مشكلة غريبة فى عربيتى الرينو كليو 2004 (مع الفيديو)
 

اولا بسم الله الرحمن الرحيم
و السلام عليكم
انا بالتفصيل عندى عربية رينو كليو 2004 لسه مشتريها من شهرين و الحمد الله انا مشتريها فيها حاجات عايزة تتغير و انا عندى علم بكل الحاجات دى و حسبت ثمنها من العربية المهم
1- العربية رينو كليو 2004 عداد 128 الف كيلو حالة المتور 76%
2- العربية فيها حاجات عايزة تتغير وهى كالاتى
قواعد ماتور
بلى و طنابير امامى
جوان غطاء التكيهات
اولسيه الكرنك
السيه الكامة
قواعد فتيس + شداد فتيس
جوان الكربريتير
تيل فرمل امامى
العيب انا النهارده اضريت اغير مكان ركنة العربية و نزلت اركنها فى شارع جنمبى و كالعادة علشان لسه مبتدا نسيت اكشف على الميه فى القربة قبل ما اطلع مع العلم انى عملت بيها مشوار قبليها من يومين و بسخنها كل يوم كتير
المهم مشيت و ركنت تمام و طلعت فوق و نزلت بعد ساعتين علشان ارجعها مكانها
انا و جوه العربية شميت ريحة زى البلاستيك الى بيتحرق و بحسن نية قلت اكيد مش عندى لقيت و احد قاعد فى المحل الى جنبى بيقول فى ريحة حاجة بتشيط المهم انا قلقت و نزلت من العربية و رفعت الكبوت لقيت دخنة بسيطة تكاد لا ترى طلعة من جنب المتور رحت قرفت و ركنتها و كنت بفكر ابيعها بصيت لاقيت قربة الميه فيها تقريبا بق ميه قلت يبقى انا السبب المهم سبت العربية تبرد خالص بتاع ساعة و زودتها ميه و هى مش دايرة (ملحوظة عرفت بعد كدا ان دا غلط و بيبوظ العربية لازم تكون دايرة او اعمل كده و هى مبطلة بقالها نص يوم على الاقل) المهم قدر الله ما شاء فعل
و شوفو الفيديو معلش طولت قوى لانى فعلا مش بفهم اى حاجة فى العربيات و حتسوح لو رحت لصناعيى و انا مش عارف اى حاجة
اها كنت هنسى بالمرة بقى :)
عندى الفرامل لم ادوس عليها و العربية مبطلة بتنفس زى صوت الهوا و هى عايزة تيل اساسا و كمان عندى عداد السرعة و انا ماشى الاقيه فصل و لم اغير سرعة يرجع تانى يشتغل و ممكن يفصل تانى
و الدبرياج عندى بيزيق و العربية مبطلة و الصوت من جوا العربية بس و دى حلها الاسبراى wd40
بس كده ارجو الافادة من اصحاب الخبرة و مراعاة انى ابيض فى موضوع العربيات :w6w2005041122053268http://www.youtube.com/watch?v=hWqbXZ_vyHY&featu re=youtu.be

رد: مشكلة غريبة فى عربيتى الرينو كليو 2004 (مع الفيديو)
 

للاسف حضرتك عامل كلوز اوى على الدخنة كان مفروض تورينا الموتور بالكامل وبعدين تعمل كلوز مكان الدخنة
بس حاسس انة من حجتين
اما ان فى زيت موتور واقع على الشكمان فبيعمل دخنة ويعمل ريحة
او انة فايظ الموتور
بس فى الغالب انه الاحتمال الاول

اما دواسة الفرامل لما نظبط بس الطنابير ونغير التيل نبقى نحكم اية المشكلة

رد: مشكلة غريبة فى عربيتى الرينو كليو 2004 (مع الفيديو)
 

العربيه فيها حاجات كتير اوي عايزه تتغير وده ياما حيبقي طول فترة العربيه معاك حتبقي رايح جاي علي صنايعيه وانت زي مبتقول ابيض فمش حتسلك معاهم
ياما حتصلح عند ناس محترمه وحتدفع كتي اوي في اللي انت بتقوله ده

انا شايف انك تبيعها احسن بس تقول بحق اللي اللي فيها للي حيشتري عشان ربنا يباركلك في بيعها

رد: مشكلة غريبة فى عربيتى الرينو كليو 2004 (مع الفيديو)
 

ياباشا الراجل لسه جايب العربيه من شهرين هايبعها ليه دلوقتي
التجارب اثبتت ان مافيش عربيه مستعمله مافيهاش بلاوي ومستحل تجيب عربيه الا ولازم تصرف عليها وان لو مشي ورا النظريه ان يلاقي عربيه مايصرفش عليها يبقي هايغير كل شهر عربيه
انا رايي انك تشوف ميكانيكي كويس بتاع فرنساوي وإن كنت ارشحلك فريد شوقي بس هو غالي وغالبا هاتسبلوا العربيه يومين تلاته ولو تعرف حد تاني يبقي أفضل
وتظبطها وتشدها وتعقد معاك العربيه دي من العربيات الي ركوبتها حلوة
بس نصيحه مني لأني راكب برده فرنساوي حاول تفهم عربيتك علي قد ماتقدر ميكانيكا وكهربا وتحاول تشوف وتقرا كده هاترتاح كتير اوي من فتي الميكانيكيه وربنا يوفقك

رد: مشكلة غريبة فى عربيتى الرينو كليو 2004 (مع الفيديو)
 

انا عمري مقولت ان في عربيه مستعمله مبيتصرفش عليها
بس انا لما تبقي اول عربيه وانا ابيض ميكانيكا
والعربيه عايزه كل ده
1- العربية رينو كليو 2004 عداد 128 الف كيلو حالة المتور 76%
2- العربية فيها حاجات عايزة تتغير وهى كالاتى
قواعد ماتور
بلى و طنابير امامى
جوان غطاء التكيهات
اولسيه الكرنك
السيه الكامة
قواعد فتيس + شداد فتيس
جوان الكربريتير
تيل فرمل امامى
عندى الفرامل لم ادوس عليها و العربية مبطلة بتنفس زى صوت الهوا و هى عايزة تيل اساسا و كمان عندى عداد السرعة و انا ماشى الاقيه فصل
يعني فيها سيرفو كمان
غير الميه اللي نشفت اللي ممكن تخشلها في ريداتير؟! اول لحام ! وماخفي كان اعظم
يبقي العقل بيقول اني قبل مفكر اصلح اشوف حصرف عليها اد ايه والعربيه فعلا تستاهل ولا لا ولو فكرت ابيع بعد كده حبيعها بكام ؟
وانت عارف ان الفرنساوي قطع غياره عامله ازاي
الواحد مش بيجيب عربيه عشان يتعقد وكده هو فعلا حيتعقد من العربيه
وهو عشان ابيض ميكانيكا فعلا خدها عالوضع ده

انا كل اللي عملته اني نصحته من وجهة نظري لان ده اللي كنت حعمله لو العربيه بالحاله دي

وفي الاول وفي الاخر ده قراره وربنا يوفقه لافضل الحلول ان شاء الله