مصر موتورز مجتمع السيارات - (لاول مرة) طريقة عمل فلتر هواء لتكييف الانوس .. بالتفاصيل والصور والفيديو

قبل ما ابدأ كتابة وشرح
لازم انوة الى ان الموضوع كان سبق موضوع انا عملتة قبل منة وهو

http://www.masrmotors.com/vb/showthread.php?t=117043
وكان الهدف منة ان يكون فية تفاعل من الناس مع الفكرة ويفضل لو كانت تفاعل عملى
لكن على كل حال كل واحد من الناس اتفاعل على قدر استطاعة
وهو جهد مشكور فعلا
فلا يكلف الله نفسا الا وسعها

نيجى بقة لموضوع الفلتر
طبعا معروف ان عربيات لانوس بتنزل بدون فلتر هواء للتكييف
والحقيقة انا لما فكرت اعمل فلتر او حضرتك اللى بتقرأ الموضوع لو فكرت تنفذ الفكرة فى عربيتك فلازم تبقى عارف ان الفلتر مش رفاهية

دة اساسى فى التكييف
لأن لو الفلتر دة مش موجود اللى هيحصل ان التراب والعفش اللى بيكون فى الطريق وانت ماشى بيدخل مباشرة على شرايح التلاجة فبيتراكم فيها ويسدها
ودة بينتج عنة الاعراض الاتية :

1 - ظهور ريحة عطانة او عفونة مع بداية تشغيل التكييف وبتروح بعد دقيقة تقريبا
2 - ان التراب والعفش اللى بيسد شرايح التلاجة بيخلى التكييف عندك شغال تقريبا بنص كفاءتة
3 - انك لو بشتكى من ان التكييف بتاعك يدوب بيلطف الجو جوة العربية لكن مش تكييف بمعنى تكييف رغم انك فحصت الشحن وزودتة عند الفنى المختص بذلك ونضفت السربنتينة الامامية اللى فى وش العربية فدة معناة ببساطة ان التلاجة مسدودة وانك مهما تعمل من حيل هيفضل التكييف عندك ضعيف

فلما بحثت فى الموضع دة فى المنتديات العربى والاجنبى لقيت بعض الافكار
وقلت ابدأ من حيث انتهى الاخرون

وكانت الفكرة الاولى هيا عمل فلترين
واحد فى الفتحة اللى تحت المساحات لان هيا دى اللى بيخش منها القدر الاكبر من التراب والعفش
والتانى فى الصالون من جوة

وكان فية فكرة تانية بس انا اجلتها لحد اما اجرب الفكرة الاولى وبعدين ابقى اشوفها (وفى الاخر اكتشفت فشل وصعوبة الفكرة التانية)

بس قبل ما ابدا عامل اى حاجة حطيت لنفسى خطين حمر مينفعش انى اتخطاهم والا تبقى الفكرة فاشلة

الخط الاحمر الاول : ان فكرة الفلتر كلها لو منفعتش يبقى متضرش العربية
الخط الاحمر التانى : ان فكرة الفلتر يكون استخدامها بسيط جدا لواحدة ست او طالب فى اعداى

والخطين الحمر دول معناهم ببساطة شديدة ان الابتكار اللى انا هعملة لو منفعش وفشل يبقى مفيش حاجة تكون باظت فى العربية (يعنى لو الاختراع منفعش يبقى مضرش)
والتانى معناة انك بتضيف فكرة لعربيتك فلازم استخدامها ميكونكش مكلكع وان الفلتر اللى انت هتعملة فى عربيتك ممكن واحدة ست او طالب فى اعداى يفكة بنفسة وينضفة

وخلى بالك من الكلمتين دول - الخط الاحمر الاول والخط الاحمر التانى
لانى هستخدمهم كتير فى الموضوع فلما اقول مثلا ان الفكرة دى مثلا منفعتش لانها بتتعارض مع الخط الاحمر الاول فتبقى انت فاهم انا قصدى اية ........وهكذا

فى البداية انا هنقل من الموضوع المذكور عالية مقطع شرح مبدئى عشان اللى ما شافش الموضوع التانى يبقى متابع معايا وهو فاهم
وهيا
دورة الهواء فى تكييف السيارة

