|
ممكن حد يكلمني عن البيرسونا بصراحة
السلام عليكم
شباب انا بقيت متحير في البيرسونا دي , في ناس شجعتني عليها و ناس قالتلي لا بلاش دي عربية مش معروفة و الميكانيكة مش هيفهمو فيها و صيانتها مش معروفة , وناس قالتلي صوتها بيعلى بعد كام سنة, و ممكن تخسر فيها لو جيت تبيعها , و خليك في المعروف و انا كنت بقارنها مع هيونداي (ماتريكس) يا ريت تفيدوني ... شكرا... |
رد: ممكن حد يكلمني عن البيرسونا بصراحة
اهلا بيك اولاً فى مصر موتورز ويارب نقدر نفيدك فى اختيارك مبدئياً لو هنقارن بين الاتنين مينفعش خالص نغلب عربية عن التانية لان كل عربية فيها مزايا وعيوب غير التانية الماتريكس منتشرة واسهل فى صانتها وقطع غيارها واعادة البيع بالاضافة لكونها عربية واسعة وعملية فعلاً بس فى المقابل العربية تفتقر لكماليات ووسائل امان كتير والانتشار زى ماهو ميزة اقتصادياً ممكن يكون عيب لناس متحبش تركب عربية منتشرة وكل الناس راكبها البيرسونا موتورها رائع فى الإداء ومفيش مواتير من النوع ده (الكام برو) قدمت علشان يطلع لها صوت اساساً والمواتير اللى قبل كده كانت مواتير متسوبيشى زى الويرا لكن الكام برو حاجة تانية ومحدش اشتكى منه ابداء بالعكس كل الناس اجمعت على ادائه بس فى المقابل العربية مش منتشرة بشكل كبير وبالتالى خيارات قطع الغيار والصيانة محدودة اكتر من الهيونداى عامة لكن مش كارثية وليها مراكز خدمة معتمدة غير التوكيل والدنيا ماشية برضو وبالتالى مع إداء العربية الرياضى وتميزها والكماليات ووسائل الامان تعتبر كقيمة مقابل سعر صفقة رابحة جداً علشان كده محدش يقدر يفضل عربية عن التانية عامة لكن كل واحد ليه حسبتة الخاصة واولياتة |
رد: ممكن حد يكلمني عن البيرسونا بصراحة
نصيحة اركب زي الناس وخليك في الماتريكس وكفاية انك لما تحب تغير العربية هتبيعها علي طول وثمنها فيها
|
رد: ممكن حد يكلمني عن البيرسونا بصراحة
هيا المقارنه صعبه شويه .. لأنها بين عربيتين مختلفتين في التصنيف و في حاجات كتير ...
الماتريكس محفوظه و بقالها فتره ومتجربه ... فتعتبر صفقه مضمونه ... البيرسونا جديده نسبيه لكنها سيدان الجين 2 بالموتور الكامبرو الجديد ... و طبعا الجين 2 ادائها لاغبار عليه .. الماتريكس تقفيلها كويس و ادائها كويس و كمجمل كويسه .. لكن مفيهاش اي عوامل امان الا الحزام علشان قانون المرور مش اكتر !!! البيرسونا يقال ان فيها مشاكل تقفيل .. لكنها بسيطه و مقبوله الي حد ما بالنسبه للاغلبيه سعر اعاده البيع الافضليه للماتريكس الصيانه و التوكيل الافضليه للماتريكس الشكل و الاوبشنز الافضليه للبيرسونا الاداء الافضليه للبيرسونا الماتريكس MPV يعني عربيه عائليه عمليه من الدرجه الاولى ... و الراحه قبل اي حاجه تانيه سقف عالي و كراسي عاليه و كنبه بتتحرك لقدام و ورا وضهرا بيميل زي الكراسي الاماميه .. يعني اللي يقعد ورا تقريبا زي اللي يقعد قدام ... شنطه حجمها ناتج من الارتفاع على حساب العمق ودي ميزه او عيب حسب نوع الاستخدام و الاحتياج ... البيرسونا عربيه سيدان بالمفهموم التقليدي اللي اغلب الناس بتفضله عن اي شكل تاني ... مش بحاول احير حضرتك .. لكن بحاول اظهر نقاط الاختلاف اللي اعرفها و المقارنه ترجع ليك ... لكن في رأيي البيرسونا تتقارن بالنيو اكسنت او الياريس باعتبارهم نفس الفئه ... |
رد: ممكن حد يكلمني عن البيرسونا بصراحة
شكرا يا شباب بجد على اراءكم الحكيمة افدتوني و و ضحتو ليه الفروق بصراحة ووضوح فعلا المنتدى ثري بيكم و بمعلوماتكم
اما بالنسبة للشرى اعتقد ان انا هفكر في حل وسط لكن هيخليني ادفع شوبة , و هو الاوبترا و شكرا جزيلا |
| الساعة الآن 12:23 PM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017