|
هل الاكسيل فيها ثرموثتات كوعه ومشكلة فى العداد ياريت تساعدونى
السلام عليكم ورحمة الله وبركاته دلوقت عاوز اسئلكم سؤال هل الاكسيل فيها ثرموثتات كوعه لانى بلاحظ انى لما العربيه تسخن تمام المؤشر بيفضل واقف على النص حتى لو جرييت و خدت طريق طويل العربيه مبتبردش يعنى مثالا ايام ال 128 كانت كل ما اجرى كل ما مؤشر الحرارة ينزل وخصوصا فى الشتا كان بينزل لاقل درجه بس الاكسيل ديه لا مهما اجرى بيها المؤشر مبينزلش عن النص ابدااااا مهما يحصل حتى لو المراوح اشتغلت برضوا مينزلش عن النص فهل كده الاكسيل فيها ثرموثتات كوعه هو اللى بيحافظ على درجة الحرارة ثابتة كده ولا ايه ياريت تيفيدونى السؤال التانى دلوقت عداد السرعه اللى بيقولى انت سرعتك كام على الطريق شغال كويس وسرعته مظبوطه بس عداد الكيلومترات هو اللى مش مزبوط ممكن مثالا فى مشوار ميعديش 20 كيلو الاقى العربيه عملت 400 كيلو وطول ما انا بجرى الكيلووات بتجرى جرى ورا بعض فهل كده العيب فى العدادات ولا فى سلك نقل السرعه ولا فى التروس اللى فى الفتيس وفعلا المشكلة ديه تعبانى اووى لانى مشترى العربيه كانت عامله 140 الف واكيد العداد كان بايظ معاها وهى اصلا عامله اقل من كده بكتير ودلوقت وصل العداد ل 160 الف فكده حرام ولا عارف اظبط مشى على الزيت ولا حاجه خالص فياريت تساعدونى وجزاكم الله خيرا |
رد: هل الاكسيل فيها ثرموثتات كوعه ومشكلة فى العداد ياريت تساعدونى
اه فعلا الاكسل فيها ثرموثتات كوعة و انا معايا اكسل 1500 نفس القصة بالظبط لو واخد طريق سفر المؤشر مش بينزل خالص عن النص حتى لو المراوح اشتغلت و بقالها معايا سنتين و مفيش اى خطر على العربية
عندى سؤال بما انك لسة عامل الكاربيرتير انا عندى اول ما اكبس بنزين للعربية و هى على السلانسيه الاقى العربية تحس انها وطيت و عليت في ساعتها و لما اكون معدى بعد 100 الاقى ان ال RPM رفع بعد الواحد بشوية و لما روحت للمكانيكى قالى دى عايزة باب و اكس و تسليك و قالى لازم واحد بيفهم يكون بيعمله و كنت عايز اعرف هل ظبطت معاك معدل البنزين ولا لا |
رد: هل الاكسيل فيها ثرموثتات كوعه ومشكلة فى العداد ياريت تساعدونى
بالنسبه للكربراتير عندى فالحكاية ان عندنا الكربراتير عباره عن اتنين باب الباب الاولانى ده شغال معانا على طول فى الطريق الواقف والجرى البسيط وكدا اما الباب التانى فمبيفتحش غير كل فين وفين لما نحب نجرى جامد وندوس على الدواسه بتاعت البنزيين جامد اووى وده علشان يدى بنزين اكتر للعربيه علشان تديك سرعه اكبر الحكاية كلها ان الباب التانى علشان شغلة قليل فبيعطل من الوقفه فلما بنضغط جامد ونيجى نسيب رجلنا من البنزين بيفضل الباب التانى معلق و مبيقفلش فبيعلى السلانسيه شوية وطبعا لو فضلت مطنشه بياكل بنزين جامد اما بالنسبه لمعدل البنزين فالصراحه انا كده كده مش عارف اقيسه لانى عداد الكيلو مترات عندى زى ما حضريتك قريت انه بيجرى بسرعه ومش بيقول قرايه صح فللاسف مش هعرف افيدك فيها اووى لازم الاول العداد يتظبط وبعدين اقول لحضرتك بتعمل قد ايه بالظبط فى الصفيحه مع العلم انى بستخدم بنزين 80 ربنا يديمها نعمة :) |
رد: هل الاكسيل فيها ثرموثتات كوعه ومشكلة فى العداد ياريت تساعدونى
أستاذ سيد شوف لو عندك ثرموثتات كوعة يبقى اكيد هو دة التفسير المنطقى اللى يخلى المؤشر على النص ماينزلش
لو مش راكبة بقى يبقى ممكن يكون عندك نفس العيب اللى عانيت منة واللى كان هيضيعلى الموتور اكتر من مرة وهو ان صباع الحرارة نفسة فية عيب بيقرأ زى الفل لحد النص وبعد كدة يثبت ولا يعلى ولا ينزل سواء بجرى فى هواء او المروحة اشتغلت مابينزلش الا لما ابطل العربية فترة وتبرد ملحوظة (انا شايل ثرموثتات الكوعة):F_14WA~16[1]: |
رد: هل الاكسيل فيها ثرموثتات كوعه ومشكلة فى العداد ياريت تساعدونى
اقتباس:
يا فندم... اللي حضرتك بتوصفه ده هو الحالة المثالية لثرموستات الكوعة... ربنا يباركلك في العربية واللي كان موجود في الـ128 (إزالة الترموستات) هو أسوأ ما يمكن وصفه من إفتاءات الميكانيكية المصريين... ربنا يهديهم لو عايز تعرف معلومات أكتر عن ترموستات الكوعة والفايدة منه ادخل على الموضوع ده: ثرموستات الكوعة.... المفترى عليه ومهما حد حاول يقنعك إنك تشيله... إوعى تعملها... ده لو عايز تحافظ على موتور عربيتك. بالنسبة لعداد الكيلومترات... متهيألي في حاجة مش واضحة بالنسبة لحضرتك مادام عداد السرعة مظبوط يبقى عداد الكيلومترات أكيد هو كمان مظبوط... لإنهم متوصلين ببعض. أول خانة على اليمين في العداد بيبقى لونها مختلف... دي مش بتتحسب كيلومتر... إنما كل رقم = 100 متر.. يعني لما تعد 10 يبقى حضرتك مشيت 1 كيلومتر أنا فاهم صح ولا أنا غلطان؟؟؟ |
| الساعة الآن 05:20 PM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017