هبدا الاول شرح دورة الهواء المبسطة فى التكييف

الاول دة شكل التابلوة
http://i1357.photobucket.com/albums/...psdbaad9a4.jpg

وبعدين هنشيل التابلوة خالص عشان نعرف الدنيا تحت ماشية ازاى
والارقام اللى انا هحطها على الصورة ركز فيها عشان هنحتاجها كتير فى الشرح وفى التفكير
http://i1357.photobucket.com/albums/...ps1b7b68b3.jpg

لما بيكون الزرار دة على الوضعية دى
http://i1357.photobucket.com/albums/...ps10e73b0d.jpg

يبقى معنى كدة ان بداية دخول الهواء لدورة التكييف من داخل صالون العربية تحديدا من حوالين درج التابلوة من عند رقم 1

ولما بيكون على الوضعية دى
http://i1357.photobucket.com/albums/...ps57c29032.jpg

يبقى معنى كدة ان بداية دخول الهواء لدورة التكييف من برة العربية من عند الهوايات اللى تحت المساحات
http://i1357.photobucket.com/albums/...ps3972bb37.jpg

فى الحالتين الهوا بيدخل على موتور المروحة رقم 2
اللى بنتحكم فى سرعتة من البكرة دى
http://i1357.photobucket.com/albums/...pscfd8357d.jpg

وبعدين الهوا بيعدى على التلاجة اللى فى المكان رقم 3
يطلع هوا ساقع

يدخل بعد كدة على الغرفة بتاعة سربنتينة السخن رقم 4 اللى بتعتمد على دورة المية بتاعة الموتور فى تسخين نفسها

ودى الهوا مبيعديش منها ويتخلط بالسخن الا لو استخدمت البكرة دى عشان تخلط سخن ببارد
http://i1357.photobucket.com/albums/...ps487b414e.jpg

وهنا فية معلومة عايز اقولها
ان دورة الفريون بتكون شغالة علطول حتى لو استخدمت السخن فى الشتا لانك لو استخدمت السخن بس بدون تخليط الهوا البارد او تشغيل التكييف حتى ولو بنسبة بسيطة نسبة الرطوبة فى الكابينة بتزيد وتحس نفسك اتخنقت والصالون اتكتم والازاز يشبر من جوة بسرعة

بعد كدة الهوا بيدخل غرفة التوزيع رقم 5 واللى بنتحكم فيها من البكرة دى
http://i1357.photobucket.com/albums/...ps7a1a77e8.jpg

هى دى ببساطة دورة الهوا فى تكييف العربية الانوس

الاول قبل ما ابدا شغل لازم اوضحلك ان اسهل حاجة انك تجيب فكرة جديدة او الاطار العام بتاع فكرة جديدة
واكيد دى قابلت ناس كتير مننا فى مواقف فى حياتة
يعنى مثلا تبقى فية حاجة عندك فى البيت او فى الشغل معاكساك او بايظة فلو سالت واحد صاحبك او اخوك مثلا وهو مش متخصص ولا هى دى مهنتة تلاقية يقولك: احنا نجيب كذا ونعملة كذا ونسوية كذا وبس خلاص على كدة
تيجى بقة ساعة التفيذ تلاقى حاجات كتيرة قوى بتظهر مكانتش فى الحسبان
ودة لية
لان الفكرة اللى انت او زميلك فكرت فيها مدققش فى التفاصيل
عشان كدة فية مقولة شهيرة بتقولك
((( الشيطان يكمن فى التفاصيل)))
وهيا دى الحاجة اللى انا بهتم بيها قوى
(((((((( التفاصيل)))))))))))))

نرجع للفتر
الفكرة الاولى كانت انى اعمل فلترين
فلتر عند المدخل اللى تحت المساحات
وفلتر عند الشبكة رقم 1

وبدأت الاول بالمدخل اللى تحت المساحات
فكيت ال 3 مسامير البلاستيك ورفعت الفبرة وشيلت مظراب المية ونزلت بعينى ابص فى الحتة دى

