نقلت ملكيه و جددت امبارح
باركولى امبارح نقلت ملكيه و جددت 3 سنين لعربيتى الالنترا 2008 و ادى التفاصيل
1- روحت الشهر العقارى اول امبارح كنت هناك الساعه 9 الصبح و الموظفين ابتدوا شغل الساعه 10 و كمان مشتغلوش غير لما الناس اتخانقت معاهم كعادة موظفى الحكومه المهم انا كنت اول واحد وبالتوكيل اللى معايا عملت بيع و شرا لنفسى و دفعت 1340 جنيه رسوم التسجيل 2- بعد مخلصت الشهر العقارى روحت على المرور و طبعا مصدقتش منظر الزحمه عشان انا روحت على الساعه 11.30 و طبعا ملحقتش اعمل اى حاجه عشان شباك المخالفات بيقفل الساعه 12 3- جيت امبارح صاحى بدرى الساعه 7.30 و كنت فى المرور الساعه 8.00 و عملت الاتى * جبت نماذج تجديد و فحص 3 سنين و ورقة الطفايه و دول ب 48 جنيه * اول حاجه و قفت فى طابور المخالفات بس اول ما وقفت قالولى لازم تجيب ورقه كده مكتوب عليها نمرة العربيه القديمه اللى هيا مفيهاش حروف و ارقام فرحت اشتريت الورقه من الكشك و مليتها و وقفت فى طابور تانى و قدمتها للموظف راح كاتب النمره الجديده على الكمبيوتر فراحت طلعتلوا النمره القديمه فكتبهالى على الورقه و رحت ختمتها من الظابط * بعد كده رجعت تانى لطابور المخالفات بالرخصه و الورقه الجديده دى اللى كنت اول مره اسمع عنها المهم دفعت 360 جنيه فى مخالفتين فى حتت عمرى مرحتها المهم انا قلت ادفع عشان اخلص * بعد كده رحت دفعت التامين الاجبارى 300 جنيه لل 3 سنين * و بعدين روحت فحصت * و بعد كده رحت اشتريت طفايه ب 121 جنيه عشان اللى معايا كانت من 2003 و العمر الافتراضى للطفايه 5 سنين بس * بعد كده روحت لشباك نقل الملكيه و التجديد بكل الورق ده و دفعت ضريبه 633 جنيه لل 3 سنين * استنيت الرخصه لغاية ما نادوا اسمى و الحمد لله فى جيبى دلوقت * اجمالى اللى دفعته فى المرور لل 3 سنين 48+360+300+121+633=1462 جنيه و شوية حبشتكنات ب 50 جنيه يعنى دفعت 1512 جنيههههههههه و 1340 تسجيل فى الشهر العقارى يعنى كله 2852 جنيه حاجه تغيييييظ |
رد: نقلت ملكيه و جددت امبارح
الف مبروك يا استاذ فيكتور وربنا يديك خيرها ويكفيك شرها
|
رد: نقلت ملكيه و جددت امبارح
مبروك يا استاذ فيكتور ربنا يبارك لك فيها وتستخدمها فى طاعة الله |
رد: نقلت ملكيه و جددت امبارح
الف مبرووووووووووووووووووك يا معلم
وربنا يديلك خيرها ويكفيك شرها |
رد: نقلت ملكيه و جددت امبارح
شكرا لكل من رد و من له اى استفسار انا فى الخدمه
|
الساعة الآن 04:53 AM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017