المقاله دى علشان أحذر أى واحد حينضحك عليه زى ما أنضحك عليا .. إن سعر العربيه رخيص و العربيه فرنساوى تقفيل أسبانى زز يعنى أوروبى بالكامل و أحسن من الكيا الكورى!!
أنا أشتريت السيارة لزوجتى بناءا على ما سبق و خد عندك يا سيدى :
1. و انا خارج بيها من معرض صلاح سالم رايح أرخص فى مساكن الشيراتون .. و كنا فى الصيف و صلاح سالم زحمه .. حاولت أشغل التكييف .. إشتغل كأنه مروحه .. و فين وفين لما السكه مشيت شويه إبتديت أحس بيه. قولت العربيه جديده و يمكن لسه ما لينتش .. عديها.
ليه غلط جدا اى عربيه تتشرى زيرو غلط انك تفتح التكيف خلال فترة التليين وده اساسى والمفروض المكان الى حضرتك اشتريت منه العربيه كان يقولك ده قبل مايسلمك العربيه ومفروض كمان يقولك السرعه المحدده الى المفروض تمشى بيها خلال فترة التليين يعنى مثلا الهيونداى النترا 2009 كانت المفروض فى اول 1000 كيلو ماتزودش عن 60 او 70 كيلو فى الساعه مش فاكر اوى فاعيب التكيف ده عادى فى فترة التليين
2. فيما بعد لو أنت على 6 أكتوبر الساعة 2 الظهر و درجة الحراره 38 و مشغل التكييف .. آجى أدوس بنزين .. العربيه ما بتسحبش خالص و لا كأنك راكب بسكليته .. و لما أدوس بنزين جامد تروح ناطه مره واحده تخليك تلبس فى اللى قدامك.
ده برضه نفس العيب الى ذكرته لحضرتك بالاعلى
3. إستهلاك البنزين داخل المدينة 110 كيلو للصفيحه!!! و لا كأنى راكب شيروكى .. العداد بتاعها على الطوالى مدينى 14 لتر لكل 100 كيلو !!! .. رحت التوكيل فى صيانة ال 10000 .. عرفوا المشكله عالطول و كأنها مشكله عامه و قالول لى حانصلخها .. و لكنها زى ما هيا حتى الآن.
المفروض الاصلى بتاع استهلاك السياره يترواح من بين 8.8/10 لتر لكل 100 كيلو ممكن ده يكون فى الاول بس وبعد كده تتظبط الله اعلم
4. أول ما اشتريت السيارة و طلعت بيها على الصحراوى .. لقيت شبكة الإكصدام الأمامى السفليه اللى فيها الفوج لايت إنفصلت و وقعت جوه الإكصدام .. الشبكة على كلبسات ضعيفه جدا .. و بقيت لما أرجع أقعد أركبها مطرحها و فى الآخر من زهقى لزقتها بأوهو!!
دى حاجه غريبه فعلا هى ورقم 5 الى تحتيها لان اول مره حد يشتكى ان الشبكه تتخلع بس حضرتك هل حضرتك لما ذكرت حتة التكيف حضرتك قولت العربيه نطت وتلبس فى الى قدامك فلو حضرتك بعد ماحصل ده الشبكه ممكن يكون اتكسر الكلبسات بتعتها عشان كده اتخلعت وده ممكن برضه لانى معرفش مين الى حصل الاول لان حتى الان محدش اشتكى ان الشبكه تتخلع مره واحده
5. بعد شويه إنفصلت الشبكة الكبيره اللى وراها الرادياتير و هى على نفس الكلبسات الرديئة و لكن وجود الردياتير و المكان المحكوم ما خلوهاش تقع.
الاجابه فى رقم 4
أنا دلوقتى عامل 14000 كم .. تيل الفرامل إتكل على الله و بوظ الطنابير!!!!
نزلت علشان أشتريهم من شارع دمشق .. ما حدش عنده خالص و وقفت أتكلم مع تاجر بيجو .. سمعنى مآسى من الناس اللى بتعدى عليه و تشتكى من العربيه و سؤها.
المشكله فى العربيه دى ان تيل الفرامل مفروض يتغير كل شويه وعلى ما اظن وتقريبا المفروض يتغير فى صيانه ال10000 وبعد كده يتغير كل 20000 كيلو
الحقيقة هى غلطة عمرى إنى ركبت البيجو و مش حتتكرر تانى و تو ما يخلص قسطها بعد سنه ونص حابيعها لأول مشترى
ليه بس ولا غلطه ولا حاجه البيجو معروفه انها من السيارات المحترمه وكل الاسباب الى حضرتك كتبتها دى انا قولت لحضرتك اسببها والله اعلم صح ولا غلط مشكله التكيف ده اساسى فى عربيه بتلين غلط ان هو يتفتح مشكله الشبكه ممكن لما السياره نطت ولبست فى الى قدامها اتكسرت الكلبسات فامش عيب تصنيع وياريت حضرتك تروح مركز صيانه تانى غير الاولانى وتقولهم على مشكله البنزين تانى وان شاء الله هتتحل http://www.masrmotors.com/vb/images/..._11%5B1%5D.gif.
