رد: تجربة قياده نيسان صني سوبر صالون 2010
 

شكرا علي التقييم الرائع ومبروك علي العربية بس ما تقرصش علي الموتور في اول 3000 كم لينها الاول وبعدين اقرص براحتك

رد: تجربة قياده نيسان صني سوبر صالون 2010
 

الف مليون مبروك يادكتور وانت بس اكمنك واخد ع الشاهين وهيا عربية رخيصة عن النيسان فبتتكلم بطريقة زى متكون حتى خايف الدنيا تنطر فوقها متخافش وجمد قلبك ياعم ولمعلوماتك النيسان اطول واعرض من الكورولا القديم لكن موديل كورولا 2008 ومابعده معرفش زيها والا اقصر وهيا اطول من اللانسر بجميع اشكالها ودى تجربة عمليه يعنى انا منطقة الزيتون ورغم كل العارات اللى فيها جراجات الا ان من كتر العربيات عندنا مش لاقيين اماكن لافى جراج ولاشارع وسبب اقتناعى انها اطول من جميع موديلات اللانسر والكورولا حتى موديل 2007 قبل ميغيرو شكلها ان ممكن مكان ميكفيش انى اركن فيه وخاصة انى ساكن على ناصية فى تقاطع شارعين والاقى العربية شنطتها بره فى الشارع وجارى ييجى يركن اللانسر او الكوورلا فى نفس المكان وتلاقى العربية مش طالعة فى الشارع ثانيا لما سالت عن الزنان او العصفورة فى التوكيل قالو ان العصفورة اللى بتصفر عند 120 كيلو مش موجودة فى سيستم العربية لانى بسوق بسرعات عالية جدا ومبحبش الدوشة وده ميزته انه هيقرفنى ويصدعنى هيخلينى انزل السرعة لكن قالو ده سوفت وير مش موجود وسبحان الله انت استنيت الذهبى اسبوعين وانا استنيت النبيتى اسبوعين واحب اهنيك لانه اشيك الوان النيسان وخاصة لما تتلمع وتتغسل بحس انه شارعنا كله بيتفرج عليها رغم ان فى عندنا لانسر وتيريوس ومرسيدس عيون وغيره من الماركات لكن دى بلونها النبيتى شكلها ابهه جدا انا مش هعرف افتيك فى التكييف لانى مبحبش التكييف اصلا فمبشغلوش الا لو معايا ناس فى العربية او العيلة واللى هقوللك عليه بقى انى وانا بشترى كنت ناوى اشترى لانسر واخدت واحد صاحبى طويل وقلتله اقعد ورايا ورجعت الكرسى بحيث ابقى مستريح فى السواقة فقال انا اتزنقت ولما ركبنا النيسان وعملت نفس الحركة قال انا هنا مستريح اكتر واشتريت النيسان وده يؤكد موضوع الركنة اللى قلته قبل كده بالنسبة لثبات العربية هيا ثابتة لحد 180 كيلو وانا شخصيا وصلت بيها لحد185 وكانت ثابتة بس عند ال185 ثباتها بدا يقل وعموما السرعات العاليه عايز واحد حافظ الطريق وعينه على الطريق لحد مدى البصر مش امام العربية فقط وعل فكرة متخافش على العربية انا مش بقوللك تعمل زيى انا بحملها بالطن الا ربع بضاعة يعنى شغالة نص نقل واخير ا العربية فيها 3 عدادات واعتقد ان اللى بتقراه ده معناه 200 متر و ده معناه ان المعهد الازهرى قريب منكو جدا اخيرا انصحك تقرا دليل التشغيل او الكتالوج لانه واضح من طريقة كلامك انك مبصيتش فيه مع العلم انا استفدت منه كتير واخيرا ربنا يرزقك خيرها ويكفيك شرها اللهم آمين

رد: تجربة قياده نيسان صني سوبر صالون 2010
 

على فكرة يادكتور/// النيسان موتورها فعل صوته اعلى حاجة بسيطة جدا عن اى موتور تانى وده مش هتلاحظه غير لما تقارنها بماركة تانيه لانه موتور قوى جدا بيطلع 118 حصان ومش اى موتور 1600 يخرج 118 حصان كلهم حوالين ال113 حصان ومش انت تلاحظ ده لان العربية لسه جديدة ولسه مركبتهاش كتير ولكن مع الوقت هتلاحظ ثانيا والدك عنده حق بكرة ترميها ف وسط الشارع وانا لسه بركب جديد زى حالاتك كان لو واحد اتركن عليها ازعل جدا لكن لسه قلبك مش تقيل لان فى بلدنا للاسف كثيرون لايحترمون مليكة الغير بل فى ناس بتعتبر اى واحد راكب عربية حديثة حرامى ولذلك ربنا يكفيك الشر كتير انزل من بيتنا الاقى واحد حاككها بعربيته او واحد خابطها او عيل جايب مسمار وكاتب اسمه على الصاج بالمسمار لان حوالينا اكتر من 10 مدارس فى مربع صغير معظمهم بيعدى جنب بيتنا و هما مروحين وتلاقى واحد بيحب واحده جايب قلم وكاتب اسمه واسمها على الزجاج فى الاول كنت بتضايق وبعدين اخدت على كده واشتريتلها غطاء قماش بقى يكتبو عليه وقلت كوي اهو ارحم من الكتابة عليها ومرة اختلفت مع سواق تاكسى داخل عكس واصر بغباء انه لازم اوسع له رغم انه فى اول الشارع يعنى حتى لو الطريق من حقه مش معقول ارجع لاخر الشارع لكن لما اصر روحت نازل وقافل العربية وقعدت على قهوة بعيد وشربت شاى ورجعت لقيته واقف بغباء وانا ورايا طابور طويــــــــــــــــــل و مع ذلك لسه واقف ودى من النكت فعلا ومع الوقت هتاخد عليها ومتخافش اللى مكتوب هتشوفه لكن تبقى حريص بدون خوف وتلتزم قواعد الامان واولها متحطش حد ف دماغك او تتخذ موقف من حد وتجرى وراه او تسابق اى حد وتتنازل طالما فى مصلحة الطريق و مش عيب انك ترجع او تتسامح وانا اخصة بعد موقف سواق التاكسى زعلت من نفسى رغم انه كان غلطان لكن التسامح اولى واهم مرة تانية مليون مبروك

رد: تجربة قياده نيسان صني سوبر صالون 2010
 

معلش ، بس الجملة دى لفتت نظرى جداً ..
لأن ده كان السبب الوحيد اللى خلانى ماشتريش نيسان بالرغم من انى كنت مقتنع بيها جداً ، ومركز الخدمة بتاعها تحت البيت ، وحاسس انها متفصلة علشان اشتريها بس للأسف ضيق الكنبة الخلفية كان واضح جداً خصوصاً لما تكون طويل ومرجع الكرسى ورا شوية اللى قاعد ورا بيبقى مخنوق. فاضطريت اصرف نظر عنها والجأ لعربية أوسع.

رد: تجربة قياده نيسان صني سوبر صالون 2010