http://i1357.photobucket.com/albums/...ps5145a422.jpg

http://i1357.photobucket.com/albums/...psb563476e.jpg

http://i1357.photobucket.com/albums/...ps47d88849.jpg

وبدأت ادخل دراعى للاخر خالص عشان اشوف هعرف اشتغل فى المكان دة ازاى
فلقيت بعض الصعوبات وهيا كالتالى :
1 - انك لازم تتشعبط وتنام على موتور العربية عشان تعرف توصل دراعك لاخر الفتحة
2 - انك كل ماتفكر تطلع الفلتر عشان تنضفة او تنفخة بالهوا لازم تفك المسامير البلاستيك وتطلع الفبرة وتشيل المظراب وترجع تقفل كل دول تانى
3- فية صعوبة انك تمسك فلتر فى ايدك وتحطة فى مكانة بسهولة وتثبتة صح لانك بتشتغل عميانى ولان الشفة اللى ناحيتك عالية (بص للصورة وانت تعرف)
والناحية التانية واطية عشان تمنع مية المطر والغسيل من الدخول للفتحة فبتخنق عليك قوى وانت شغال
4 - هنفترض انك اتغلبت على العيبين رقم 1 و 2 و3 وحطيت الفلتر فى مكانة فلو افترضنا انة لو سقط من ايدك وانت بتركبة او اتنطر من
مطب ونزل جوة الفتحة مش هتعرف تطلعة الا لو فكيت علبة التلاجة بالموتور اللى فيها
ودى سحلة

فيبقى انا فى الفكرة دى معديتش الخط الاحمر الاول - لكن عديت الخط الاحمر التانى بمراحل
فتبقى فكرة فاشلة.

قلت طيب خليها دلوقتى وابقى اشوف لها حل سهل واخش جوة العربية واعمل الفلتر اللى على الفتحة رقم واحد
فكيت الدرج
وبصيت على المنطقة دى لقيت سهل قوى انى اعمل فلتر على الشبكة دى
http://i1357.photobucket.com/albums/...ps642ba078.jpg

وقلت اعمل بروفة صغيرة
وجبت حتة كرتونة (كأنها الفلتر مثلا) وقصيتها على اد المكان دة وبدأت ابيتها فى مكانها واختبر كل حاجة
فاكتشفت انى لما بحب اتحكم فى مكان بداية دخول الهواء لدورة التكييف لازم استخد الزرار دة
http://i1357.photobucket.com/albums/...ps10e73b0d.jpg

فلما بيكون قافل الهواء من برة
الفلتر بيبات فى مكانة مرتاح
http://i1357.photobucket.com/albums/...psd8920935.jpg

لكن لما برجع الزرار الناحية التانية
عشان افتح للهوا من برة
فالدراع اللى بيتحكم فى الباب بيزق الفلتر لبرة
http://i1357.photobucket.com/albums/...ps52ce9ef1.jpg

الدراع دة
هوة اللى بيزق الفلتر لبرة
http://i1357.photobucket.com/albums/...ps4427d868.jpg

قلت طيب
ما انا ممكن اعمل فتحة صغيرة فى جسم الكرتونة (اللى المفروض هيا الفلتر) تسمح بحركة الدراع لبرة وجوة والفلتر ثابت فى مكانة من غير ما يتحرك
بس هنا وقفت واكتشفت غلطة
طيب هوا يبقى اية لزمتة الفلتر بقة
اية لزمة انك تعمل فلتر وفى نصة فتحة او خرم
كدة كانك معملتش فلتر من اساسة

كدة انا معديتش الخط الاحمر الاول او الخط الاحمر التانى
بش فكرة الفلترين فى حد ذاتها فاشلة
الفلتر اللى جوة فكرتة اساسها فاشلة
والفلتر اللى برة انا عديت فية الخط الاحمر التانى

وفية بعض الملاحظات التانية الجانبية بس انا هسيب الاعضاء هما اللى يكتشفوها

فوصلت لنهاية مؤكدة
فكرة الفلترين فاشلة

فبدأت افكر فى فكرة الفلتر الواحد اللى يتحط فى مكان معين ويقفش على الهوا الى جاى من برة ومن جوة فى وقت واحد
وكنت قريت فكرة انك ممكن تنزل موتور المروحة وتعمل فلتر فوق منة
مكدبتش خبر
فكيت موتور المروحة دة
http://i1357.photobucket.com/albums/...psfa511155.jpg

عن طريق ان تفك ال3 مسامير دول
وتحرر فيشة الكهرباء
هتلاقى الموتور نزل فى ايدك
http://i1357.photobucket.com/albums/...ps8bbda6c4.jpg

ولما تنزل الموتور وتبص من تحت
هتلاقى المنظر دة
( وانا هنا اخدت صور من عضو فاضل لانى لقيتها اوضح من صورتى )
هتلاقى المنظر دة من تحت
[IMG]http://i1357.photobucket.com/albums/q757/zarifsasa/**********_13772668121_zp s4b08551e.jpg[/IMG]

