تجربتي مع بولو٩٧ ١٣٠٠ شراء وعمره مفيده جدا
 

السلام عليكم يا شباب
بعد لفة طويله بين العربيات الفيات والهوندا والسبرانزا والستروين والبيجو والرينو والهايونداى والدايو وحتى الفولكس كل ده فى ١٠ سنين ولاني بغير كتير جدا
اشتريت بولو ٩٧ ١٣٠٠ العربيه حاله ممتازه داخليا صالون وتابلوه ماشيه ١٤٠ الف عفشه وكاوتش ممتاز
العيوب ماكينه خفيفه بتدخن زيت وبيخس
محتاجه سمكره خفيفه فى العتب والكبود فقط
ولكن السعر كان مميز نوعا ٢٨٠٠٠ ج
توكلت على الله وبعد الشراء بشهرين وتجربة العربيه قررت الاحتفاظ بيها لفتره اطول وعمل الماكينه لان بصراحه العربيه جيده بالنسبه لسعرها قويه ثابته اعتماديه
لما الميكانيكي فتح الماكينه قالى حالتها ممتازه وهاتبقى افضل من الماكينه الاستيراد وعملى طقم شمبر وغيرلى اسطوانه لانها كانت متآكله تماما
والحاجه اللى قرفتني طقم الصبابات كان عايز يتغير دخت عليه فى اسكندريه مالقتش زى بتاعي بالظبط ولما فقدت الامل فيه ولاحظت تقارب سعره + مصاريف اويل سيل وخرط دليل مع انه حل غير جيد
قررت اشترى وش سلندر كامل بالصبابات والحمد لله
العربيه الان فى التليين
اسعار قطع الغيار من اغلي الاسعار اللى شفتها مع اني ركبت تويوتا ستارلت وستروين اكثر من موديل وهوندا اكورد
طقم بوجيهات ٦٠
وش سلندر اشتريته ب ٧٠٠ بعد عزاب كان سعره ٩٠٠
طقم صبابات ٤٠٠ ماشترتهوش طبعا
سير كاتينه ١٦٠
سير دينامو ٦٠
بلية شداد ٢٤٠
اسطوانه ٣٣٠
طقم شمبر ٣٨٠
بالمصناعيه وبعض المصاريف الاخرى تكلفت حوالي ٣٠٠٠ ج

رد: تجربتي مع بولو٩٧ ١٣٠٠ شراء وعمره مفيده جدا
 

اولاً مبروك ربنا يهبك خيرها ويكفيك شرها عربية جميلة وعملية وتستاهل تمنها وبالنسبة لقطع الغيار صدقنى اسعارها مش عالية اوى لو قارنتها بالكورى ولا اليابانى دلوقتى ومش الجديد بس ده حتى الموديلات اللى عدى عليها عشرة وخمستاشر سنة هتلاقى قطع غيارها اغلى من عندك
المهم العمرة تكمل على خير والمكنة تظبط معاك اداء واستهلاك وربنا يباركلك فيها يارب
وشكرا على نقل تجربتك بالاسعار وفى انتظار انتطباعاتك عن القيادة والعفشه