اغيثونا يا ولاد البندر فى جوان وش السلندر
 

اغيثونا يا ولاد البندر فى جوان وش السندر
حكايتى مع اصلاح مشكلة جوان وش السندر وسخونة العربية
من تأفيزة الجزمة والشراب لاسعار قطع الغيار والمصنعيات والحساب


اصحابى واهلى وخلااااااااانى انا عايز اخودكو فى احضااااااااانى
:funny25:
واعيييييييييييييييييييييي يط :sd:
:sd:
وحشتونى جميعاً ووحشتنى لذة كتابة المواضيع والحكاوى
وانا كنت ناوى فى العيد ده اقضيه كله معاكو على المنتدى ومجهزلكو مواضيع وتجارب وحاجات كتير بس قدر الله وماشاء فعل والعربيه قبل العيد باسبوع عملتها معايا وجابت جوان وش سلندر ولقيت نفسى قدامى حكاية تانية جديدة لسه بتبدى

الحكاية كلها بدات قبل العيد باسبوع كدة او عشر ايام اذ فجاءة لقيت العربيه سخنت :090104~384:
العربيه : ديهاتسو تريوس - اللى هى برضو التويوتا راش toyota rush

نزلت اتعاملت معاها وكملت المشوار وبعدها بدات الاحظ اثار الطحينة فى المية الاول وبعدين فى الزيت :36_2_16: يعنى جوان رسمى فهمى نظمى وشغلانة وداخل عليا عيد :shwt:
تعمل ايه يا عبد الرحيم تعمل ايه يا عبد رحيم :F_14WA~16[1]:

قولت اركن العربيه على كدة واعدى يومين زحمة العيد دول وبعد العيد فى الروقان ابقى اشوف اللى فيها
:thinkW19:
ونصيحة لاى حد فى موقف مشابه انه يعمل كدة علشان يترحم من زحمة المواصلات (زحمة عيد ومن غير عربية ) مابين الورش وقطع الغيار والانتهازيين بيبقى ده موسم بالنسبالهم BOXBOX
والاهم انه يستلم براحته ويجرب براحته ولو فيه حاجة يرجع تانى يعملها براحة راحته لكن الصربعة MADDRIVE والتسرع ده عمرة ما يساعد فى حل مشكلة كبيرة فى العربيه زى كدة وغالباً هتلبس زى ما حصل معايا :w6w200504112235376e

نرجع لموضوعنا وحكاية الجوان وياترى ايه السبب فى السخونية والجوان وطبعاً زى اى مصرموتورزاوى قديم كان لازم ابداء احكى واخد اراء الزملاء فاحد الزملاء صاحب مركز خدمة عرض على اعمل العربيه عندة ونلمها قبل العيد وقالى الموضوع مش مستاهل ومش هياخد اكتر من يوم شغل والتكاليف هتتلم والدنيا فى منتهى البساطة
شكرته طبعاً وكلامة خلانى افكر تانى
لسه فاضل اسبوع على العيد ولو الموضوع اتلم فى يوم وفى مركز تبعنا كمان يبقى زى الفل كدة هعوز ايه تانى :funny25:

بس فيه مشكلة ديه تريوس مش كيا برايد ولا دوجان يعنى حل المكنة حوار برضو ومش اى ميكانيكى يشتغل فيها فاتصل بصديقى تانى وسالته عن مدى تمكن وخبرة الميكانيكى بتاعة :fun_7_5_128[1]:

تررررن ترررررررن الو ايه يا باشا ايه الاخبار .. تمام الحمد لله .. معلش سؤال قبيح يا باشا .. اتفضل يا باشا قبح براحتك .. الا الميكانيكى اللى حداكو ده بيفهم ولامؤاخذة ولا اجيب الميكانيكى بتاعى معايا :w6w200504112239346e

قالى عيب عليك ده ميكانيكى بريمو ولا على قديمو ده حتى لسه من يومين كان حالل مكنة تريوس اخت بتاعتك بس وموديل 2012 بالأمارة عملها عمرة كاملة :837:

قولت يافرج الله كدة مفيش مجال للشك وظهر الحق انا هخلص مشاويرى والتزاماتى وافضى نفسى قبل العيد بيومين اروح اعملها وتبقى مشكلة واتحلت وغمة وانزاحت
ونترحم من التاكسى والانتظار على النواصى :fun_36_1_4[1]:

