مشكلة ضعف السحب فى لاداد 2107
 

السلام عليكم و رحمة الله , من فترة بدأ سحبها يبقى ضعيف و الrpm يعلى قوى لما اودس بنزين , لكن مش بتنتش و لا فيه زيادة استهلاك بنزين , فهل ده عيبب كارباراتير فعلا ؟

اصل الميكانيكى قالى كده و نضف البيكات و عمل الفلتر بالبلاور و خلاص كده جيب امشى بيها مفيش اى فرق ! !

روحت لمحطة بنزين عشان انضف الكارباتير كامل زى ما كان مكتوب فى موضوع هنا قالولى ده نصب مفيش حاجة اسمها تنضيف كارباتير !! و ضعف السحب ده معناه العربية جابت ديسك !!
يا ترى المشكلة دى ايه؟ كاربياكتير و لا ديسك و لا حاجة تالتة ؟و جزاكم الله خيرا مقدما

رد: مشكلة ضعف السحب فى لاداد 2107
 

غالباً طقم دبرياج كامل (حتى لو حاجه سليمه بنغير الطقم على بعضه لأن الفك و التركيب محتاج شغل شوية)
اسطوانه و ديسك و بليه
ممكن الأسطوانه تتملى عند فرملجى (اللى بيملو تيل الفرامل)
و ممكن تجيبها استيراد (مستعمله) بس حالتها كويسه
و ممكن تجيبها جديدة ( و ده الأفضل) بس لازم تجيبها من تاجر مضمون, لأن اللى فى السوق معظمة مضروب
تاجر يقولك عالصينى صينى حتى لو مكتوب ايطالى أو المانى
الديسك لازم جديد و غالباً اللى راكب هيطلع مكسور (كل الديسكات دلوقتى بتطلع مكسورة معرفش ليه)
و طبعاً بلية جديدة

مصنعية الفك و التركيب من 80/100 ج
و خلى الصنايعى ينضف مكان الطقم القديم بالبنزين كويس
------------------
و علشان تتأكد انه طقم الدبرياج
دور العربية عالمور, و من وضع الثبات (و هيا واقفه) دوس دبرياج و هات الغيار الرابع و جرب تشيل رجلك براحه من على الدبرياج
لو الطقم كويس العربية هتترج و هتفصل
لو تعبان هتتحرك من الثبات على الرابع مباشرة

رد: مشكلة ضعف السحب فى لاداد 2107
 

جزاكم الله جيدا ، طب الطقم الجديد يعمل كام؟

رد: مشكلة ضعف السحب فى لاداد 2107
 

حسب نوعه بس اعمل حسابك فى 250 - 300 جنية مثلاً
آخر مرة سألت علية من حوالى 6 شهور كانت الأسطوانه بـ 100
الديسك بفحمه بـ 140
البلية مش فاكر كام بس مش غالية

بس المهم اللى يقولك ده ايطالى سيبوا و امشى, كل اللى فى السوق صينى بس درجات
مفيش اصلى غير فى التوكيلات و طبعاً سعرها عالى جداً
هاته من تاجر مضمون أحسنلك, تاجر يقولك عالصينى صينى حتى لو مكتوب علية ألمانى
لو حضرتك من القاهرة: عندك المركز الروسى و أولاد نصار فى التوفيقية
و الأمين فى عزبة الحرفيين اللى فى حلوان