|
صيانة 1000 كم للسيارة مازدا 3 2010
السلام عليكم
بدون مقدمات كتير أنا جايبلكم تقرير عن صيانة سيارتي الجديدة مازدا 3 2010 من داخل مركز خدمة غبور في أبو رواش في البداية أنا اتصلت بالتليفون عن طريق الرقم المختصر لغبور و حولني على مواعيد الصيانة موظف أخد كل بياناتي و بيانات السيارة ( كان ناقص ياخد مقاس جزمتي كمان :) ) و أعطاني الميعاد المناسب لي بناء على اختياري 12/1/2011 المهم استفسرت منه عن الصيانة و اللي حايتعمل فيها فقال لي ان الصيانة مجانية في ال1000 كم و الفلوس اللي حاتدفع لتغيير الزيت و الفلتر حوالي 310 جم و بالرغم من عدم اقتناعي بتغيير الزيت عند أول 1000 كم بس قلت مش مهم في سبيل الضمان و أنا من النوع اللي مابحبش أعمل مشاكل قلت له إن العربية عاملة 1200 كم , فقالي مش مشكلة معاك لحد 2000 كم الميعاد كان الساعة 12 ظهرا توكلت على الله و سافرت و كنت عندهم حوالي الساعة 11:30 صباحا طبعا مالقيتش غير عربيتين غيري مستنيين برة و اتضح إن واحدة منهم خلصت و من الملاحظ إن السيارة لسة مانتشرتش حتى في القاهرة ( ولو انها أكتر من اسكندرية شوية ) و رأيي في قلة انتشارها في اسكندرية هو عدم وجود مراكز خدمة حتى الان ( مش عارف ليه ؟ و مستنيين أيه ؟ ) المهم استقبلني موظف استقبال مهذب و رحب بي جدا و صراحة الناس هناك كلهم محترمين جدا و كان عندي شوية استفسارات قالي حانجاوب على كل استفساراتك بعد فحص السيارة بس طبعا كلكم عارفين القاعدة الغبية لمراكز الصيانة: ممنوع تواجد المرافق مع المريض في العناية المر ... قصدي تواجدك مع العربية في الصيانة على العموم وافقت على مضض و جلست في الاستراحة لحد ما يخلصوا , قالي العربية قدامها ساعتين أو أقل المهم المركز مش شيك قوي و صغير شوية بس نضيف و منظم طبعا في خلال الساعتين انتظار هريت موظف الاستقبال أسئلة ( ممكن أقولكم عليها بالتفصيل بعد كدة ) و الناس صراحة صمدوا أما تلال الأسئلة المهم بعد أقل من ساعتين لاقيتهم بيبلغوني إن السيارة كدة خلاص تمام و اتفضل إدفع الفاتورة و استلم عربيتك دفعت المبلغ 305 جم بالتمام و الكمال و بدون تعقيدات استلمت العربية بسرعة , و كانوا غاسيلنها مخلينها زي الفل و مشيت قبل ما أكمل الساعتين و بلغوني إن الصيانة الجاية بعد 10000 كم من الكيلومتر الحال اللي كان ساعتها 1800 كم الخلاصة: الناس محترمين جدا حتى الان و لو اني قلقان من كام موضوع كدة حاقولكم عليهم بعد كدة و أي سؤال أنا تحت أمركمGIFT4U |
رد: صيانة 1000 كم للسيارة مازدا 3 2010
مبروك ياعلوه الف مبروك العربيه انا لما نزلت الاجازه اللى فاتت القاهره شفتها كتير قوى
لا ابتدت تنتشر ايه اخبارك مع العربيه يارب خير ان شاء الله وطمنا عليها |
رد: صيانة 1000 كم للسيارة مازدا 3 2010
الف مبروك و عقبال صيانه المليون كيلو
انا زيك برضه مش مقتنع بتغير الزيت قبل 5000 كم علي الاقل بس عموما مش مضر بس ايه الاسئله اللي سئلتها للموظف و ردوده سببت الشك ليك؟ |
رد: صيانة 1000 كم للسيارة مازدا 3 2010
اقتباس:
هي بدأت تنتشر بس مش أوي لدرجة اني لما بشوف حد راكبها بازمره و أرعشله و هو كذلك برضه :):) اقتباس:
صاحي لحد دلوقتي , على غير العادة إن شاء الله خير علشان خاطرك حاكمل الموضوع مع اني ماكنتش ناوي أكمله دلوقتي :)( للتشويق ) , بس واضح إن مفيش حد مهتم بالمازدا قوي 1- طبعا أول حاجة سألت على قطع الغيار فجيبتهالكم بس دي عايزة موضوع مستقل و تفرد صحفي خاص و جائزة من المنتدى :) 2- سألته على الهواء البارد يأتي من فتحات تكييف السيارة عند وضع الهواء من الخارج من أسفل الزجاج الأمامي فقط , كنت شاكك إن التكيف بيشتغل بالغلط فقالي إن التكييف مش شغال على الوضع دة إلا لو شغلته , بس مش عارف , لحد دلوقتي حاسس إن الهواء أسقع من درجة حرارة الجو الخارجي لدرجة إنه أحيانا بيشبر الازاز 3- كان فيه جزء صغير جدا في حرف الباب الأمامي شمال ( دائرة قطرها 5مم تقريبا ) زي ما يكون البوية متقشرة فيها ( مش مني و الله أنا استلمتها كدة ) و لا أظن إن صاحب المعرض اللي اشتريتها منه لأنه لا يوجد اثار أخرى لخبط أو احتكاك فقالي إنها لا تمثل أي مشكلة و لا ضرر على الصاج مستقبلا , و دي برضه شاكك فيها 4- استهلاك البنزين عالي حبتين فقالي إن ده طبيعي , و دي أكتر حاجة مستغربها حوالي 10 لتر لكل 100 كم ( متوسط مدينة و سفر ) أنا حاسس إنه عالي جدا + إن احتياطي التانك كبير جدا , اللمبة بتنور و بيكون فاضل حوالي 13 لتر في الخزان برضه لا تعليق ودي من أكتر الحاجات اللي مدايقاني لحد دلوقتي |
رد: صيانة 1000 كم للسيارة مازدا 3 2010
بسم الله ما شاء الله الف مبروك يا استاذ علي وربنا يديك خيرها ويكفيك شرها والعربية بسم الله ما شاء الله ممتازة ومنتشرة عندنا كويس وحتة البنزين ده استهلاك طبيعي للعربية في مرحلة التليين فقط وهتتظبط معاك بعد كدا متقلقش
|
| الساعة الآن 04:01 AM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017