مصر موتورز مجتمع السيارات - اتمنى مساعدتكم ... للاهميه

مساء الخير...
اولا احب اشكر القائمين على المنتدى الاكثر من رائع ,واشكر كل من كتب وتشاور واعطى تجاربه الصحيحة سواء بعالم السيارات او غيره...
دلوقتى احب اعرفكم سبب كتابى للموضوع وخاصة فى القسم دا واتمنى انكم تساعدونى
انا نويت بأزن الله اشترى عربيه جديدة والحقيقه دى اول عربيه ليا...
ولفيت كتير وشفت معارض كتير وبالصدفه شفت ع النت الهونداي RB
وعجبتنى جدا وشفتها وانا مسافرة على طريق مصر الصحراوى بس من برا وهى ماشيه بصراحة شكلها خطفنى جدا قلت بس هى دى وسألت واستفسرت وعرفت ان الاوتوماتك بتاعها ب100.750 قلت كويسة ومناسبه جدا على الامكانيات اللى شفتها وقرأتها عليها وبالفعل رحت للمعارض اشوفها بأه على الطبيعه وانصدمت الصراحة لما ركبتها...
عربيه خاليه تماما من المواصفات اللى شفتها من النت سواء اليوتيوبات او اى منتدى عرض لها وزعلت اوى وانا طالعه لفت نظرى الالنترا وركبتها لقيتها طبعا اوسع واشيك بفخامة بس بردو خاليه من المواصفات اللى شفتها فصاحب المعرض قالى دى الوكيل لو عايزة تركبى اركبى الخليجى نفس المواصات وحاجة تحفه
وبالفعل لقيته خدنى ولقيت عربيه النترا 2012 فرق كبير بينها وبين المصرى سواء باماكنيات العربيه او سعرها او او الى اخره العربيه فيها كل حاجة تقريبا فتحة سقف وتكيف تاتش وتحكم فى الطارة وشيك بس ناقصها حاجتين مهمتين منتبهتش ليهم الى تانى يوم وهى ان مفهاش اوتو باركنج ولا فيها شاشة فوق الكاسيت CD>>اللى منها بردو بتشوف المفروض فى المارشيليه الشاره من الخلف عن طريق الكاميرا الخلفيه اللى هى بردو مش موجودة.... فقعدت افكر انا اروح ادفع 140 الف جنيه كاش فى عربيه ناقصة ليه ... ناهيكم بقا على كميه الناس اللى قعدو يقولولى انتى مش محتاجة الحاجات دى والحاجات دى بسيطة وممكن تتركب وناس تانيه تقولى اوعى تركبى حاجة احسن يلعبولك فى الضفيرة ورعبونى من قبل مااشتريها...
المهم قلت ايه اصبر شويه اسبوع كدا بدل ما اتسرع وادبس فى عربيه وادفع مبلغ كبير كدا ومسكتش بردو فضلت اسال فى التوكيل مرة والمستوردين مرة
الوكيل الكل اجمع ان العربيه اللى نازله دى مش 2012 اللى نازله بالكويت والخليج وان مستر غبور شايل كماليات مهمة فيها والسعر دا غالى جدا عليها
والخليجى على الرغم انها ارخص حوالى 10 الاف جنيه وهى هى نفسها بتاعه غبور الهاى لاين وبصراحة خدت تأييد كبير سواء بالسعر او بالراحة النفسيه فى الفنش بتاعها بردو قلت اصبر شويه يمكن العربيه اللى انتى شفتيها تنزل وساعتها خديها بقا وانتى مطمنه سواء وكيل او خليجى
وانا امبارح بلف فى النت فوجأت بمنتداكم وكميه المؤيدين واللى نافرين من الالنترا
وقرات بردو ان اللى بيقول ان الار بى زيها زى الالنترا وحرام السعر دا يندفع فيها طالما مش كامله زى مانزلتها الشركة من كوريا واللى يقول دا البنزين بتاعها ممكن يبقى مش موجود علشان لو نزلت بنفس مواصفات الماتور بتاع الشركة صعب تلاقى بنزين 95 وكمان غالي..!!
خلانى مش عارفه بصراحة اشتريها ولا لا
ولقيت واحد اشترى الخليجى الفول اوبشن فعلا بس جابها من الخليج وراح بنفسه جابها وقال فرق السما عن الارض ولما سألوه خلصت بكام قال تقريبا ب 165 الف
طبعا انا عقلى اتشتت وكدا انا محتارة جدا...
مبقتش عارفه هل اجيب الالنترا الخليجى اللى شفتها واركبلها الحاجات دى عادى باه واكون وفرت 10 او 15 الف جنيه
ولا ابعت اجيبها من برا زيها بالظبط ولا اجيب عربيه تانيه خالص وابعد تماما عن الهونداى..؟!!
انا اسفه جدا انى طولت عليكم بس اعزرونى دى اول مرة اجيب عربيه ليا ومش عايزة اغلط غلطة ازعل عليها بعدين وخاصة ان المبلغ مش بسيط على الاقل بالنسبه ليا