مصر موتورز مجتمع السيارات - بعد 11000 ك قياده على الطرق السريعة

السلام عليكم انا حابب اعرض عليكم تجربتى مع السيراتو انا بشتغل فى مرسى علم على بعد تقريبا 600 ك من القاهرة واكيد كنت محتاج عربيه واسعه ومريحه واهم حاجه شنطتها تكون كبيرةلان بيكون معاي اسرتى وفيها طفلين وما ادراك كام شنطة بتكون معايا بس للعيال ساعات بحس انى محتاج عربيه دوبل كابينة عشان تكفى الشنط اللى معايا لغايه ما وقعت عينى على السيراتو على طول حبيتها واول حاجه عملتها انى قعدت فى كرسى السواق وظبط الكرسى على طولى انا 183سم وبعد كده قمت وقعدت ورا كرسى السواق لقيت المساحة ورا كافيه جداا ودى كانت عملالى مشكله فى عربيتى القديمة انى ما فيش حد بيعرف يقعد ورايا حتى ولول كان قصير لاكن فى السيراتو ممكن اتنين طوال يقعدو ورا بعض ولما فتحت شنطة العربيه اتهبلت لان مساحة الصالون ما كانتش على حساب الشنطة وطبعا لما شوفت الاوبشن اللى فيها عجبتنى اكتر واقبال الناس عليها وقررت انى اشترى واحدة وطبعا قابلتنى مشكله كبيره فى تحديد نوع الكاتيجورى اللى انا عايزه وطبعا كانت الاختيارات كتير مع وجود اختلافات بسيطة بينهم فتوصلت لحاجة كويسه انى كتيت كل الاوبشن اللى ممكن يكون فى العربيه وعملت لهم ترتيب اولويه بالنسبة لى عشان ما احترشى واحدد انا عايز ايه بالظبط وكان اختيارى انى جيبتها هاى لاين جنط 17 فرش جلد فتحة سقف 2 اير باج او الاسهل اقولكم انها فيها كل حاجه ماعدا البصمة والكاسيت 6 سى دى لانى لقيت فرق السعر حوالى 5000 جنيه عشان ما احطش المفتاح فى الكونتاكت وموضوع ال6 سى دى بالنسبه لى مالهوش لازمة لانى اشتريت usb 16 g
وده طبعا بيغنيك عن السى دى تماما لانك ممكن تحطى عليه كل الاغانى اللى اتخلقت وبرضه ما تخلصشى وكان نفسى اجيب الفول اير باج بس لقيت فيها مشكلتين ان ما فيش زرار بيفصل عمل الاير باج لو انت جوه البلد مثلا يعنى لو ميكروباص ولا اتوبيس صبح عليك من الجنب هايتخرب بيتك عشان ترجع الاير باج الجانبى مكانه وتانى حاجه انها كانت تقريبا مواصفات اردنى او عراقى مش فاكر فقررت اجيب 2 اير باج بس
بس بعد ما اتخذت قرار الشراء حسيت انى اهبل لانى باشترى العربيه على اساس الاوبشن اللى فيها وشكلها الجميل وما اعرفشى حاجه عن الموتور بتاعها ولا العفشه ولا الصيانه بتتكلف اد ايه فاتصلت بالتوكيل واخذت كل المعلومات اللى انا عايزها وسالتهم انى هاشترى عربيه خليجى ممكن اعمل ليها الصيانه عندكم فقالولى طبعا ممكن الكلام ده طبعا فى يناير قبل موضوع حظر الصيانة على الخليجى فتوكلت على الله ودفعت الفلوس واستلمت العربيه وانا واقف وكانت سعودى ولونها سيلفر وطبع هو مش احلى لون فى السيراتو بس انا اخترته لسبب بسيط جدا انه مهما كانت العربية مش نظيفة مش بيبان فى اللون ده وخصوصا ان فى مرسى علم اليوم اللى بتركن فيه العربيه كانك راكنها بقالك 3 اشهر فى القاهرة طبعا اول ما استلمت العربيه خدتها من المعرض بدون نمر لانى كنت خايف استنى لغايه يوم الترخيص تكون اللى انا عايزها مش موجوده وجبتها من معرض سمير ريان وساكن فى 6 اكتوبر يعنى مشوار جميل لمعرفه السيارة اول ما ركبتها حسيت برهبه شديدة لانى متعود اسوق مانيوال وانا خارج من عند سمير ريان فى مطب صناعى صغير وانت خارج على الاتوستراد وجيت اهدى بانى ادوس بالراحة على الفرامل لقيت نفسى ملبس صاحبى اللى قاعد جنبى فى الزجاج الامامى ولقيت رجلى الشمال هى اللى على الفرامل كانى كنت بادوس دبرياج وطبعا كان شكلى مش ظريف خاصه انى بسوق بقالى اكتر من 12 سنة المهم دخلت البنزينة وفولت العربيه ودفعت المعلوم لعمال البنزينة حلاوة العربيه الجديدة واتكلت على الله واخدت الطريق اول حاجه حاستها وانا سايق العربية انى سامع صوت احتكاك الكاوتش بوضوح على الاسفلت مع انى كنت قافل كل زجاج العربيه وكنت بسمع كل صوت حباية او زلطايه على الارض مع انى فى عربيتى القديمه ما كنتش باسمع خالص صوت الكاوتش فقلت جايز لان الجنط 17 وهو عريض فصوت الاحتكاك اكبر وبعد كده لقيت حاجة غريبة ان العربيه بتحدف شمال فى كل الشوارع انا اخدت طريق الاتوستراد - القلعه - التحرير - كوبرى 15 مايو - المحور - اكتوبر يعنى على السريع والبطىء بس من خبرتى السابقه قولت اكيد الكاوتش مش مظبوط بسبب الركنه الطويلة وانى المفروض كنت ظبطه قبل ما امشى بالعربيه وقولت مش مشكله وانا رايح ارخص فى المرور هاظبط الكاوتش المهم ركنت العربيه تحت البيت وكنت فرحان قوى بيها وطلعت البيت وقعدت اتفرج عليها من فوق وعجبنى شكلها جدا وقولت لازم انزل واخد الكاتالوج من العربية وقعد اقراء فيه وكنت قاعد لوحدى فى البيت واسرتى كلها فى المنصورة ونزلت بسرعه جيبت الكاتالوج وجيت اطلع لقيت نفسى من هبلى نسيت مفتاح البيت جوه الشقة وكانت الساعة تقريبا 1.30 بعد منتصف الليل ودى كانت حلاوة العربية الجديدة ليا وقعدت افكر اعمل ايه دلوقتى وكنت هاعيط من غبائى هاكملكم الجزء التانى بعدين