbcdn.net/photos-...57762_4027.jpg

انا قصدى على البايونير السوداء و قالى جديدة 400 جنية من غير الماسورة بتاعت البازوكا المهم قالى كمان انا ممكن اجيب لك جى ام 700×2 ب 400جنية مستعملة و جديدة 600جنية فقولتلة طب انا عندى كاست سونى 9100 و صورتة اهه

http://www.m5zn.com/uploads/2010/12/...voam1s8qt8.jpg

فقالى هو حلو بس هيتركب لك جهاز ورا مع العدة اسموا تقريبا grd مسئول عن انو يعلى صوت الكاست علشان يتناسب مع العدة بيتظبط على نمط معين و يتساب ورا مع العدة حسيت انوا عك كتير و حسين انو بيستغلنى فسبتة و رحت لواحد تانى

و قالى ان انا عندى صب مضغوط 1000وات ب 400 جنية جديد بس مش معاة ماسورة البازوكا دى صب لوحدها كدا و هركب لك 4 سماعات 400 وات -- الاثنين بس ب 380 جنية و دى صورت السماعة

http://img812.imageshack.us/img812/3...oneer11jpg.jpg

فقلتلة طب السماعات ال450 وات مينفعش اجيب منهم و كدا على اساس الصوت يكون عالى راح قايلى ان ال450 وات دى تكون صيتى مش تايلندى
و هجيب لك جى ام 2000 وات يشغل كل اللى انت ناوى تركبة و زيادة كمان ب 800 جنية (what)

بس بصراحة شديدة انا مش عارف افكر خالص الاسعار غالية عن الاسعار اللى موجودة فى الموقع بكتير فانا مش عارف بقى فى حد ممكن يفيدنى فى تظبيط طقم صوت كويس وعلى فكرة انا من بورسعيد لو فى اى استفسار انا موجود انا مش عايز اعمل مهرجان بس الصوت عندى يكون قوى يعنى ممكن
4 سماعات حلوين و صب زى اللى فوق دا 1400 وات و جى ام يشغلهم و خلاص
معلش كمان الكاست دا حلو ولا ابيعة و اجيب جهاز تانى و نوعة اية

معلش بقى طولت عليكم اوى بس
انا اسف
بصراحة انا تعبت

لو فى مثلا عروض باسعارها يكون كويس بس يا ريت ميعديش 1500 جنية

ولكم جزيل الشكر

رد: مساعدة يا جماعة بعد ازنكم 0000للخبراء فقط

هو الراجل الأولانى كلامه مكانش بطال, كنت فاصلت معاه شوية بس فى الأسعار وركبت العدة عنده.

والجهاز اللى بتتكلم عليه متهيألى قصدك ال DSP, كنت خدت منه الأمبليفاير والصب وتيوب البازوكا بس وركبتهم وريحت دماغك.

الصب لوحده تمنه فى حدود 400 الى 370 حسب المحل والفصال, .

أما تيوب البازوكا فتمنه جديد حوالى 120 جنيه, وفيه أرخص بصناعة أردأ.

الصب ده دبل كويل, بالتالى ممكن توصله بطرق كتير على أى جى أم, ممكن يتركب على جى أم 2 قناة أو جى أم 4 قناة أو جى أم 1 قناة ببريدج, أو أو أو.

فممكن تركبه على جى أم 600 كينوود 2 قناة مبدأيا, بس التوصيلات كتير ومحتاجة فهم لأنظمة الصوت ومفهوم الأوم والوات لو حضرتك اللى هتركب.

أما الكاسيت فهو حلو مافيهوش مشكلة.

والسماعات لو هتركب على الكاسيت 400 وات كان كفاية أوى وكتير كمان, لو هتجيبلهم جى أم لوحدهم زود براحتك, بس هات جى أم مناسب ليهم.

ممكن بدون وجع دماغ تجيب بازوكا jbl مستعملة, وأمبليفاير 350 كينوود وتشغلها عليه مبدأيا, والموضوع هيتكلف حوالى 600 جنيه بالأمب, وأمبليفاير تانى زيه برضه أو 600 أو 400 وات وتركب عليه طقم السماعات ال 450 وات وتبقى عملت فرح ب 1500 جنيه.

