يفرق في ايه الكاسيت الصيني ابو 100 جنية عن البينوير ابو الف
 

انا اشتريت عربية مستعملة و نظام الصوت فيها تعبان اوي و البلاير بيجيب راديو بس و مركة مجهولة و مش ديجيتال عبارة عن حلقتين واحدة للصوت و واحدة لتغير تردد المحطة و في النص شريط بيجيب ان واقف علي تردد كام .
طبعا حاجة تعبانة فكنت عاوز اجيب حاجة نضيفة و بتشغل Usb و cd فكنت عاوز اعرف ايه الفرق بين الصيني ابو 100 جنية و الحجات السوني و البيونر المعديا 400 و 500 جنية ( بعيدا عن الشاشات التتش و gps ) برضة لو عاوز اغير النظام الصوتي كلة يعني 4 سماعات و صب بازوكا هيفرق فيه اي الصيني عن السوني
و اخيرا استفسار صغير ال amplifer و gm ايه دول و فيدتهم ايه ؟

رد: يفرق في ايه الكاسيت الصيني ابو 100 جنية عن البينوير ابو الف
 

دا هتغيرة كل سنة ودا مش هتغيرة لحد ما تبيع العربية عيوب الصينى بعد سنة او اكتر هتلاقية بيقطع صوت

رد: يفرق في ايه الكاسيت الصيني ابو 100 جنية عن البينوير ابو الف
 

بص ياباشا رد ميمو اضيف عليه + 1 , يعنى كلامه مظبوط مية فى المية

السماعات الصينى ممكن لما تعلى الصوت اوى تضرب ,, ممكن ترجب جى ام ,, الجى ام دا ماكينة صوت بتشغل السماعات بجودة عالية وبتضمن لك ان مفيش حاجة تتحرق والضامن هو الله طبعاً

الجى ام دا ممكن يتوصل عليه الصبات الكبيرة زى البازوكا والحجات دى

ولو ركزت مثلاً فى عربية مركبة طقم صوت حسيت ان الشنطة بتتنطط من الزنة اللى فيها يبقى وانت مغمض تعرف انها مركبة الجى ام دا

دور فى القسم نفسه الى انت عامل فيه موضوعك دا وان شاء الله هتستفاد , او ابحث فى جوجل ممكن يطلع لك نتائج من مواقع تانية بردو ممتازة ,, يعنى خد معلومة من هنا ومعلومة من هنا وان شاء الله تستفاد

رد: يفرق في ايه الكاسيت الصيني ابو 100 جنية عن البينوير ابو الف
 

طب و ال amplifer ?

رد: يفرق في ايه الكاسيت الصيني ابو 100 جنية عن البينوير ابو الف
 

بص بقه يا باشا

الفرق بين الصيني و الماركات العالمية زي البايونير و خلافه

الموضوع عبارة عن فرق كلي زي كده لما نقول ايه الفرق بين الزازستافا 750 (مع كامل احترامي ) و الهيونداي النترا مثلا؟ الاثنين عربيات و الاثنين ليهم موتور و 5 فرد كاوتش و دركسيون و كراسي و .......

الوحدة الرئيسية (كاسيت او سي دي )

قدرة دائرة الصوت من حيث القوة (وات) و النقاء للصوت هي المعيار الفاصل في الموضوع ، الاجهزة الصيني بتلاقي مكتوب عليها 100 وات او 500 وات او 1000 وات مثلا (الوات ده هوه وحدة قياس الصوت الخارج) و بيكون الفعلي 5 وات او 10 وات مثلا . و كمان علشان الدائرة تعبانه و تصميمها علي قده قوي لما بتعلي الصوت بتلاقي لغوشة و خنقة و تداخل في النغمات و كمان الاجهزة النظيفة بها مثبت للتيار علشان الشحن بتاع الدينامو لو زاد او نقص و مداخل و مخارج متعددة للتوصيل

الاجهزة الغالية او الماركات العالمية بشكل عام تلتزم باتباع مقاييس عالمية في المواصفات المادية (الخامات) و القدرة الفعلية (الوات) اللي علي الجهاز ، تلك المواصفات تضمن لك ان المكتوب علي الجهاز بيبقي هوه الفعلي و بيكون الصوت محافظ علي نقاؤه حتي مع زيادة مستوي الصوت و بيبقي الوات تقريبا في معظم الاجهزة في حدود 40 الي 50 وات × عدد السماعات الممكن تركيبها (يعني يقول 45 وات × 4 ) يبقي الجهاز قادر علي تشغيل 4 سماعات كل منها بحد اقصي 45 وات

الجي ام و الامبليفير

دول عبارة عن وجهين لعملة واحدة يعني الاسمين واحد و المضمون واحد يعني مثلا زي أ/ أحمد او السيد / أحمد الاثنين تعبير مختلف لمعني واحد

