|
ايه رأيكم في فيات سيينا
اخوني الكرام
عمال الف وادور علي عربيات واتفرج لغاية ما جالي اكتئاب يمكن عشان بشوف عربيات مضروبة بالنار ويمكن عشان حدودي السعرية ضعيفة المهم مش هتعبكوا معايا انا معروض عليا سيينا 2001 فابريكا برة وجوة 1400 سي سي كاملة مانوال ممكن تقييم فني للسيارة وشكرا |
رد: ايه رأيكم في فيات سيينا
السيينا ال 1400 كمجمل كويسه
اساسياتها موتور و فتيس ممتاز .. ناعمه جدا و سحبها ممتاز بالرغم انها 1400 سي سي 8 صباب ثبات متوسط على السرعات لأن اغلب وزن العربيه قدام .. وشنطه طويله العفشه خفيفه شويه ... التقفيل مصري طبعا وفيه عيوب التجميع المحلي .. كمثال كاوتش الابواب ممسوك بكلبس بلاستيك .. قطع الغيار متوفره وموجوده لكن طبعا مش زي الاكسنت او الانوس سواء كتوافر او اسعار ونفس الكلام بالنسبه للصيانه .. الشنطه واسعه جدا جدا .. 500 لتر .. لكن على حساب الكنبه .. ضهرها واقف و اللي يقعد ركبه حتكون في ضهر اللي قاعد قدام العربيه كانت معايا من الزيرو لحد 115 الف .. و كنت مبسوط بيها و الحمد لله ... خصوصا ان معنديش حد كبير يقعد ورايا كعربيه افضلها عن الانوس و الاكسنت .. لكن من حيث الاسعار و قطع الغيار و سعر اعاده البيع .. الكوري يكسب الموضوعات دي ممكن تفيد حضرتك اكتر http://www.masrmotors.com/vb/showthread.php?t=1542 http://www.masrmotors.com/vb/showthread.php?t=5980 |
رد: ايه رأيكم في فيات سيينا
اخي الكريم sam ram متميز كالعادة
اشكرك بشدة - اشكرك بعنف - اشكرك حتي تستغيث من الشكر ptmnlo123per159 جزاك الله كل خير |
رد: ايه رأيكم في فيات سيينا
العفو يا باشا ... دي حاجه بسيطه ..
مش محتاجه كل التشكرات دي ... الغوث .. نفس هوا ptmnlo123per1106 |
اسئلة بخصوص فيات سيينا
السلام عليكم ورحمة الله وبركاته
كل عام واعضاء المنتدي الكرام كلهم بخير كان عندي مجموعة من الاسئلة بخصوص السيينا - انا لسة جايبها من قريب ومش شاطر فيها قوي هيا موديل 2001 والسعة الليترية 1400 سي سي 1- في لمبة حمراء في التابلوه بتاعة الانجكشن - المفروض ان الصبح لما ادور العربية اشغل الكونتكت بس لغاية ما اللمبة تطفي بعد كدة ادور العربية - هل الكلام ده صح ولا غلط؟ طيب ما اللمبة دي احيانا بتنور وانا سايق في وسط اليوم وتقعد فترة كبيرة - دا عادي ولا غلط ولو غلط الصح ايه؟؟ 2- برضه كنت عرفت ان اول ما ادور العربية لازم استني لغاية مؤشر الحرارة ما يتحرك وكمان مؤشر الـRPM ينزل - لكن مؤشر الـRPM بيبدأ عند 9 ويطلع ويستمر طلوعه لغاية 15 - كل ده وانا بسخن وبستني ينزل مش بينزل - واستنيت 15 دقيقة قبل كدة - بيطلع ومينزلش - دا عيب ولا عادي ولو عيب ممكن يكون من ايه؟ 3- كتير قوي بشم ريحة غاز غريبة - مش بنزين ولا عادم - دي حاجة كدة زي النشادر - او الفريون مع العلم اني مش ببقي مشغل التكييف خالص - يعني الرائحة دي موجودة حتي مع عدم تشغيل التكييف؟ حد عارف ايه القصة 4- العربية بتاكل بنزين جامد مووووووووووووت لدرجة اني كنت بحط 92 ونزلت لغاية 90 ومفيش اقل من كدة لاني مش هحطلها 80 ولا بفكر اقلبها غاز - حد عارف دا الطبيعي ولا ايه - مع العلم سواقتي متوسطة من 80 - 100 - لاني بسوق علي الاتوستراد معلش اسئلة كتيرة - بس ان اشاء الله خير منتظر الردود إني احبكم في الله |