بالنسبة للموضوع اللى فى دماغك, الصب جديدة قول 380 وتيوب البازوكا جديد قول 120 يعنى 500 جنيه, وأمبليفاير 600 كينوود يبقى 700 جنيه تقريبا كمان, يعنى حوالى 1100 جنيه.

وطقم السماعات ال 400 على الكاسيت 380 جنيه كمان, وتبقى الفلوس خلصت.

أبدأ بداية بسيطة, وهات حاجة حاجة مش لازم كله مع بعض, نصيحتى هات السماعات ال 4 مع أمبليفاير 4قنوات نضيف وهتسمع صوت ممتاز, وبعد كده فكر فى البازوكا والصب, ولا أنت عايز تسمع بيز بس.

وأنا ممكن أقترح ب 1500 جنيه نظام, وشخص تانى يقترح نظام, وكل واحد ودماغه, متستعجلش بس ودور وأتفرج براحتك, وبأذن الله هتجيب نظام كويس.

رد: مساعدة يا جماعة بعد ازنكم 0000للخبراء فقط

هى اطقم الصوت زى الصب و الجى ام و البازوكا و السماعات لما بتكون مستعمله اعرف ازاى انها كويسه ؟ انا اعرف ناس بيجيبو حاجات مستعمله بأسعار جميله بس انا مش عارف اضمن الحاجات دى ازاى و ازاى اعرف اذا كانت كوبسه ولا لا

رد: مساعدة يا جماعة بعد ازنكم 0000للخبراء فقط

اقتباس:

المشاركة الأصلية كتبت بواسطة ahmed-casper (المشاركة 305378)

هى اطقم الصوت زى الصب و الجى ام و البازوكا و السماعات لما بتكون مستعمله اعرف ازاى انها كويسه ؟ انا اعرف ناس بيجيبو حاجات مستعمله بأسعار جميله بس انا مش عارف اضمن الحاجات دى ازاى و ازاى اعرف اذا كانت كوبسه ولا لا

دى خبرة مكتسبة ياكبير, السماعات مثلا بتبص عليها تشوف حالتها الخارجية, وتفحص الرق بتاعها كويس جدا هو والمطاط اللى ماسكه, ولو أكثر من "واى" بتفحص كل سماعة فيها, وبعدين بتبص على الأسبيدر اللى ماسك الرق من تحت (القماش المدرج ده), وعلى أقطاب السماعة, وطبعا تجربها تشوفها بتوش ولا لأ وتهزها وأنت مشغلها, وكل ده وبرضه ممكن تتخم فى السماعة.

الجى أم بتفحص الجسم بتاعه من بره كويس, وتبص على المسامير تشوف فى عليها أثار تجريح علشان تعرف الجهاز أتفك قبل كده ولا لأ, وتبص على القنوات بتاعته والمداخل اللى هيركب عليها السلوك وتشوف حالتها أيه, وهل فيها مسمار ناقص ولا لأ, وبتشوف الفيوز متغير بسؤال صاحب الجهاز, وتجرب الجى أم وتعلى وتوطى, وتشوف الصوت اللى طالع منه حالته أيه, وتهزه شوية وأنت مشغله علشان تعرف متلصم ولا لأ, وتسيبه شغال حوالى نص ساعة لو تقدر علشان تشوفه هيسخن ولا لأ.

البازوكا نفس حوار السماعة, بس بتبص على التيوب بتاعها وتفحصه كويس جدا, وعلى الأقطاب الللى السلك هيتوصل بيها.

وقبل أى حاجة بتختار اللى هتشترى منه, يعنى عضو هنا مثلا مشاركاته 1500 عارض بازوكا للبيع, لو كانت وحشة مكانش عرضها علشان سمعته فى المنتدى.

أو تشترى من تاجر معرفة سواء عائلة أو أصدقاء, أو حتى محل ليه سمعته.

وطبعا على قد ماتقدر أبعد عن مصراوى والحاجات دى بتاعة لقاءات المرة الواحدة, لأن لو حاجة بايظة تبقى أتدبست خلاص ومش هتعرف تعمل حاجة.

رد: مساعدة يا جماعة بعد ازنكم 0000للخبراء فقط

تسلم يا جميل . بقوللك ايه انا الكاسيت بتاعى ٤١ وات . و عايز ٤ سماعات مدورين صغيرين و مش هجيب جى ام اجيهم كام وات علشان محطش فلوس عالفاضى