صيانة الألف كيلوا للعربية جاك a107 الهاتشباك

1- بعد ما روحت مشوار علقة مووووووووت لقيت واحد عنده تشعين سنة هو اللى بينظم عملية الدخول والخروج والدنيا بايظةلانهم توكيلين جاك وجيلى وطبعا ده عك

2- بعد ما دخلت واحد سجل اسمى على الباب وقاللى اقف فى اى جنب ركنتها ومفيش اى حد معبرنى

3- نزلت روحت داخل على مكان اللى هو المفروض ينتظر فيه الناس سيارتهم ويشاهدوا ما يحدث بالداخل .

4- دخلت على موظف الاستقبال قاللى عايز تعمل ايه وبتشتكى من ايه طبعا اديتوا كذا حاجة بشتكى منها فى العربية وسجل كل اللى قلته ومضانى عليه ومضانى كمان على صيانة الالف قبل ما تتعمل .

5- بعد كده خرج معايا واحد يستلم منى العربيه راح مدخلها المكان اللى هيتعمل فيه الصيانة .
6- راحوا منزلين الزيت القديم وصدقونى من غير ما احلف الناس اللى بتشتغل تحسوا لسه نايمين متفهموش فى حاجة غلط المهم نزلوا الزيت القديم وحطوا الجديد.
7- طبعا فى الصيانة بيقولوا بيربطوا العفشة ده محصلش بس هما قالوا حصل
8- قالوا بيكشفوا على الانوار محصلش والعدادات برضوا محصلش العداد بتاعى بيهنج كتير وساعات يشتغل وكتير بيعلق .
9- الميكانيكا قلتلهم قى تخبيط فى دواسة الدبرياج وحوض الماتور فى زى صوت سير عالى وهو بيلف مش عارف ليه برضوا ما اتعملش .

10- فى الاخر بقلهم انا بقالى 3 ساعات فين العربيه كل ده قالوللى بتتغسل المهم طلعت العربيه والله اكن محدش لمسها رشوا عليها خرطوم ميه من بره وشكرا لا الزجاج اتعمل من جوا ولا حد لمس الدواسات شالها من مكانها ونضف خرجت زباله .

11- بعد ما خرجت قلتلهم دى متغسلتش واحد هناك بدون ذكر اسماء نده على بتاع الغسيل وعمل حوار وزعقله وعمل قال انه خايف على العملاء لا يضيقوا وقالوا خدها ونضفها تانى المهم خدها ورجعها زى ما كانت عطل بس وقت عشان يحسسنى انه غسلها المهم خدت عربيتى ومشيت .

11- تخيلوا بقى انا غيرت زيت وفلتر وزيت فتيس فى اد ايه وبكام .

12- التغيير كان فى 3 ساعات انا دخلت الساعة 9.30 طالع 12.35 ودفعت 187.50 مش مشكلة الحساب على اد النظام انه مش حلو والنضافة مش حلوة واسلوب التعامل انا عن نفسى شايف انه مش ظريف .

وانا اسف انى قلت كل الكلام ده بس انا قلته لسبب لانى دى عربيتى وحلمى يبقى توكيلى احسن حاجة فى الدنيا واحسن من توكيلات عربيات صينى تانيه اكتير اقل من الجاك وعيب على فكرة الكلام ده . وللمرة الأخيرة العربية حلوة حرام انها تضيع بسبب توكيل مفهوش اهتمام بالعملاء للدرجة دة ويارب فى الصيانة الجاية يكون اتحسن الوضع انا عارف ان الوضع مش هيختلف عشان كلامى ده مش هيفرق مع حد.