وقلت فى نفسى
تمام
انا عمل فلتر دائرى الشكل
واثبتة بكام مسمار سن شكة القصير جدا
بحيث تبقى مخ المسمار من تحت
والسن لفوق
واركب الموتور تانى
ويبقى كدة الفلتر دة قفش كل التراب والعفش اللى جاى من برة
ويبقى فلتر واحد يقضى الغرضين
ورجعت ادقق فى ((( التفاصيل )))
فلقيت كوم سلبيات
1 - انك عشان تطلع الفلتر وتنضفة لازم كل مرة تفك الموتور والفيشة بتاعتة وتفك مسامير الفلتر عشان تنضفة وترجع تقفل كل الليلة دة تانى
2 - انك عشان تعرف تشتغل فى المكان دة مرتاح من غير ما يبقى ضهرك ملووح وبيألمك لازم تفك الكرسى اللى جنب السواق وتطلعة برة العربية وتنام على ضهرك فى الدواسة وترجع تركب كل حاجة تانى
3 - الحاجة التالتة والاخطر انى لما بصيت من فوق ودققت النظر على ريش الموتور اللى بتشفط الهوا من فوق وتدفعة على ريش التلاجة لقيت المنظر دة
http://i1357.photobucket.com/albums/...psa8712b44.jpg

المسافة ضيقة جدا
معنى كدة انى مطلوب منى اعمل فلتر واثبتة فى منطقة تخانتها 2 مم فى عربية بتجرى وتاخد مطبات وتحت الفلتر مروحة شفط قوية

انا مش بس لقيت الفكرة فاشلة للاحتمال الاخير
دانا كمان كنت عديت الخط الاحمر التانى بمراحل لو حبيت اغير الفلتر او انضفة

وبردو فية ملاحظات تانية جانبية بس انا هسيب الاعضاء هما اللى يكتشفوها
فقلت لا
دى فكرة فاشلة
لكنى كنت ماشى على نفس الهدف
فلتر واحد يقوم بالمهمة كلها

فجت فى دماغى فكرة تالتة
طيب انا لية معملش فلتر افقى يتحط قدام التلاجة علطول
وعشان اسهل الفكرة على الناس اللى مفكتش التلاجة قبل كدة
دى علبة التلاجة اللى احنا بنفكها
http://i1357.photobucket.com/albums/...psff32e726.jpg

ودة بيكون الشكل لما نفك علبة التلاجة من وحدة التكييف
ملحوظة:
الشكل دة هو نفسة لما تفك علبة التلاجة ووحدة التلاجة راكبة فى العربية عادى
الصورة دى عشان انا كنت مطلع وحدة التلاجة برة العربية فى موضوع تانى خالص
http://i1357.photobucket.com/albums/...ps3ea75ca7.jpg

فقلت ان انا هعمل فتحة مستطيلة رفيعة فى جسم علبة التلاجة من تحت
دى اقدر من خلالها اركب الفلتر من تحت
واقفل علية باى فكرة
باب بمفصلتين صغيرين قوى
او باب بلاستيك مرن
وهوضحهالك برضو بالتفصيل
الفلتر تقريبا هيكون بالشكل دة
رسم تخطيطى بسيط
http://i1357.photobucket.com/albums/...ps5d36ebff.jpg

وعشان تبقى مستوعب
انا هوريلك هيركب فين والعلبة متشالة
عند مكان السهم الاسود
http://i1357.photobucket.com/albums/...ps865db812.jpg

وبدا ليا انى اخير اتوصلت للمكان الصحيح اللى هيركب فية الفلتر
ورحت اراجع كل التفاصيل
وقعدت افكر فى العقبات والسلبيات
وتوصلت للاتى :
1 - انا هعمل فتحة فى جسم علبة التلاجة من تحت قبل التلاجة علطول فمعنى كدة ان التكثيف بتاع التلاجة
لما هيبدا احتمال كبير ان المية اللى هتنزل منة تنزل على رجلين اللى قاعد جنب السواق بدل ما تروح الناحية
التانية عند المظراب لان دى عربية ماشية بتاخد يمين وشمال ومطبات مش ثابتة زى تكييف البيت تعرف
تتحكم فى مية التكثيف اللى بتنزل من تكييف اليبت
وفى نفس الوقت مش هينفع اقعد الزق سولتيب شفاف وشغل العك دة (المفروض ان انا بعمل ابتكار)
2 - ان انت اكيد هتعمل فرام معدنى للفلتر فدة احتمال يقعد يخبط كل شوية مع المطبات والمنحنيات
يقعد يخبط ما بين العلبة البلاستيك ومواسير التلاجة او مواسير التلاجة والشرايح الالمونيوم