المهم هوه انه اولا و اخيرا جهاز تكبير و تضخيم صوت يعني فكرته انه بيدخل عليه صوت الكاسيت او السي دي بوات معين و بيقوم بتكبيره و اخراجه بوات اخر و طبعا فيه برضه شوية لعب زيادة يعني منه فيه زراير بيتشغل فلاتر معينة لتنقية الصوت او تحسينه بتعلية البيز مثلا او التربل مثلا و شوية حركات كده و الاوبشن دي و الوات بتاع الجي ام همه الاساس في تحديد سعره و كمان فيه منه بيشغل ساب مع السماعات و فيه ما بيشغلهوش بيشغل سماعات بس و فيه منه بيشغل سماعتين و فيه منه بيشغل اربعة علشان كده ممكن تسمع كلمة جي ام 4 شانيل (يعني بيشغل اربع مخارج ) و فيه 2 شانل يعني بيشغل 2 مخرج بس

السماعات

هيه العنصر المسئول عن ترجمة نتيجة كل ما جاء بعاليه و بيختلف سعرها بناء علي

1- حجمها (مقاسها) كلما زاد كلما كان صوتها اقوي بالذات مع البيز (الدبه)
الوات الحقيقي للسماعة (القوة)
2- النوع (يدل علي جودة المكونات من الملف الكهربي و سبيكته و بالتالي المجال المغناطيسي له و مدي توافقه مع المغناطيس الثابت وكذلك مدي جودة و تحمل رق السماعة نفسه و مدي مرونة و متانة الكاوتش اللي ماسك الرق نفسه و اخيرا العمر الافتراضي ليها و مدي قوتها في تحمل الاجهادات العالية و الحرارة و الشمس و خلافه )
3- عدد التويترات (التويتر هو سماعة صغيرة بمواصفات خاصة تكون مسئولة عن اخراج التربلات "السكسكة يعني) فمثلا في بعض الاحيان ممكن تسمع سماعة 500 وات 4 واي و ذلك يعني ان اقصي تحمل للسماعة هو 500 وات و السماعة مقسمة الي رق كبير + 3 تويتر

و من الاخر الصيني المقلد او الماركات المغمورة انساها احسن لانك بتحط فلوس في الارض و لو عاوز صوت رايق و حلو سواء كان واطي او عالي يبقي لازم سماعات نظيفة و انا ارشح الكينوود او البايونير او الكلاريون

ولازم تبقي عارف ان كل سماعه ليها مدي معين من الموجات الصوتية بتستجيب له يعني Frequancy respond range و كلما اتسع هذا المدي كلما دل ذلك علي قدرتها للاستجابة لبيز اعمق (الدبة ) و دي عبارة عن الترددات الواطيه و تربل اعلي (سكسكة) و دي عبارة عن التردد العالي ، و في السماعات النظيفة بيكون كل ده مكتوب علي الكرتونة و بيكون حقيقي . مش زي الصيني يكتب علي السماعة 1000 وات و تكون قدرة الملف 10 وات و يكتب مدي موجات صوتية كبير جدا و الحقيقة غير كده تماما.

ملحوظة
هناك ما يسمي بالـ RMS او القدرة العادية للسماعة و دي اللي بتحدد قوة صوتها الفعلية اثناء التشغيل العادي

يعني مثلا ممكن تلاقي سماعات مكتوب عليها 500 وات و Normal power 70 وات , قهذا يعني ان الاداء الطبيعي لها (مهما عليت الصوت) في حدود 70 وات قوة و اكبر قوة يتحملها الملف هي 500 وات

و علشان كده اهم حاجة و انت بتشتري انك تختار سماعات القدرة العادية لها كبيرة اكبر من خرج الوحدة الرئيسية علشان تديلك صوت رايق و حلو و كمان بدون ما يؤثر علي عمرها الافتراضي

الصب ووفر

هي سماعات من نوع معين بتمتاز بقوة كبيرة جدا للموجات ذات الترددات المنخفضة (البيز) و دي لازم تركب علي جي ام او كاسيت مجهز بخرج مخصوص لها . و غالبا بتبقي راكبة في صندوق خشب في شنطة العربية و بتبدأ من 12 بوصة الي 40 بوصة و طبعا الوات بتاعها ممكن يوصل الي 1000 وات

يعني من الاخر لو عاوز صوت نظيف ورايق في اللذيذ يعني

محتاج سماعتين بيضاوي نظاف في حدود 350 - 400 ج مثلا + وحدة تشغيل سي دي مثلا نوع نظيف (من 400 الي 600 ج )

أما بقي لو عاوز شغل عالي و ترويش و بتاع يبقي تضبف كمان جي ام ( في حدود من 500 الي 1000ج ) + صب متوسط في حدود 600 - 700 ج + تويترات خارجية سوني اكسبلود مثلا في حدود 250 ج و تبقي عدة مزيكه 10 / 10

علي فكره في حاجات اعلي من كده بكثير و اعرف ناس مركبة عدة صوت بـ 10000 ج و الغاوي ينقط بطقيته