قطع غيار الشوما ؟؟؟!!!
 

باذن الله هاشترى شوما
بس عايزة اعرف ايه رأيكم ؟؟؟
هى هاتكون اوتوماتيك ده فى مشكلة ؟؟؟؟؟؟

واخبار قطع الغيار ايه؟؟؟؟ متوفرة ولا هايطلع عينى


متشكرة جدا على المساعدة

رد: قطع غيار الشوما ؟؟؟!!!
 

السلام عليكم
لو تكتبي تفاصيل اكتر عنها هقدر احكم مثلا موديل كام وعامله كام كيلو...
الشوما نفس قطع غيار السيفيا من حيث المتور والعفشه والسينسورز وكده
بس بتختلف في الشكل من الامام ومن الخلف وقطع غيارها المختلفه عن سيفيا نادره و اغلى من قطع السيفيا يعني مثلا كشاف امامي اصلي 850 ونادر لما تلاقيه لكن كشاف سيفيا 350 وموجود عن اي حد
بالنسبه للاتوماتك في السيفيا والشوما للاسف بيتلف بسرعه انا باظ عندي وعملتله عمره كلفت حوالي800 مصنعيات وقطع غيار وسعره استيراد كامل 2200

رد: قطع غيار الشوما ؟؟؟!!!
 

متشكرة أخى على المساعدة
هى موديل 99 و اوتوماتيك وفتحة سقف وحالة عامة جيدة جدا
مطلوب فيها 47000
بس الكلام اللى اتقالى ان قطع الغيار موجودة ومتوفرة !!!!
طيب برأى حضرتك قطع الغيار المختلفة عن السيفيا دى ممكن الاقيها فين ؟؟؟؟

متشكرة قوى لتجاوب حضرتك

رد: قطع غيار الشوما ؟؟؟!!!
 

السلام عليكم
مبدئيا اعملي حسابك ان الفتيس هيحتاج اصلاح او تغيير لان مديلها قديم وهتلاقياكتر من 100000 كلم. وتغييره بيكلف 2500 تقريبا بالمصنعيات والزيت
ثانيا السعر ده كتيير جدا عليها .مهما كانت حالتها نضيفه ده اخرها 42 وانزلي سوق مدينه نصر وشوفي بنفسك
ثالثا قطع الغيار المختلفه عن السيفيا لو احتجتيها هتروحي الحرفيين هتلاقيها طل بس هتكون اغلى زي ما قلتلك
العربيه مجملا رائعه فعلا بس السعر ده كتير قوي.انتي ممكن تجيبي اسبكترا 2005 الي هي المعدل بتاع السيفيا بالسعرده!!

رد: قطع غيار الشوما ؟؟؟!!!
 

السلام عليكم ورحمة الله وبركاته
أولا: الشوما عربية محترمة جدا وقطع غيارها مش غاليه ولا حاجه بالعكس دى ارخص من عربيات تانية فى نفس فئتها ومتوفرة كمان
ثانيا: العربية سعرها محفوظ وليها اسمها بس للى يقدر وبيحب يركب وانا شاريها مانيوال موديل 97 ب 44000 والاتوماتيك بيوصل 50000 ويمكن 55000 كمان
ثالثا واخيرا المقياس فى الموضوع حالة العربية ومشكلة الفتيس دى اظن انها مشكلة فردية لانى ملقتش حد هنا فى المنتدى اتكلم فيها بالعكس كلهم بيشكروا فى الاتوماتيك