مصر موتورز مجتمع السيارات - شكرا احمد حنفى محفوظ بالمعادى حلال مشاكل التكيف و صانع البسمه على وجوه اعضاء مصر موتورز

السلام عليكم ورحمة الله وبركاته

انا المره ديه مش عارف ابدء موضوعى منين بالظبط

بس هبدائه فعلا انى اشكر الاسطى احمد حنفى محفوظ اللى بجد فرح ناس كتير اووى من مصر موتورز راحوله علشان يحل لهم مشاكلهم والحمد لله بالرغم من ان مشاكلهم كانت فعلا مستعصيه ومحدش عارف يحلها الا انه حلها وانا من ضمنهم وكله طبعا بفضل ربنا عليه

تبداء حكيتى مع الاتى انا انسان بكره شىء اسمه الحر بكرهه بمعنى الكلمه وفى الحر بصدع ومبعرفش اعمل اى حاجه وضغطى بيرتفع وحالتى بتبقى حاله هههههه المهم التكيف بتاع الاكسيل عندى كان تعبان جدا تبريد مقبول او نقدر نقول كويس بس قوة الهوا كانت ضعيفه جدااا وكان املوش اى لازمه فى الحر يمكن بليل بس كان ممكن ليه لازمه شوية بس الصبح مالوش اى تلاتين لازمه

المهم بدائت قصتى انى عاوز اظبط التكيف فانا جيت اتناقش مع الاسطى احمد على التكيف بتاعى وازاى اظبطه فقلتله انا هروح اجيب مروحه استيراد قالى روح بس العيب عند مش عيب مروحه قلتله خلاص انا بعد صلاة الجمعه رايح على بتاع الاستيراد وقلتله عاوز مروحه تكيف اكسيل بتاعت الطابلوه فجابلى واحده فقمت مركبها قدامه طلع نفس قوة الهوا هو هو قلتله مالهاش لازمه راح واخدنى على المخزن فكينا مروحه من تلاجه اكسيل مقفولة و جيت ركبت المروحه وبرضوا هى هى نفس قوة الهوا فقلتله هى هى نفس قوة الهوا فقالى خلاص يبقى مش مروحه طبعا انا سمعت كدا وقمت طيران على الاسطى احمد فاول ما شافنى قالى هاااا قلتله مطلعش عيب مروحه لقيته ضحك وقالى عيب مش قولتلك قلتله امل ايه قالى ده عيب تلاجه مسدوده قلتله طيب بص بقى انت الناس بتجيلك من اخر بلاد المسلمين عندهم مشاكل الدنيا كلها وانت بتعملهلهم اجى انا فى مشكلتى ديه وانت صحبى ومتعملهاليش راح ضحك قالى خلاص بكره السبت اللى هو النهارده هعملهالك ان شاء الله المهم روحت ونمت وصحيت تانى يوم طيران على جمعتى خلصت اللى ورايا وروحت على الاسطى احمد المفروض عنده اربع صنايعية شغالين معاه مجاش منهم غير صبى صغير مساعد بس والباقى مجاش والتلاته اللى باقين منهم اتنين صنايعية كبار و واحد صبى صغير فمعنى كدا ان الاسطى احمد شغال لوحده المهم قلتله ايه قالى اديك معايا اهو المهم كان عنده شغل كتير وشوية وعضو من مصر موتورز اتصل بيه وقالو انه جاى دلوقت وبعديها بشوية عضو اخر من مصر موتورز اتصل بيه وقالوا انه جاى فى الطريق وفعلا مفيش عشر دقايق والعضويين كانوا عند الاسطى احمد رحبت بيهم وعرفتهم عن نفسى وبداء الاسطى احمد فى الشغل فى العربيه الاولىى كانت بيجو وكان واضح انها تعرضت لعمليات لعب من بتوع التكيف كتتتتير جدااا وكان ظاهر عليها فعلا واختصار لقصتها كان واحد بتاع تكيف قال لصاحب السيارة انه هيغير فلتر بتاع فريون وحاجات تانية كتير مش متذكرها حاليا المهم الاسطى احمد كبس هوا طلع فيه خرطوم ضارب قام جايب خرطوم اخر وكبسه وركبه ووكله تمام تمام قام كبس دايرة التكيف بالهوا وسابها بعدها بعشر دقائق صاحب السيارة قال للاسطى احمد خلاص الامبير تمام فالاسطى احمد قاله لا نسيبها شوية وفعلا بعد ساعه كاملها من كبس الهوا طلع فيه تسريب خبيث والامبير بتاع الضغط نزل شوية بسيطه جدااااا فساعتها كان الدنيا ضلمت واتفق صاحب السيارة انه هيكملها يوم الاتنين لان بيته بعيد وطبعا الاسطى احمد غصب عنه بسبب ظروف انه شغال لوحده اتفق معاه على يوم الاتنين يكملوها واثناء الشغل فى البيجو الاسطى احمد كبس هوا فى سيارة العضو الثانى وكانت رينوا موديل تسعينات او اواخر تسعينات وطلع ان السربنتينه مخرومه فبعتنى مع العضو عند واحد بيلحم سربنتينات فلقينا ان امكان اللى فيه التسريب مكون من جزئين جزء المونيا و الجزء الاخر نحاس فبالتالى هيفشل موضوع ان السربنتينه تتلحم وكدا خلاص الله يرحم السربنيتينه فاتفق العضو مع الاسطى احمد على ان الاسطى احمد يجيب سربنتينه له بدل القديمه وساب له مبلغ من المال علشان يشترى السربنتينه طبعا انا فضلت مع الاسطى احمد اليوم ده كنت صبى معاه وليا الشرف طبعا لغاية ما جات الساعه 9 كان كل الزباين اللى فى الورشه خلصوا شغلهم وكان فيه ناس كتير فعلا انا طلع عينى فى اليوم ده هههههههههههه المفروض كان يدينى يوميه المهم خلاص مبقاش فيه غيرى والاسطى احمد وياسر الصبى بتاع الاسطى احمد فبدائنا الشغل جينا حالينا جزء من الطابلوه وجينا نشوف فقالى تعالى بس وجيت ابص على التلاجه وعينك ما تشوف الا النور التلاجه عليها طبقة تراب مغطيها كلها قالى كدا لازم هنفك التلاجه ونشحن فريون قلتله بص الى انت شايفه اعمله بدون متسألنى راح فعلا فاكك التلاجه وفكينها لقيناها فعلا بايظه خالص من التراب واتضح ان التلاجه واضح انها لسه جديده اعتقد صاحب العربيه اللى قبلى كان لسه جايبها المهم قالى استنى نشوف الاكسبنشن تيوب وبنبص وعينك ما تشوف الا النور الاكسبنشن تيوب سايح جوه وحالته حاله فالى استنى هنحاول نطلعه جينا نطلع منفعش نزل منه فرافيت صغير جدااا قالى ده سايح جوه ولولا انك مش بتشغل التكيف كتير كان زمان الكباس قفش منك المهم قلتله طيب والحل ده مش راضى يطل من مكانه قالى يبقى هنسخن و نكبس هوا وفعلا سخنا المنطقه ديه بسيطه على اد بس ان ان البلاستك اللى جوه يسيح وهوب كبسنا الهوا كل الحاجات اللى كانت جوه خرجت من التلاجه الحمد لله ونضفنا كويس مكانه وركبنا الاكسبنشن تيوب

