|
مساعدة ضروري من عصابة الرينو
أولا ارسل سلامي لأعضاء منتدي الرينو وارجو منهم مساعدتي في الإختيار فمعي مبلغ 37 الف وعايز اشتري السيارة الأولي ليا وبحب الرينو كليو وممكن بالمبلغ ده اشتريها بس فيه ناس كتير قوي مخوفاني منها وبتقولي هات لانوس وان فرجاء سرعة الرد عليا لأني لازم اخد قرار خلال الشهر ده ودمتم بخير |
رد: مساعدة ضروري من عصابة الرينو
اهلا بيك يا استاذ احمد معنا هنا فى المنتدى وعاوز اقولك ان الكليو عربية محترمة جداا واقتصادية ومتينة من الدرجة الاولى
ولو انت عاوز تركبها بالمبلغ الى معاك ممكن اوى بس ها تكون مانيوال وعاماا حاول تدور على واحدة نضيفة ومش متهانة ومعمولها صيانة دورية او مايثبت كدة وان شاء الله العربية دى هاتريحك اكتر من الانوس لانها اكبر واقتصادية فى البنزين وبقت كل الناس بتعرف تشتغل فيها وقطع غيارها موجودة كتيير ( بس مش زى الانوس ) بس العربية حاجاتها معمرة اكتر من اى عربية كورى وحمالة اسيية كمان بس حضرتك تحافظ عليها وتعملها صيانتها على طول هاتلاقى العربية فلة منورة على طول معاك والف مبروك مقدماا ptmnlo123per122 |
رد: مساعدة ضروري من عصابة الرينو
الف شكر يا استاذ محمد علي ردك والصراحة انا بفكر بجد اجيب الكليو وانفض شوية لكلام الناس اصل العربيات ازواق
|
رد: مساعدة ضروري من عصابة الرينو
انا اشتريت كليو 2003 من 3 شهور بعد دراسة مستفيضة ومتأنية وعمل مقارنات بينها وبين انواع أخرى من السيارات فى نفس السعر ومنها اللانوس
والله العظيم عربية تحفة تحفة انسى البنزين خاااالص بتمشى ع الريحة سحبها زى الصاروخ مع انها 1200 cc فراملها باللمس بتكلبش فى الأرض عمرى ما شفت فرامل بالجمال ده عالية عن الأرض عمرك ما هتحك فى مطب حتى لو محمل ع الآخر بالشنطة قعدتها مريحة تكييفها تلاجة بجد قطع غيارها رخيصة جدا جدا ومتوفرة شنطتها واسعة جدا جدا جدا صوت الموتور نااعم وهادىء التسارع والتجميع كويس جدا الثبات هائل على السرعات العالية يعنى 120 مثلا كانى العربية مش ماشية اساسا بتحس انها مكلبشة فى الأرض بطريقة عجيبة لو انت عايزها جوة البلد ممتازة وموفرة جدا فى البنزين اللتر يعمله 12 كم ولو عايز تسافر بيها حمارة شغل مثلا على سرعة 120 بيكون ال rbm على 3500 لفة تقريبا أو اقل لأن الموتور 2 كامة و16 صمام والله بدون تحيز لو رجع الزمن من 3 شهور برضه هاجيب كليو |
رد: مساعدة ضروري من عصابة الرينو
الكليو ثم الكليو ثم الكليو .....انا لسه شاريها من أسبوع بالظبطت ومفيش كلام زياده كلام الأستاذaklmohamed بجد عربيه تحفه وسحبها عالى وموفره جدا فى البنزين والثبات مفيش بعد كده ماشاء الله عربيه زى الفل ......توكل على الله ومش حتندم
|
| الساعة الآن 08:07 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017