بس وانا بفكر فى الفكرة دى لقيت لها حل وهيا انى اعمل 2 مجرى المونيوم رفيعين افقيين يمشى فيهم الفلتر ويثبتوة فى مكانة
زى كدة تقريبا
http://i1357.photobucket.com/albums/...ps4957f14a.jpg

وراجعت تانى تفاصيل التنفيذ
انت عشان تثبت المجرتين دول محتاج تربطهم فى جناب العلبة واحدة ناحية صدر العربية وواحدة ناحية اللى قاعد جنب السواق
قلت فى عقلى عادى نربطه بمسامير
ولما تخليت المسامير وهيا مربوطة فى مكانها
اصطدمت تانى بالتفاصيل
لقيت ان راس المسمار هتحك فى الهيكل الخارجى بتاع الفلتر ويأما تبوظة يأما تعاكس فى الطلوع والدخول للفلتر
قلت سهلة نثبتهم ببرشام بدل المسامير وانا عندى الشنيور وبنسة البرشام والبرشام
وقعدت اتخيل تفاصيل التنفيذ
طب هو انا هتسخط اتحول لانسان فى حجم فار انا والعدة اللى فى ايدى
عشان اقعد جوة علبة التلاجة وامسك الشنيور واثبت المجارى الالومنيوم فوق وتحت
(يعنى فى وحدة التكييف وفى علبة التلاجة اللى بتتفك) وبعد ما اخلص شغل اطلع من مضراب المية مثلا

السؤال هيثبتوا ازاى
قلت فى عقلى سهلة انا ممكن اثبتهم فى الجزء اللى فوق بس من وحدة التكييف الثابتة والعلبة تتقفل عليهم من تحت
وراجعت التفاصيل فى خيالى
هو المكان الضيق دة هينفع امسك فية شنيور وبنسة برشام واشتغل واثبت المجرتين الالمنيوم
المكان ضيف فعلا
قلت خلاص
اثبت المجرتين الالومنيوم فى العلبة اللى بنفكها ونقفلها على كدة ومش مهم نثبتها من فوق
زى كدة يعنى
http://i1357.photobucket.com/albums/...ps2ef96e7b.jpg

وتخيلت نفسى بعد تنفيذ الفكرة
اذا كنت انا اصلا بقفل علبة التلاجة بصعوبة جامدة وهيا على وضع بلادها املا لمااحط فيها مجرتين المنيوم هتقفلها ازاى

دة الواحد بيتسحل على اما يقفل العلبة
امال لما يكون فيها عمودين واقفين هقفلها ازاى
كل فكرة كانت مليانة تفاصيل صغيرة

وبدل ما احير نفسى

روحت جبت كل الصور اللى عندى بتاعة علبة التلاجة وبصيت عليها كويس

http://i1357.photobucket.com/albums/...ps52f28377.jpg

http://i1357.photobucket.com/albums/...psa1630133.jpg

http://i1357.photobucket.com/albums/...psd6b5e969.jpg

ووصلت لنتيجة اكيدة
مفيش حيز كافى او مكان لكل اللى انا بحكى فية دة
المكان فعلا ضيق جدا ومزنوق
وحدة التكييف وهيا مفكوكو برة العربية يتهيألك انها بررررررررررررراح
لكن وهيا راكبة تحت التابلوة بتبان على حقيقتها

وفى الاخر وصلت لنتيجة اكيدة ان انا عديت الخط الاحمر الاول
لو الفكرة فشلت يبقى انا كدة خرمت علبة التلاجة من تحت ولاحق بقة يا معلم واتعامل مع مية التكثيف اللى هتنزل على رجلين اللى قاعد جنبك وهتغرق الدواسة

وبردو الفكرة دى فيها شوية عقبات بس هسيب الاعضاء هما اللى يكتشفوها

بس انا كان عندى قناعة بأن المنطقة الصغيرة دى
http://i1357.photobucket.com/albums/...ps6bcf6c14.jpg