بص الفرق بين الاكسبنشن تيوب الجديد اللى على اليمين و الاكسبنشن تيوب القديم اللى هو عبارة عن شوية التراب الاسود اللى على الشمال

https://fbcdn-sphotos-g-a.akamaihd.n...49011295_o.jpg

المهم ظبطنا كل حاجه وغسل التلاجه كويس لغاية ما بقت بحالة طبيعية وركبنا كل حاجه وكبسنا دايرة التكيف سيبناها وقت طويل والحمد لله مفيش اى تسريبات و جائت اللحظه الحاسمه

مرحلة شفط دايرة التكيف انه بيعمل شفط لاى هوا بداخل دايرة التكيف بحيث ان الدايرة ميكونش فيها غير فريون صافى فقط
وبعدها هوب شحنا وبجد كان احساس رائع لما تلاقى الهوا بقى جامد و التبريد اكثر من رائع بجد بسم الله ماشاء الله ربنا يباركلى فى التكيف وربنا يبارك فى الاسطى احمد بجد انا مبقتش مصدق عنيا من التكيف ياااه يعنى انا كان عندى تكيف كدا وبجد بقيت مش عارف اشككر الاسطى احمد ازاى

وفعلا ظبط كل حاجه وقفلنا وروحت وانا مش مصدق نفسى بجد ومستنى بكره بالعافيه علشان اركب العربيه تانى واجرب التكيف ان شاء الله

والتكلفه كانت كلاتى

اكسبنشن تيوب 30 جنية

شحن تكيف 150
مصنعية فك تابلوه وتلاجه وخلافه 50 جنية

وبجد الحمد لله

وديه معلومات الاتصال بالاسطى احمد وليه مواضيع كتير هنا فى قسم التكيف ياريت تشوفوها

وحاليا هو عامل حملة كشف مجانى لكل اعضاء مصر موتورز فقط اتمنى تلحقوا تكشفوا على تكيفاتكوا بدون اى مصاريف

وبيركب تكيف ساندن لجميع انواع العربيات حتى ال 128 1100 سى سى او حتى ماروتى 800 سى سى

للاتصال او الاستفسار

اسم المهندس: أحمد حنفى محفوظ
رقم التليفون:01065020100
العنوان : شارع التعاون بالمعادى قريبا من نادى المعادى و جامع الفتح الاسلامى و مكتب صحة المعادى
التخصص : كهرباء وتكيف لجميع انواع السيارات بمختلف انواعها وموديلاتها

و

السلام عليكم ورحمة الله وبركاته