بس معلش سؤال وقح اخير .. بالنسبة للكاشات يعنى ايه ظروفها DDFG لحسن اخوك لسه طالع من مدارس وداخل على عيد فلوس كتير
قالى ولا تحط فى دماغك وده مكانك وهنا عنوانك واثبت مكانك وكل الحاجات الحلوة الجميلة اللى بتطمن ديه وتثبت ديه والحقيقية انا اتثبت :Bravo:

ماشى يا عم الحج خلاص هيجبلكو العربيه نعملها قبل العيد :CONGRA~238:

وهنا احب انصح كل شاب برىء زى حالاتى انه ميتكسفش ابداء من الاسئلة الوقحة والقبيحة ديه كلها ولازم يسالها وياخد عقاد نافع قبل الكوريك ما يقع فى الراس YAKHBR

معلش طولت عليكم ولسه هطول بصراحة علشان انا ناوى احكيلكو كل الحكاية من تأفيزة الجزمة والشراب لقطع الغيار والمصنعيات والحساب فاللى وراه حاجة يروح يعملها واللى موراهوش يقوم يعمل كوباية شاية ويجى يكمل الموضوع بعد الفاصل :fun_36_3_12[1]:

رد: اغيثونا يا ولاد البندر فى جوان وش السلندر
 

هى العربيات كدة بتحب تدلع عليك ... و خاصة فى ايام العيد ... متابعين معاك ... و الصور كمان بعد اذنك

نعمل كباية شاى و نيجى نتفرج

رد: اغيثونا يا ولاد البندر فى جوان وش السلندر
 

ايه اللى حصل ؟ عسل وطحينة ILIL


قبل ما اكمل الحكاوى عايين نفكر بعض بأسطورة العسل والطحينة

وطبعاً اللى حابب يعرف اكتر عن دورة تبريد المحرك ودورة التزييت ومشاكل السخونة مواضيع اقسام الميكانيكا مليانة معلومات وتجارب قيمة ومفصلة اكتر من اللى هقولة بكتير


تقول الاسطورة ان كل المواتير اللى بتعتمد فى تبريدها على المية وتزيتها على الزيت بيفصل بين الاتنين جوان غلبان اسمة جوان وش السلندر

قوم ايه .. فى اى وقت واى اوان لو سخنت العربيه وانت غفلان تقوم العربيه تجيب جوان
يعنى السخونة وتاثيرها على وش السلندر (الجزء الاعلى من المحرك)تقوم تبوظ يا الوش نفسه وبالتالى الجوان يا الجواان بس لو لحقتها والوش يبقى سليم

فى حالة ان الوش اتاثر من السخونة كمان او زى ما بنقول (قفع) يبقى لازم يتقشط عند عمو الخراط الاول وبعدين يركب على جوان جديد

لو الوش سليم بيتغير بس الجوان

طيب ايه اعراض تلف الجوان ؟
زى ما قولنا الجوان ده بيفصل بين مية وزيت الموتور ولما يبوظ وظيفتة فى الحبك والربط تفك هيسيب شوية مية تخش على الزيت والعكس

وده يديك عسل وطحينة

العسل هو لون الزيت والطحينة هى لون الزيت المختلط بالمية

وده نلاقيه فين يا ولاد ؟
فى مكان من الاتنين دول دول او فى الاتنين مع بعض
المكان الاول فى دورة التبريد او الريدياتير
وده يبان فى السربنتينة مباشرة او القربة او فى الاتنين برضة مع الوقت بس اول ظهور ليه بيبقى فى سربنتينة الريداتير وبيبقى فى شكل فقاعات طحينة تطلع تطفو فوق المية وانت فاكك غطاء الريداتير ولو قافة ومشية شوية هتلاقى الطحينة اتجمعت على جوان غطاء الريداتير

والمكان التانى فى دورة التزييت وده فى حتت كتير فى الموتور بس تبانلك من مقياس الزيت ومن غطاء تزويد الزيت فى غطاء التاكيهات

وبالتالى ظهور الطحينة فى اى مكان مش فارق حتى لو فى مكان واحد بس مع الوقت هتظهر فى كل مكان



وايه خطورة الطحينة ديه يا ولاد ؟
قالك الطحينة او الزيت الممزوج بالمية بيفقد الزيت خواصة وده معناه احتمال وقوع مصايب فى الموتور لا تعد ولا تحصى ونفس الكلام بالنسبة لدورة المية وجود الزيت فيها يعمل مشاكل فى دورة المية وطرمبة المية ويسد حاجات ويبوظ حاجات

