مصر موتورز مجتمع السيارات

مصر موتورز مجتمع السيارات (https://www.masrmotors.com/vb/index.php)
-   تجارب اﻷعضاء (https://www.masrmotors.com/vb/forumdisplay.php?f=178)
-   -   تشطيب الشقة و الديكور (https://www.masrmotors.com/vb/showthread.php?t=54189)

lol64 18-04-2011 06:03 AM

تشطيب الشقة و الديكور
 
بما انى تقريبا على وشك افنش تشطيب شقتى الجديده فى المريوطيه
هاكتبلك مراحل مرورى بيها فى خطوات والمشاكل اللى مريت بيها وحليناها ازاى لانها هاتفيد ناس كتير قوى قوى
وهادعمهالكم بالصور من الشقه بتاعتى ويارب تعجبكم
ان شاء الله فى المشاركات القادمه اجمعهم بس

GIFT4UGIFT4U:14369D~149:

sad-bird 18-04-2011 02:25 PM

رد: عن تجربة - تجارب وخبرات فى شتى مناحى الحياة
 
الله الله الله الله
ده الانتخابات عملت شغل اهووووووووو
ماشي ياعم الكبيييييييييييييير

GIFT4U
على فكرة انا كنت عملت حاجة زي كده عن دهانات الشقة
بس تقريبا راح مع اللي راح
ايام الهجمة المرتدة على مصر موتورز
في الموقعة المشئومة اول العام

m.genedy 18-04-2011 03:08 PM

رد: عن تجربة - تجارب وخبرات فى شتى مناحى الحياة
 
موضوع رائع استاذ احمد
دائما صاحب افكار
مختلفة



اقتباس:

المشاركة الأصلية كتبت بواسطة lol64 (المشاركة 403469)
بما انى تقريبا على وشك افنش تشطيب شقتى الجديده فى المريوطيه
هاكتبلك مراحل مرورى بيها فى خطوات والمشاكل اللى مريت بيها وحليناها ازاى لانها هاتفيد ناس كتير قوى قوى
وهادعمهالكم بالصور من الشقه بتاعتى ويارب تعجبكم
ان شاء الله فى المشاركات القادمه اجمعهم بس

GIFT4UGIFT4U:14369D~149:

مبروك عليك الشقة الجديدة
استاذ/lol64
ياريت تقولنا تفاصيلها بقى بالمرة
يعنى سعرها مساحتها كافة تفاصيلها
طلبى هذا لانى من سكان المريوطية
تقبل تحيتي.

sad-bird 18-04-2011 03:16 PM

رد: عن تجربة - تجارب وخبرات فى شتى مناحى الحياة
 
عاوز تدهن الشقة
الميزانية مخرمة
تقدر تعمل حاجتك بنفسك
طيب حضر نفسك وشد الهمة وتعالى ورايا

هنتكلم عن الدهان على اساس ان الشقة مدهونة قبل كده وانت هتعمل التجديد بس مش اكثر
وبعدين نبقى نتكلم على تأسيس الشقة من جديد

