عملت حادثة امبارح
 

سلام عليكم

انهارده للاسف موضوع حزين لكن محتاج نصيحة عفشجى بيفهم

اول امبارح كنت على الميكانيكى بظبط قواعد الموتور و اخدت عين تمام يعنى تانى يوم الصبح خارج انا و اخويا على طريق الصناعية لقيت نقر فماشى بفاديها - الطريق ده بيمشى عليه نقل ثقيل بيشيل حديد و حموالات رهيبة ازاى يتساب نقر و بلاعات مفتوحة الله يلعن ابو ده جهاز مدينة غبى- المهم

النقره فى نص الطريق بفاديها شمال لأن يمين كان مش نضيف العربية حدفت حادفة مرعبة انا كانت سرعتى 60 غيار 3 بعدل التارة مفيش العربية اخدت زاوية خطيرة جدا يمكن لولا انى اصريت اخد اخويا معايا فى المشوار ده شوية الوزن دول منعوها تقلب

حكيت فى الرصيف شمال راح الجنط الخلفى راح مفرغ الهواء اللى فيه العربية حدفت يمين و لفت حولين نفسها فى اللحظة دية اخويا مرعوب بيقولى دوس فرامل و انا خلاص قولت مفيش فايده و كنت هدوس فرامل نتقلب احسن ما نخبط فى العمود على الاقل فرص النجاه اكتر ربنا انقذنا فى اللحظة دية رجلى عتلت لوحدها على دواسة البنزين خرجنا من الدوامة دية و بعدنا عن العمود و العربية دخلت يمين فى كومة ردم على طين على ميه قبل ما ندخل فيها عتلت فرامل بكل عزم عندى الاكصدام اللى قدام من اليمين اتكسر و الحماية اللى فوق الكاوتش اليمين وقعت و صاجه من الجناح من تحت عضت على خرطوم البنزين قطعة

اخويا الحمد لله محصلوش حاجه العربية نجت انا اخدت خبطة فى الدركسيون لحد اللحظة الصداع بتاعها مراحش و كدمه فى ضلع اتخبط و الحمد لله ما اتكسرش

نزلت اشوف ايه اللى حصل و انا مش قادر اقف على رجلى حتى دورت على الفيبر اللى طار و اطمنت على العربية الازاز الشاسية الموتور المكنة الحمد لله يا رب

دخلت قولت اجرب ادورها دارت و رحت ساحبها من الطينة هنا بانت خرطوم البنزين جبت حتة جلده و ربطها بقفيز عشان اوقف نزول البنزين لكن وقف فترة كان اخويا كلم اصحابه انا مليش اصحاب اكلمهم جم و جه ابو صاحب اخويا و فكينا الجنط عدلناه و خدمت على الخرطوم بشوية شكارتون مرضتش اروح مستشفى او اروح العريبة لحد اما اروح للميكانيكى بعتنى للعفشجى - طلع عفشجى نصاب -

قالى بيضة المقص الشمال بايشه لما فكت عملت المصيبة دية و الدونجل اللى ورا اتعوج 1.5 سم و مسكنى نصب بقى يقولى الدونجل يستعدله على السخن ب 500 ج او اجيب غيره ب الف و نص

انا شوفت معدن الدونجل لما فكه و لقيت انه لو اتعدل على السخن ممكن يضعف شيلته هيلا بيلا و رحت على السمكرى قالى ممكن استعدلهولك على 350 مستريحتش للكلام ده لما اتصلت بالميكانيكى و قالى دونجل عربيتك استيراد ب 300 ج فاضى و انت مش محتاج غير كده

خليت العفشجى يركب اللى فكه رحت لبتاع ظبط الزوايا هو ادرى و يكشف بالكمبيوتر يحدد ايه القصة كلها قالى لازم تغير جوز مقصات و الدونجل ممكن استعدلهولك على الكمبيوتر عندنا بزرجينة ب 90 ج بس مش هينفع نعمل ده بدون ما تغير المقصات

فى الوقت اللى كان العفشجى بيفك و بيربط فى الدنجل صلحت الفيبر الحمد لله بتاع العربية و صلحت الخرطوم بتاع البنزين طبعا ده من 9 الصبح لحد 8 بالليل

روحت بالعربية العجلة بتحك من ورا مفيش سيطرة على الدركسيون ماشين بسرعة 20 بعد ما كنت بجرى 180 و مش عاجبنى كمان و طبعا الحالة النفسية ضايعة بما يكفى

انا محتاج عفشجى محترم بيكون بيفهم يقولى الصح فين عشان العفشة دية تبقى صح و تشيل العربية متعملش اللى حصل ده تانى

انا هركنها اسبوعين عشان اقدر اجيب فلوس المقصات و اغير المساعدين كمان لأنهم مهلكين من زمان و عاوز رأى صح فى موضوع الدنجل ده

انا بلوم نفسى ليه موقفتش العربية خالص و بعدين قررت اعمل ايه مع النقرة بهدوء و بحسبن ربنا على اللى اشتغل على البيضة الشمال و مغيرش المقص كله زمان لما اشتكينا منها

رد: عملت حادثة امبارح
 

رد: عملت حادثة امبارح
 

الحمد لله على سلامتك و قدر الله و ماشاء فعل

رد: عملت حادثة امبارح
 

حمدالله والمهم انت بخير
وفداك الف عربية
قدر الله وما شاء الله فعل

رد: عملت حادثة امبارح