رد: عايزة عربية لقطة تعبت بجد
 

عارفة يا AlexGirl ..السنة اللى فاتت كان إبن خالتى عاوز يشترى عربية وكان محتار زيك كدة ..شوفنا إعلانات كتير وروحنا نتفرج على أكتر من عربية وكان كل مرة يا إما العربية يطلع فيها عيب يإما تكون غالية والفلوس مش كفاية وخلاص إتفقنا إنه يدفع الفلوس مقدم لعربية زيرو المهم وإحنا ماشيين قابلت واحد ميكانيكى معرفة سلمت عليه المهم سألته عن عربية قالى ثوانى أتصلك بواحد عقيد فى القوات المسلحة عنده عربية حلوة ومحافظ عليها ومش مبهدلها.. المهم إتصل بيه وقاله لو كنت فاضى تعالى بالعربية الراجل جه بعد ربع ساعة شفنا العربية عجبتنا وفى ظرف نص ساعة كنا كتبنا العقد ودفعنا الفلوس ومشينا بالعربية والحمد لله...شوفتى النصيب ...أى نعم إبن خالتى دخل فى عمود كهرباء قبل ما يوصل البيت والعربية وشها باظ لأنه كان لسة جديد فى السواقة ..لكن صلحها وغير إكصدام وكبوت..بس الصراحة العربية بقالها سنة ماشية معاه زى الفل أحسن من الزيرو..هقوم أصلى العصر وأدعيلك .

رد: عايزة عربية لقطة تعبت بجد
 

سبحان الله محدش عارف فعلا رزقه فين وكل اللي بنعمله اننا بنسعى وناخد بالاسباب بس انا بقي نفسي الاقي عربية صاحبها محافظ عليها وابقي كسبتها ولاني خايفة علي العربية لاعمل زي ابن خالة حضرتك كدة بلاني بردو مبتدئة مش عايزة اجيب زيرو لاني مش متخيلة تبقي العربية مثلا فيها حاجة لا قدر الله وانا لسه عليا قسطها هتقهر انا وقتها لاني محبش يبقي عليا فلوس ابدا دة غير اني مش بحس بملكية الحاجة طول ما هي لسه فعلا مش ملكي عموما هي كلها اقدار وارزاق والحكاية دي علمتني ان سعيي حاجة ورزقي حاجة تانية وانا هعمل بردو اللي عليا هسعى مع ايماني الكامل ان رزقي ربنا مقدرهولي سواء مكتوبلي اصلا اشتري او لا فانا مسلمة امري لربنا

رد: عايزة عربية لقطة تعبت بجد
 

آنسة AlexGir ...تحياتى ..أنا كلمت صاحب الإعلان دة وقالى أتصل بيه بكرة علشان أشوف العربية وكلمته فى السعر قاللى لما تشوفها ...أنا بعتلك رسالة على الخاص فيها بعض التفاصيل ياريت تشوفيها
....
..... نص الإعلان .....
45,000.00 جنيه
كيا بيكانتو 2005 بحاله جيده جدا اللون سماوى تكيف وسنتر وكاوتش جديد وكاسيت بيونير cd وسماعات بيونير بها رخصه طويله السياره خليجى وبحاله ممتازه والاتصال للجادين فقط لعدم الاحراج
الخدمة المطلوبة معروض (للبيع)
موديل بيكانتو
المسافة المقطوعة 94000 كم
عام الصنع 2005
اللون الخارجي سماوى
السعر 45,000.00 جنيه
رقم الجوال 01114205669
فترة الإعلان 14 يوم
البلد مصر
المدينة الإسكندرية
........... والله الموفق............

رد: عايزة عربية لقطة تعبت بجد
 

انا متشكرة لحضرتك جدا ورديت علي رسالة حضرتك وربنا يسهل يااارب وصاحب العربية يتفاوض شوية

رد: عايزة عربية لقطة تعبت بجد
 

صلى صلاة إستخارة وتوكلى على الله
إن شاء الله لما تكلمى صاحب الإعلان حددى معاه ميعاد المعاينة وخدى معاكى حد بيفهم فى العربيات يبص عليها ..يعنى يشوفها عاملة حادثة قبل كدة ولا لاء طبعا يفتح الكبوت ويفتح الشنطة ويشوف الأبواب متناسقة ومفيش بروز عن جسم السيارة أو فواصل ..يشوف البارومة ..يشوف العفشة ..يشوف حالة الموتور ويسمع صوته.. يدورها ويبص على الدخان اللى بيخرج من الشكمان ..والله المستعان ..ولما تشوفيها وتعجبك بإذن الله إبقى إتكلمى فى السعر يعنى قولى 40000 ولو الراجل رفض إوصلى معاه ل42 وإن شاء الله هيوافق ..بس المهم كلميه النهاردة قبل ما حد تانى يسبقك .. ربنا يكرمك إن شاء الله