حوار مع رجل صينى فى توكيل ابورواش (كلام مهم جدا )
 

صباح الخير ياجماعة امبارح كنت فى توكيل ابورواش عشان صيانة ال10000 كيلو لعربيتى ال516 ولن احكى على الصيانة وماحدث بقدر ماسوف انقل لكم على لسان شاب صينى يعيش ويدرس فى القاهرة ومعة عربية 516 موديل 2010 نبيتى اللون وفأثناء جولتى داخل المركز (لأنى مش بحب اجلس ) وجدت عدة اشخاص متجمعين حول شاب صينى فدخلت معهم وكان لنا هذا الحوار معة وهو يدعى مان سو وعندة 25 سنة ويدرس بالأزهر الشريف وجاى عشان يعمل صيانة ال25000 كيلو لعربيتة وبيتكلم عربى احسن من المصريين نفسهم وكان لنا معة هذا الحوار :

المصريين : ايه هو رأيك فى العربيات الصينى اللى بقت كتير جدا فى مصر ؟
الشاب الصينى : جميعها ناجحة بسبب زيادة الطلب عندكم !!!!

المصريين : واية احسن عربية صينى من وجه نظرك ؟
الشاب الصينى : البرليانس بالتأكيد وكل الصينين دى وجهة نظرهم

المصريين : واية اللى خلاك تجيب الأسبرانزا مجبتش البرليانس لية ؟
الشاب الصينى : لأن سعر البرليانس كان غالى عليا ومقدرتش علية .

المصريين : واية رأيك فى ال516 ؟
الشاب الصينى : عربية مقبولة كويسة يعنى ( قالها وشكلة غير راضى )

المصريين : لية بتقولها وانت متضايق كدة ؟
الشاب الصينى : اصل العربية دى عندنا فى الصين احسن من كدة كتيير جدا وفيها امكانيات احسن من دى 100 مرة وارخص من اللى فى مصر بكتيير اوى اوى !!!


المصريين : ومجبتش العربية A5 من الصين من شيرى لية ونزلتها مصر ؟
الشاب الصينى : ههههه لأنى الثمن اللى هدفعة للجمارك عشان ادخل العربية مصر اجيب بة اعلى فئة للمرسيدس عندنا فى الصين !!!!!!


المصريين : واية رأيك فى التوكيل ؟
الشاب الصينى : عادى الى حد كبير يشبة ما فى الصين من المساحة ولكن اقل بكثير فى التكنولوجيا والخدمة .


المصريين : وانت اية رأيك فى الأسعار بتاعة العربيات ؟
الشاب الصينى : اسعار مبالغ فيها جدا جدا جدا والعربيات الصينى التى تعتقدون انها رخيصة بالسعر دة عندنا يعتبر هذا السعر مبالغ فية جدا ولا توجد سيارة بهذا السعر عندنا ولكن الوكلاء عندكم هم الذين يشترون اى سلعة من الصين بالمواصفات الذين يريدوها هم ويبعونها بالأسعار الذين يريدوها ايضا ولاتكون بنفس المواصفات صاحبة الشركة الأم ( شيرى ) فى الصين !!!!!!!!!!!!!!

المصريين : وياترى الصينيين بيركبوا اية عندكم هناك ؟
الشاب الصينى : ( ارتبك قليلا قبل ان يرد ) وبعدها قال الكورى هناك هو المتفوق فى التاكسى فجميع سيارات الأجرة هيونداى فى العاصمة بكين وباقى السيارات عادى منتشرة .

المصريين : وانت اية رأيك فى الزحف الصينى اللى على مصر فى كل المجالات ؟
الشاب الصينى : لأن الصين شعبها عملى جدا ولايحب ان يضيع وقت ولا دقيقة واحدة والكل يعمل وينتج ويوم الراحة الكل يستريح وهذا مانفعلة .

المصريين : ومارأيك فى السيارة الجاك الجديدة ؟
الشاب الصينى : شركة جاك خططت ان تغزو بهذة السيارة الشرق الأوسط عن طريق البوابة المصرية وهذا ماقرأتة فى احدى الصحف الصينية .

المصريين : اية هو رأيك فى الشعب المصرى ؟
الشاب الصينى : شعب طيب وجميل ومسامح وكنا نحن فى الصين هكذا حتى اوائل الثمانينات وبعد ذلك تغيرنا كثيرا .

المصريين : واية هو اكتر عيب عندكم بتقبلوة من العربيات ؟
الشاب الصينى : اكتر عيب هو ارتفاع سعر البنزين والسولار حيث اللتر يبدأ من 8 جنية مصرى !!!!!!!!!!!!!!!!!!!!!




وفى الأخر عربيتى خرجت من الورشة وروحت عشان استلمها وانا بضرب كف على كف من اللى بيحصل فينا واللى سمعتة وهذ الحوار بالنص ماقالة الرجل الصينى ردا على اسئلة اكثر من 5 مصريين ويارب يعجبكم هذا الحوار

رد: حوار مع رجل صينى فى توكيل ابورواش (كلام مهم جدا )
 

حوار شيق ويحمل معانى كثيرة اهمها ان احنا شعب طيب جدا

رد: حوار مع رجل صينى فى توكيل ابورواش (كلام مهم جدا )
 

جزاك الله خيرا على المشاركة يا باسم بك ... طبعا لا جدال كل كلمة مضبوطة مليون فى المية بس اللى لفت نظرى حكاية الغزو الكورى للصين! يظهر ان كل واحد بيبص على ويتمنى اللى فى أيد غيرة لأنى أعتقد أن العربيات الصينى فى الصين لا تقل عن الهيونداى بأى حال من الأحوال والله أعلم.

رد: حوار مع رجل صينى فى توكيل ابورواش (كلام مهم جدا )
 

رد: حوار مع رجل صينى فى توكيل ابورواش (كلام مهم جدا )
 

فعلا يااستاذ باهى التاكسى هناك كلة هيونداى على حسب كلام الراجل بس طبعا مش هيونداى زى اللى عندنا هنا ههههه