تركب ديفيندر لعربيتك ولا لأ ؟؟
 

لاحظت في السنوات الاخيرة انتشار تركيب الديفندر الحديد للعربيات امامي وخلفي
رغم ان الموضوع ده ماكانش منتشر قبل كده وكنا بنشوفه في العربيات الخليجية فقط
والغرض منه حماية العربية وتقليل خسائرها وقت الحوادث

وبصراحة يا اصدقائي الاعزاء الموضوع يحتاج مننا وقفة مع النفس
هل تعتقدوا ان الشركات ماكانش بامكانها تصنع الاكصدامات حديد من الاول و تريح دماغنا ؟
الحقيقة التي لا يعرفها كثير من الناس ان ثلثين وفيات الحوادث هم من المشاه في الشارع وليس الركاب وده خلي شركات السيارات غيرت طريقة التصميم و خامات التصنيع
لو شوفنا الصورة المرفقة نلاقي ان اول خبطة وقت الحادثة بتكون بين ارجل المصاب و الاكصدام الامامي و بعدين بيقع و غالبا راسه بيتخبط علي الكبوت

ده خلي هيئات السلامة الاوروبية تلزم الشركات بتعديل خامات الاكصدام الامامي و الفوانيس بحيث تكون اكثر مرونة و امتصاصا للصدمات و اعتمد حماية ركاب السيارة علي تامين المقصورة
بل الزمت الشركات ان تكون المسافة بين الكبوت والموتور لا تقل عن 10 سم
بحيث يعطي مسافة ان الكبوت يتطبق و يقلل ارتطام راس المصاب بالموتور لان الموتور صلب جدا
بل انهم بيعملوا ابحاث دلوقتي لتركيب ايرباج في الاكصدام - تصوروا ؟

بعد كل ده ايه رايكم
نحافظ علي الفوانيس و الشبكة
ولا علي ارواح الناس ؟
اتمني يارب ان كل واحد بيفكر يركب ديفندر معدني انه يفكر تاني
وكده كده المرور مانعها
فياريت نفكر في الموضوع

رد: تركب ديفيندر لعربيتك ولا لأ ؟؟
 

أنا عاوز أركب الجناب والخلفى بس مش الأمامى علشان محدش يريح على العربية من الخلف وكما لما اركن جنب الرصيف أحمى العربية من الرصيف اللى ساعات بيكون 25 سنتى أرتفاعة.

ثانيا أنا مش معاك فى حكاية المشاة دى لان المشاه أصلا مش مفروض يعبروا إلا من أماكن المشاة فقط ولما تكون الأشارة حمراء. اللى يعدى فى الغلط يبقى يستاهل اللى يحصل له.....

رد: تركب ديفيندر لعربيتك ولا لأ ؟؟
 

يعني راي حضرتك ان الي ماشي في الشارع و عدي والاشارة حمرا ندوسه ؟؟؟
علي العموم شكرا علي التنبيه و المرة الجاية لو حد عدي و الاشارة حمره هاخبطه واريح البشرية من امثاله
ANAA7TGANAA7TGANAA7TG

رد: تركب ديفيندر لعربيتك ولا لأ ؟؟
 

أنا مش قصدى كدة. أنا قصدى أنه طالما أنت ماشى سليم وفجأه عدى قدامك حد ومش عرفت توقف قبل ما تلمسة يبقى مين الغلطان؟ لو رحت المحكمة هل القاضى هيحكم عليك؟ طبعا لا لانك مش انت اللى غلطان. أذا مش هندوس الناس ولا حاجة أحنا هنحاول نتفاداهم بس لو مش قدرنا يبقى مش غلطتنا....

رد: تركب ديفيندر لعربيتك ولا لأ ؟؟
 

سيدي الفاضل لازلت شركات كبري تضع فى سيارتها الدفيندر و السيارة تنزل قياسيا بها و ليست كماليات و انا مش مختلف معاك فى موضوع حماية الاروح و دي طبعا الحاجة الاولي اللي بتكون فى اهتمامات اي انسان سايق عربية بس كمان فى اوربا و الدول المتقدمة فى احترام للانظمة و قواعد المرور انما عندنا ابقي قابلني ليه بقي لان في الدول المحترمة لما واحد بيخبط عربيتك الموضوع بيتنهي فى منتهي السلاسة مش عندنا سواقين ميكروباصات نصفهم خريجي سجون و يبقي موت و خراب ديار و مع ذلك انا مركب الجانبي و ان شاء الله الخلفي بس مش هاركب الامامي تقبل تحياتي GIFT4U