هيا اللى هيكون فيها فلتر الهواء الوحيد اللى هيقوم بالمهمة كلها
الحكمة الرومانية القديمة بتقول : كل الطرق تؤدى الى روما
وكل التفاصيل بتقولى : كل الطرق تؤدى الى هذة المنطقة

ورجعت تانى ابص على المنطقة دى
http://i1357.photobucket.com/albums/...ps97aaa3ba.jpg

واهرش فى السطوح
وادقق فى كل حاجة حتى لو تافهة او صغيرة
الطول والعرض
ارتفاع الفلتر
حركة الباب
دخول وخروج الفلتر
المعوقات
احتمالات الخسارة
ايدى هتعرف تشتغل فى المكان الضيق دة ولا لأ

لحد ما وصلت لفكرة جديد
كان فيها مجازفة ان انا هاكل حاجات بسيطة من جسم العربية
بس اهم حاجة فيها انى مش هعدى الخط الاحمر الاول ولا التانى
بس قبل ما انفذها
وامشى فى خطواتها
كنت محتاج اختبر نقطة (الاعودة) الاول
كنت عايز اعرف الباب اللى بيتحرك ويتحكم فى دخول الهوا سواء من برة العربية او من جوة فية خلوص زيادة اد اية
يعنى هوة بيقفل بالمللى عل الفتحة اللى برة
ولا فية زيادة فى الحرف اللى تحت بتاع الباب
فنمت على ضهرى فى الدواسة
ودخلت صوابعى من المكان دة
http://i1357.photobucket.com/albums/...ps7ee8b93e.jpg

وبدأت احسس بصوابعى عشان اعرف فية زيادة فى الباب
ولا بيقفل على الحركرك
وكانت النتيجة الايجابية
فية زيادة بتاع 1 سم
قعدت مخمخت وبدات انفذ الفكرة فى ذهنى
خطوة خطوة
هعمل اية
وهقطع اية
وايدى هتخش منين
واية اللى مكن يبوظ
وازاى ابقى حريص انة ميبوظش
وتقابلنى عقبات
واتخطاها
واكمل
http://i1357.photobucket.com/albums/...ps97aaa3ba.jpg

وفى الاخر كنت مقتنع بنسبة نجاح تقترب من 80%

وقبل ما ابدأشغل كنت طبعا فاكك الموتور بتاع المروحة

و توكلت على الله
وبدات اشتغل
الاول جبت القصافة
وبدأت اقص
http://i1357.photobucket.com/albums/...ps7caff26c.jpg

http://i1357.photobucket.com/albums/...psac039206.jpg

http://i1357.photobucket.com/albums/...ps0bdef30e.jpg

http://i1357.photobucket.com/albums/...ps861711f1.jpg

وبعدين جبت صفيحة منشار حدادى
وقسمتها اتنين
وبدات اشتغل
وتابع معايا
والصور هيا اللى هتتكلم
http://i1357.photobucket.com/albums/...ps93d62a29.jpg

http://i1357.photobucket.com/albums/...psf132985a.jpg

http://i1357.photobucket.com/albums/...ps8a27a397.jpg

http://i1357.photobucket.com/albums/...ps27b7b46e.jpg

http://i1357.photobucket.com/albums/...ps87e7415b.jpg

http://i1357.photobucket.com/albums/...psf06c67d9.jpg

http://i1357.photobucket.com/albums/...psed3a44a0.jpg

http://i1357.photobucket.com/albums/...psd633f4cd.jpg

ودة
كان الشكل من بعيد
http://i1357.photobucket.com/albums/...psf0a4beb8.jpg

بس لسة فية شوية فنش للشغل عشان يبقى على نضيف
هجيب حتة سنفرة
وهبدأ انعم الاحرف كلها
عشان يبقى المربع املس من جوة
وميجرحش ايدى وانا شغال
http://i1357.photobucket.com/albums/...ps8df8c443.jpg

http://i1357.photobucket.com/albums/...ps8df8c443.jpg

http://i1357.photobucket.com/albums/...psc4834cb8.jpg

وبعدين جبت حتة قماشة مبلولة بالمية
ولميت كل الرايش البلاستيك اللى وقع
وبقة المكان شكلة كدة
http://i1357.photobucket.com/albums/...ps0b98de52.jpg