مراحل الاسطورة التلاتة
ومتنساش ان مشكلة الجوان فى حد ذاتها بتحصل بسبب مشكلة تانية سببت فى السخونة وبالتالى عندك مشكلة اساسية هى سبب السخونة ومشكلة الجوان اللى بتحصل من السخونة ومشاكل تحصل بعد تلف الجوان سواء الموتور او دورة التبريد علشان بس تفرق بين المراحل التلاتة وعلشان تفتكر دائماً لما تيجى تحل لازم تبداء من اخر مرحلة وتكمل لحد اول مرحلة اللى هى سبب السخونة الاصلى والا هتضطر تعيد كل الشغل تانى

مشكلة تسبب سخونة المحرك ==> تلف جوان وش السلندر ===> مشاكل فى المحرك / مشاكل فى دورة تبريد المحرك

والحل لازم يشمل كل المراحل انتهاء بسبب السخونة الاصلى علشان متعيدش الشغل تانى انا بكررلك تانى اهوه

الوقاية خير من الميكانيكى


عينك على المية وعينك على عداد الحرارة
رايح مشوار طويل مشاوير كتير قصيرة وخصوصاً فى الصيف يبقى يفضل تبص على المية كل يوم والتانى وتاخد بالك اذا كانت بتنقص ولا لاء ولو بتنقص اتعود تعوض الناقص كل فترة ولو بتنقص جامد شوف السبب ايه
وانت سايق عينك على مؤشر الحرارة بصله كدة كتير واتأمل فيه وحبه علشان يحبك لكن تنساه هيزعلك جامد اوى

طب لو معندكش مؤشر حرارة زى حالاتى وعندك لمبة بس
يبقى تاخد بالك كل مرة وانت بتدور الكونتكت مع اول تكة تست اللمبات كلها وتتاكد ان لمبة الحرارة بتنور وبرضو تبصلها كويس وتحفظ شكلها بس متحبهاش ويارب متشوفهاش بعد ما تدور العربيه ابداء بس المهم تتاكد من ان اللمبة شغالة اساساً وده بيبان مع اول تكة كونتاكت مع باقى المبات المفروض ينورو كلهم ومع التكة التانية تبداء تدور وتشتغل بس اللمبات اللى المفروض تشتغل فى وقتها

وده كله معناه انك وانت راكب العربيه لازم عينك تبقى مع الطريق ومع العربيه ومن اهم اساليب التخاطب مع العربيه هى مراقبة اللمبات والمؤشرات

كمان لاقدر الله وحصلت السخونة تاخد بالك انك تركن كويس وفى امان وتبطل العربيه بس تسيب اول تكة كونتكت علشان مراوح التبريد تفضل دايرة واوعى تزود مية والعربيه مش دايرة
سيب العربيه تبرد على قد ما تقدر بعد فتح الكبوت وبعدين تبداء تتعامل

حاول تستخدم القربة فى تزويد المية ولو استخدمت غطاء الريداتير تاخد بالك جداً لانة بيبقى سخن جداً جداً وتحته مية بتغلى وبخار درجة حرارته تجاوزت الغليان كمان

بعد ما تبرد شويتين حلوين باستخدام فوطة او اكتر تفتحة على مراحل مع الحذر غير كدة ملكش دعوة بيه خالص

بس يا سيدى وتاخد بالك دائما بعد ما تحصل سخونة ايه اسبابها وايه تداعيتها وخاصة لو وصلت لمرحلة الجوان يبقى لازم تستشير صديق


فاصل وبكرة نواصل لحسن اخوكو عايز ينام وفاصل بس هسيبكم مع صورة توضحيية لكل اللى اتقال

https://scontent-a-fra.xx.fbcdn.net/...49866231_n.jpg

رد: اغيثونا يا ولاد البندر فى جوان وش السلندر
 

رد: اغيثونا يا ولاد البندر فى جوان وش السلندر
 

نورت الموضوع ياصديقى العزيز ودعواتك معانا لحسن الدلع ده شكلة هيطول حبتين
والمشكلة ان الدلع ده مجاش الا بعد حوالى سنة من اقتناء العربية ديه وبدات اخد عليها واحبها كمان ولسه كنت هبداء اعمل تقارير وتجارب عنها تقوم هى تتدلع على الدلع الماسخ ده


Sent from my GT-P7500 using Tapatalk 2