1. تفضي نص الشقة او على الاقل غرفة غرفة بقدر الامكان ، لو مش هنقدر نفضي الاوضة خالص يبقى نفضي منها على قد ما نقدر والباقي نخليه في نص الاوضة ونغطيه بمشمع كبير بيتباع عن ايحد بتاع ادوات منزليه
2. تشوف اي تعديلات او وصلات عاوز تعملها في الحيطة او في النجارة ( عاوز توزد فيشه عاوز تعمل مكان لمبة عاوز تريح النجارة عاوز تغير باب )
3. لو عملت اي حاجة فيها تكسير في الحيطة يبقى هتعملها باسمنت يبقى تصبر عليها شويبة قبل ما تدهنها على الاقل اسبوع لو صيف وشهر لو شتاء علشان مش تقبب الدهان من فوقها بعد كده لو مش هتقدر تصبر الفترة دي يبقى تعملها وتزود جبس وربنا يسترها ، وكذلك لو فيه اي اماكن متجرحة في الحيطه او مكسورة بتعملها باسمنت وجبس لو حجمها صغير ولو حجمها كبير بتعملها باسمنت ورمل ( ومن الافضل في الحالة دي يكون مبيض محارة اللي يعملها )
4. تجيب معجون وتقلبه على السكينة وتفرده على الحيطة وتمسحه مسح خفيف على الاماكان اللي فيها اسمنت مرة بالطول من تحت لفوق وثاني يوم او في نفس اليوم اخر النهار تعمل مرة بالعرض من اليمين للشمال وتسيبه يعضم لثاني يوم
5. تجيب صنفرة حيطة تقريبا رقمها 220 وتصنفر الحتت اللي اديتها تلقيط معجون وطبعا مش عاوز توصية لو عندك حساسية متنساش تلبس كماماة او منديل على الانف علشان العفار ولو فيه اطفال طبعا وقت الصفنة ده يكونو بعيد عنها تماما ( لو اني اشك انك هتقدر تمنع طفل انه يعك معاك ده ما هيصدق )
6. الحيطة طبعا مدهونة قبل كده يبقى على حسب الدهان اللي مدهون كان ايه لو كان زيت او لاكية يبقى لازم نديها وش سانيتون ( لاكيه مط ) لعزل الدهان القديم عن الجديد وفيه انوااع كتييييييييييييييييييييير افضلهم سايبس - باكين - كابسي - ناشيونال
طيب لو الحيطة كانت مدهونة بلاستك قبل كده يبقى مفيش مشكلة كل اللي هنعمله هنفضها بالمقشة بس ونديها وش وان كان برضة من الافضل تاخد وش عزل زي الزيت خصوصا الاجناب اللي عليها حركة كتير ومعلمة في الايادي لان غالبا الاوساخ دي بيكون فيهادهون وتراب فيا اما تتغسل يا اما تاخد وش عزل وتريح دماغك
7. تسيب وش المط ينشف من 6-8 ساعات ومن الافضل تكمل تاني يوم الباقي
8. تجيب الدهان اللي انت هتدهنه ( وهتكلم هنا على البلاستيك لانه حاليا هو بقى الشائع دلوقتي )
أ. تجيب نوع بلاستيك نضيف ومش غالي حاجة وسط ولا غالي ولا رخيص
تخففه على حسب التعليمات المكتوبة على العلبة وتزود شوية صغننه كمان
تجيب علب الوان مركزة
فيه انواع كتيرة افضلها سكيب او باكين
بس خلي بالك تحط في الاول كمية
وبعد كده نقطة نقطة لان نقطتين منها كفيلين انهم يغيرولك درجة اللون درجتين على الاقل
لما توصل لدرجة اللون اللي انت عاوزها
تدي الحيطة وش وتراعي دايما انك تكون في اتجاه واحد
يا اما فوق وتحت يا اما يمين وشمال
تسيبها تنشف لتاني يوم او اذا عملتها الصبح تسيبها لاخر النهار وممكن تدي الوش التاني

الوش التاني هنا بقى فيه 3 حاجات
1. ياما تدي وش بلاستك برضة من نفس النوع وفوق منه تدي وش بولش
2. يا اما تجيب كميتون وتاخد شوية على قد الاوضة اللي هتعملها تخففهم وتلونهم بنفس الطريقة وتدي وش
3. انك تجيب بوسة متضربه وبالوان جاهزة من اي مركز تلوين وغالبا بتكون باكين او يوتن او سايبس

خلصت الوش التاني
سيب الحيطة تنشف وعلى حسب بقى انت عاوز تلزق حاجت ديكور او تلون تصميمات على الحيطة او لو الجزء اللي تحت في الحيط مش معموله وزره بتلونه وممكن تعمله اشكال هندسيه وده بيتعمل بلاكيه وباللون اللي انت عاوزه
بعد ما تخلص كل شغلك خالص تنضف بقى الشقة
( مهمات حريمي المفروض بس ابقى قابلني لو عرفوا يعملوها شاطرين في الرغي والاوامر بس والخناق على الالوان )
التنضيف كب مياه على الارض وسيبها ربع ساعه
هات سكينه معجون وحك بيها الارضية ويا سلام لو سلك مواعين من بتاع زمان الناعم ده وتقعد تفرك بيه الارضية هتبقى مرايه
(وبلاش السكينة اللي انت بتستخمدها للمعجون علشان مش تبوط من الحك)

فيه ناس بتجيب ميه نار وتكبها وتمسح وخلاص هيا اسهر واسرع بس مش هتنضف كله ده اولا وثانيا هتطفي الارضية لو سيراميك ولو بلاط عادي هتفور البلاط وتخلي الحصوة بتاعته شكلها بارز

رجع كل حاج مكانها
والف مبروك الاوضة الاولى
وتعالى ورايا على الثانية
ههههههههههههههه








sad-bird 18-04-2011 03:25 PM

رد: عن تجربة - تجارب وخبرات فى شتى مناحى الحياة
 
نسيت حاجة مهمة
السقف
بيتعمل من بلاستيك عادي بيتخفف بس وياخد وشين او تلاته وتسيبه ينشف
بعد كده تجيب لزق دوكو وتعمل علامات على الحيط بالمقدار اللي انت عاوزه بنفس لون السقف وتبدأ مرحلة الدهان الي قلنا عليها قبل كده بس لو هتدهن كيمتون لازم بمجرد وما تخلص وهو لسه اخضر تشيل اللزق لان الكيميتون بيمسك بعضه وبيبقى عامل زي الكاوتش بيمط بمجرد ما ينشف ويشد معاكط تبص تلاقي الجنب طله طالع معاك في اللزق فلازم لازم لازم تخلص جنب جنب على الاقل وتفك اللزق


الساعة الآن 02:32 PM.

Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017