323 اول مرة - مطلوب مساعدة
 

السلام عليكم
الحمد لله ربنا قدرني وكرمني واشتريت اول عربية ليا النهاردة
مازدا 323 موديل 81
كنت رايح اخلص في شاهين بس ربنا رزقني بيها في الطريق
العربية حالتها عجباني اوي بالرغم من اني بدون خبرة بس شايفها واقفة وشادة حيلها
1500 سي سي فاضية لا تكييف ولا اي حاجة
شاريها علي 23000 جم
طمعان بقي في شوية حاجات من شباب المازداوية
انا ناوي الصبح ان شاء الله اغير الفلترين هواء وزيت واغير الزيت دي الف باء اللي سمعتها
اللي بعد كده ايه بقي :D
شخصيا بفكر ابعد عن الكماليات (تكييف + بطانة العربية من جوه + جنوط عشان حالتهم حلوة اوي برضك + سنتر وانذار + طارة ) دلوقتي لغاية ما اتعود عليها وخصوصا انها اول مرة اطلاقا مع عربية
يعني بداية كده مع الفلاتر والزيت هظبط بوجيهات و خرطوم طرمبة المياة تقريبا بيسرب
الكلاكس بيعلق احيانا وبصراحة التابلوه كله مش عاجبني بس مش وقته :D
المهم بقي عايز شاب ابن حلال كده يتبناني ع النت كخطوات ايه يتعمل قبل ايه ومنين :D وجزاكم الله خيرا

رد: 323 اول مرة - مطلوب مساعدة
 

الف الف مبروك

ربنا يديلك خيرها ويكفيك شرها

انا تحت امرك فى اللى حضرتك عاوزة ومحتاجة

بداية موفقة مع عربية محترمة وموتور كبير
كلامك مظبوط اوى
غير فلتر البنزين وفلتر الهواء وطقم بوجيهات اصلى مع ابلاتين وكوندنسر
ولو امكن تغير سلك البوجيهات والبوبينة كمان والاجمل فى البوبينة انك تجبها يابانى الكرتونى

ابلاتين +كوندنسر نوع محترم 40 جنية
طقم بوجيهات 4 شمعة 80 جنية
فلتر بنزين 5
فلتر زيت اعتقد 25
فلتر هواء 20
كمان عاوزين نظبط تاكيهات للموتور عند ميكانيكى كويس
وشوف جلب المقصات الخلفية (عدد 4) لان مشهور فى الماذدا بتاكل جلب مقصات خلفية

وما تنساش تغير زيت للفتيس بالمرة

رد: 323 اول مرة - مطلوب مساعدة
 

الله يبارك فيك يا mr_astra
جزاك الله خير اولا علي الاستجابة السريعة
وربنا يكرم اخلص الواجب ده بس بيني وبينك مش ناوي اغير كل اللي قولت عليه ده
انا هكشف عليهم واللي هيحتاج هاغيره

رد: 323 اول مرة - مطلوب مساعدة
 

هو اية المكتوب زيادة
ممكن مثلا تقصد جلب المقصات الخلفية
اوكى سيبك منهم دلوقتى فعلا مش مهمين
انما زيت الفتيس مهم
ظبط التاكيهات مهم
والباقى شغل سيرفيس عادى لازم يتعمل
والكاتينة عند حضرتك جنزير مش هانعمل فيها حاجة انما لو كانت كاوتش كنا غيرناها كمان

رد: 323 اول مرة - مطلوب مساعدة
 

تمام يا ريس
انا غيرت طقم الكهرباء كله بوجيهات وكوندنسر وابلاتين
والتلات فلاتر
والزيت حطيت موبل عادي كتجربة
بس اكتشفت اولا ان خرطوم الريداتير مخروم :(
ثانيا الترموستات بتاعة المروحة مش شغالة والمروحة شغالة علي طول مع تدوير الكونتاكت
ثالثا بتاعة صابع الحرارة اللي بتقيس الحرارة في الموتور مقطومة ونصها جوه ومش عارف اتصرف فيها ازاي
رابعا القربة بتاعة المساحات محتاجة زرار جديد في التابلوه عشان مش راضية ترش عن طريق دراع الدركسيون (وانا مش عاجبني الموضوع ده)
انا نفسي بس الاقي ميكانيكي كويس اثق فيه وفي نفس الوقت حنين في فلوسه عشان الراجل اللي روحتله ده جزار في الفلوس
فلو تعرف حد في عين شمس او مساكن عين شمس او قريب من الاتنين
وبالنسبة لقطع الغيار ربنا كرمني بالشرقاوي في جسر السويس ده كويس