|
ايه رأيكو في بي ام 320i مستعملة موديل 2009
العربية معروضة بحالة ممتازة جداً بس موديل 2009 وواقفة عليا ب 195 الف
تفتكرو تستاهل ولا متستاهلش ؟ بس العربية دي لو عملت احتياطاتي وعملتلها صيانة من ما جميعه حتتعب معايا بسرعة ولا حتشتغل تمام كأنها جديدة |
رد: ايه رأيكو في بي ام 320i مستعملة موديل 2009
طيب مبدئياً هى من احسن موديلات الفئه التالتة فى مصر ومفيهاش مشاكل الفتيس اللى كانت فى موديلات 2006 - 2007
بس المهم انت احتياجاتك ايه وطبيعة استخدامك وهل جمعت معلومات كافيه عنها ولا لسه يعنى عارف طبيعة العفشه بتاعتها وانها ناشفه وواضيه عن الارض وان مفيهاش كاوتش استبن والحاجات الاساسية ديه يعنى ولا لسه |
رد: ايه رأيكو في بي ام 320i مستعملة موديل 2009
الله يخليك على المرور الشريف يا استاذ
في الواقع انا عارف البي ام واطية بس تعتقد ان دي ممكن تضايقني لو اخدت المطبات واحدة واحدة ؟ ولا بردو حتتعبني ؟ انا مجربتهاش بس موضوع العفشة دا انا مسمعتش عنه قبل كدا في البي ام بس ممكن تقولي إزاي نتفادي النشوفية دي ؟ وموضوع الاستنبن دا مقدور عليه إن شاء الله انا اللي عجبني في العربية ان سعرها كويس خصوصاً ان العربية ممتازة ومافيهاش اي حاجة غير انها وخدة رشة جانبية بسبب بعض الخدود بس رجعت زي الاول |
رد: ايه رأيكو في بي ام 320i مستعملة موديل 2009
بس في حاجة كمان على فكرة العربية موديل 2009 بس ماشية 100 الف كيلو وزمنها عدت كمان
انا حابب اني اعرف بس هو دا احسن اختيار بالنسبة للسعر المحدد (195 الف) ؟ ولا في حاجة اقوى منها ؟ هي حالة العربية من الخارج كالزيرو والعربية بيقول انها اكتر من ممتازة بس طبعاً التوكيل والمعاينة الكاملة حتثبتلي إذا كان كلامه صح ولا غلط وبالمناسبة العربية دي اعلى فئة اللي فيها ستارت إنجين وفتحة سقف ومثبت سرعة وخلافه بإنتظار حضرتك |
رد: ايه رأيكو في بي ام 320i مستعملة موديل 2009
بص موضوع العفشه والمطبات ده اساسه ان الطرق بتاعتنا متنفعش غير للعربيات الكارو
فانا مثلاً كنت مقسم المطبات نوعين عائلى وفردى العائلى ده مطب ممكن ميكونش عالى اوى بس لو انت مركب حد معاك فى العربيه لازم هيحك فى العربيه من تحت والفردى ده سواء كنت مركب معاك حد او حتى بطولك فى العربيه برضو هيحك وما ادراك ما الحك يا عم الحج هتحس انه بيحك فى قلبك من جوة اينعم العربيه مصفحة من تحت بس انا شوفت عربيات حديثة برضو التصفيح بتاعها من تحت مكسر ومبهدل بسبب الطرق برضو وبالنسبة للنشوفيه ممكن تبقى غريبة عليك لو راكب يابانى او كورى قبلها لكن هتحس بقيمة النشوفيه ديه بشكل غير عادى مع الملفات وعلى السرعات هتلاقي العربيه مكلبشة فى الارض يعنى باختصار هى عربيه ممتعة جدا فى السواقة وخاصة للى بيجرى ويهمة الثبات والاداء الرياضى بس فى الطرق بتاعتنا صعب يعنى فى شوارع مثلاً هتلاقى نفسك مينفعش تخشها خالص او تلاقى نفسك لازم تحسس على المطبات واللى وراك يتغاظ منك ويطلع منك ويرميلك كلمتين من نوع ابقى حطها فى الفاترينا بدام خايف عليها كدة اه نسيت قولك موضوع انها راشه جنب واحد سيبك منه الا لما تشكف عليها علشان انا نص العربيات اللى شوفتها اصحابها بيقولو كدة ولما تكشف على الجهاز تلاقيها راشة حزام او الخوارج كلها وده فى البى ام بينزل من سعر اعادة البيع جداً ويتقل بيعها فلو كدة خدها برضو مفيش مشكلة بس بتمنها وبالنسبة للرينج ده ممكن يركبك الفئه الخامسة موديل 2006 او 2005 بحالة حلوة برضو لكن انا افضل الفئه التالتة ال 320 لانها عمليه اكتر فانت توكل على الله واكشف بس فى مركز خدمة معتمد او فى التوكيل نفسه او لو من القاهرة ممكن اوصفلك اماكن ارخص تكشف فيها وتعرف كل عيوبها ومصاريفها وتحت امرك فى اى استفسار |
| الساعة الآن 06:56 PM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017