|
مشكله رعشه في السلانسيه ومش لاقي لها حل ....ارجو المساعده
السلام عليكم شباب المنتدي المحترمين انا عندي مشكله ان العربيه فيها رعشه او تنهيده منتظمه كده علي السلانسيه وهو علي ٨.٥ ار بي ام وغلبت معاها ومع الصنايعيه كلهم كمان لما بشيل رجلي مره واحده من علي البنزين العربيه بتنطر . المهم هديلكم شويه معلومات عن العربيه يمكن تسألوا عليها العربيه ستروين اكسارا ٢٠٠١ انجكشن مانيوال العربيه ماشيه ٢٥٠ الف كم العربيه مش مسجله اي حساس بايظ عالكمبيوتر لما بفصل حساس الشكمان الموضوع بيختفي -فغيرت حساس الشكمان والموضوع زي ما هو -غيرت بوجيهات وكل الفلاتر -نضفت البوابه والايديل -نضفت الرشاشات واختبرتها -العربيه مش بتطلع اي دخان او غيره -العربيه سحبها ( انا شايفه ) كويس جدا بالمقارنه بعربيات تانيه سقتها يعني الخامس بيجيب ١٨٠ والاربي ام علي ٥٣ تقريبا طقم الدبرياج لسه جديد مغيره الشهر اللي فات وعامل ضبط تاكيهات المشكله ان كل الميكانيكيه مش عارفين العيب كل واحد بيجرب يقولك غيرلي كذا ويشوف لو مش هو وماله غير كذا ماهو مش دافع حاجه اخر واحد قال نغير حساس الماب ونشوف بس انا مش هغير حاجه تاني غير لما اكون متاكد العيب منها ارجو المساعده من الاخوه الخبراء في الموضوع ده وياريت تفيدوني بآراكم ايه ممكن يسبب مشكله زي دي وهل حساس الماب بيتنضف ؟؟ وهقولكم برده خلفيه ميكانيكيه كده عن العربيه يمكن يكون ليها علاقه العربيه كانت بتاكل زيت خفيف والميكانيكي قاللي نغير طقم الشنبر رغم انها مكانتش بتدخن وسحبها زي الفل وانا طاوعته وغيرته وبرده لسه بتاكل زيت خفيف (what) والعبقري ( الميكانيكي ) قاللي لأ الأول ده كان اكلان لاكن دلوقتي بخر طبيعي والدليل ان كبس موتورك زي الفل ومافيش اي دخنه او بخار من خرطوم الفايظ طاب ماهي كانت كده برده قبل ماتفتح الموتور يابنـ.... الحمد لله انا برده الغلطان علشان اديته ودني وقلت ماستخسرش فالعربيه وسحبني وهو شغال في ان الفيتيس فيه غويشه واحسن نغير الفيتيس طالما فاكين طاب ماتغير الغويشه يقوللي لآ هات فيتيس استيراد احسن يفك الفيتيس يقوللي الاسطوانه ناعمه شويه نغير طقم دبرياج .....حاضر وهوا ماجاش خالص نحية وش السلندر هوا بس نضفه شويه من الكربون المتراكم عليه من ناحية غرفة الحريق لاحظت حاجه مش عارف ليها علاقه بالموضوع ولا لأ انا فكيت البوجيهات امبارح اكشف عليها لاقيتهم مش زي بعض يعني واحد فيهم نضييف اوي واتنين حواليهم شوية هباب وواحد نضيف بس معرق زيت مش علي الشمعه بتاعته لاكن فيه لمعة زيت عالقلاوظ بتاعه لاكن من تحت ناشف بلاحظ ان المياه بتاعت الرداتير بتنقص شويه مش عارف ده ليه علاقه بالموضوع ولا لأ كمان قريت هنا موضوع مشابه لمشكلتي لزميل وكان علاجه انه غير وش السلندر المهم بصراحه صرفت كتيير واتعلمت ومش عايز اتمرمط تاني ومستني آرائكم ومستعد اجرب اي حاجه تقولوا عليها وابعتلكم الصور لو عايزين ( مش بقولكم اتعلمت ) HUUM وده عندي افضل الف مره من اني اروح لواحد يشتغلني وانا اصلا متعلم وبفهم احسن منه ولكم مقدما جزيل الشكر والاحترام |
رد: مشكله رعشه في السلانسيه ومش لاقي لها حل ....ارجو المساعده
أنا بأحييك على عرضك الرائع لمشكلتك
ومشكلتك قادمه من دورة الأشعال فيه حاجه عندك غلط فى دورة الأشعال فياريت صور للبوجيهات وللبوبينا ولل أسبراتير أن وجد وياريت برضه تكون غيرت كابلات ( سلوك ) البوجيهات من قبل ( أن وجدت عندك ) اقتباس:
فحساس الماب دوره مش أوى وقت السلانسيه ويكاد يكون غير مؤثر على الاحمل ( السلانسيه ) |
رد: مشكله رعشه في السلانسيه ومش لاقي لها حل ....ارجو المساعده
عاوزك برضه تقوللى بوجيهاتك الأصليه نوعها أيه
ومركب حاليا نوع أيه بالأرقام والحروف إللى بتكون على البوجيهات |
رد: مشكله رعشه في السلانسيه ومش لاقي لها حل ....ارجو المساعده
بصراحة اول مره اشوف استجابه سريعة من حد كده
وخصوصا شخص في خبرتك ..... الف شكر انا هصور لحضرتك البوجيهات بس يوم الجمعه لاني بروح من الشغل بتكون الدنيا ليل وعايز اصورلك كل حاجه فالسكة وانا ماعنديش اسبراتير ولا البوجيهات ليها سلك هوا فيه مسطره سوداء كده نازل منها ٤ صوابع كاوتش فيهم من جوا سوست والمسطره دي واصله بفيشه المشكله اني مش عارف الدينامو فين بس هسأل وصوره لحضرتك |
رد: مشكله رعشه في السلانسيه ومش لاقي لها حل ....ارجو المساعده
اقتباس:
صورهم دلوقتى وورينى حريقهم وهات بياناتهم وبيانات البوجيهات الأساسيه ( إللى كانت موجوده قبل دى ) أن أمكن اقتباس:
وكده أنا قربت أتعرف على نظام الأشعال عندك اقتباس:
طبعا المكان ده ملوش دخل بالرشاشات لأن فيه كمان حاجه أسمها ( مسطرة رشاشات ) فهل المسطره إللى عليها أربع صوابع كاوتش وفيهم من جوه سوست تحت كل صباع بوجيه من البوجيهات ولا لا |
| الساعة الآن 10:11 AM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017