رد: اسئلة بخصوص فيات سيينا
اقتباس:
لو اللمبة بتنور و انت سايق يبقى فيه عطل فى جهاز الانحيكشن, ربما من الرشاشات. اقتباس:
لكن ملكش دعوة بعداد الأر بى ام, عند الادارة الباردة فان الانجيكشن يرفع عدد لفات المحرك حتى لا يتوقف عن الدوران, الى ان يسخن المحرك. المفترض أنو العداد ينزل عند 9-10 لما العربية تسخن, أو أعلى شوية لو مشغل التكييف. معنى انو الار بى ام مش بينزل يبقى فيه مشكلة فى منظومة الحقن, و ده واضح من لمبة الانجيكشن المنورة. اقتباس:
بس انا شاكك انو كل المشاكل محصورة فى المشكلة الاولى, اللى هى فى نظام الحقن الالكترونى. و لا تحول السيارة الى غاز, لأن الغاز الطبيعى بيبوظ المحرك تماما بعد فترة قصيرة, الغاز الطبيعى به مادة الكبريتيك التى تتسبب بتأكل المحرك, لو حولت غاز طبيعى يبقى اللى وفرته فى البنزين هتدفعه فى عمرة للمحرك بعد سنة أو اتنين بالكتير. |
رد: اسئلة بخصوص فيات سيينا
بالظبط كده ... زي ما قال مهندس فادي ..
اللمبه نفسها حتى بتكون على شكل رشاش والمفروض او ما تلف المفتاح في الكونتاكت تنور لمده ثانيتين تقريبا و تطفي لوحدها و ساعتها تدور العربيه عادي .. والمفروض انها متنورش تاني .. بتنور بس قبل اداره العربيه لما يكون المفتاح على اول تكه من الكونتاكت فمعنى انها تنور و حضرتك ماشي ان في مشكله في البخاخات الار بي ام عاده على المور و العربيه سخنه بيكون عند 9 .. واول ما تدور العربيه بيعلا فعلا شويه و يبتدي ينزل والعربيه بتسخن .. بس مش لازم تستنى لحد ما ينزل لوحده .. لأن تسخين العربيه بالكامل مبيتمش و هي واقفه التسخين الاولي بيكون علشان بس تحريك الزيت من الكارتيره و دخوله فيجميع اجزاء المحرك .. و بعد كده العربيه تسخن مع المشي موضوع الريحه دي غريبه شويه بس هو كان حصل موقف معايا معرفش ليه علاقه و لا لأ .. اول ما جبت العربيه و انا ماشي مع السخونيه كنت بشم ريحه غريبه و تفضل موجوده لحد ما العربيه تبرد وبعدين اكتشفت ان كان في كيس اسود ماسك في العربيه من تحت و بيسيح طبعا من السخونيه فيطلع الريحه دي .. السيينا 1400 سي سي 8 فالف موديل 2000 .. و كان استهلاكها معايا معقول جدا بنزين 90 كويس جدا ليها .. الصفيحه كانت بتعمل متوسط 280 كم يعني متوسط 7 لتر لل 100 كم ... وارد جدا تكون كل المشاكل اللي حضرتك قلتها يكون سببها واحد .. وان شاء الله تكون حاجه بسيطه و تتحل بسهوله و تتظبط العربيه معاك بس حاول دايما متسيبش التنك يوصل للريسرف .. لأنه بيكون ساعات في رواسب و شوائب في التنك و لما البنزين يقرب يخلص الرواسب دي ممكن تعمل مشاكل ... ودايما ابقى غير فلتر البنزين مع فلتر الزيت .. وابقى طمنا عملت ايه |
| الساعة الآن 07:08 PM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017