وبعدين جيت بقة للمهم
واللى عارف من الاول انة هيبقى العقبة الاخيرة
وهيا ان الباب اللى بيتحكم فى تحديد مكان دخول الهوا لبداية دورة التكييف
لما بييجى يتحرك
بيبقى بينة وبين جسم العلبة حوالى 2 مم او اقل
ودة المكان اللى انا هحط فية الفلتر
زى كدة يعنى
http://i1357.photobucket.com/albums/...ps782af47a.jpg

http://i1357.photobucket.com/albums/...psb78bbbd5.jpg

http://i1357.photobucket.com/albums/...ps5a817307.jpg

http://i1357.photobucket.com/albums/...psf3c4683e.jpg

http://i1357.photobucket.com/albums/...ps16206e55.jpg

فكانت الخطة اللى فى دماغى انى هبدأ اكل من الحرف بتاع الباب من تحت حوالى 5 مم فى الطول عشان اكسب مسافة مرتاحة حوالى 7 مم يقعد فيها الفلتر اللى تصميمة كان جاهز فى دماغى مع التفاصيل كاملة وكنت محضر لة الخامات بتاعتة بس قولت مش هعملة الا لما اخلص المكان بتاعة الاول

وهسيبكم مع الصور وانتوا هتفهموا
http://i1357.photobucket.com/albums/...pse943411c.jpg

http://i1357.photobucket.com/albums/...psb0859913.jpg

http://i1357.photobucket.com/albums/...ps9bfbc485.jpg

ولانى عارف ان استحالة ايدى وهيا بتقطع بصفحية المنشار تكون ماشية مسطرة
جبت مبرد حدادى وبدأت اساوى الاحرف
عشان كلة يبقة سوا بعض
http://i1357.photobucket.com/albums/...ps727d656e.jpg

http://i1357.photobucket.com/albums/...ps454d5b60.jpg

وفى النهاية
وصلت للنتيجة اللى انا كنت عاوزها
وللمسافة اللى انا كنت مخطط لها
وللفراغ المنشود
اللى الفلتر هيركب فية
ال7 مم
http://i1357.photobucket.com/albums/...ps0841203b.jpg

واهم حاجة انى كنت حريص ان البتاع اللى عامل زى السفنج دة فى حرف الباب ميتقطعش منى او يتاكل وانا بقطع بصفيحة المنشار
عشان كدة انت لما تبص وتدقق فى الاجناب بتاعة الباب هتشوف ال 7مم اللى انا كنت عاوزهم
وبكدة يبقى انا خلصت تجهيز المكان فى الكامل

نروح بقة نعمل الفلتر

ـــــــــــــــــــــــــ ــــــــــــ
للتوضيح بس الموضوع دة انا عاملة من نهاية شهر 5 وشغال بية
بس مارضيتش ارفعة الا لما اكون جربت كل حاجة
وتابعت السلبيات
واتعاملت معاها
عشان لما ارفع الموضع
يبقى كل حاجة متجربة وشغالة بقالها شهرين
عشان محدش يدعى عليا
واللى يجرب الفكرة دى يقول الله يباركلك
والحقيقة خامة الفلتر انا جربت فيها اكتر من نوع
الاول جبت فلتر عربية فيرنا قديم
وفردت حتة منة وقصيتها وغسلتها وجربتها
بس فشلت
ونفس الموضوع فى فلتر هوا عربية لانوس
بس فشلت
وفى النهاية وجدت ضالتى فى فلتر الهواء اللى بيركب على تكييف الشباك المنزلى ورا الشبكة البلاستيك علطول اللى فى الواجهة
اللى هيا ورا الغطاء دة
http://i1357.photobucket.com/albums/...psdb73dc2c.jpg

سعرها تقريبا عامل بتاع 5 او 10 ج على ما اذكر
وعلى ما اذكر بردو فية حاجات تانية شبيهة لدة والوانها بيضا
وبيتباع عند الجماعة بتوع قطع غيار المكيفات
ودة شكلة
http://i1357.photobucket.com/albums/...ps82e77177.jpg

دة هيكون الخامة بتاعة الفلتر
الهيكل الخارجى بقة قدامك حل من اتنين
تجيب متر سلك نحاس قطر 2 او 3 مم
او تجيب متر سلك المونيوم قطر 2 او 3 مم ودة سهل قوى تلاقية وسعرة تقريبا ببلاش
وعشان متحتارش انا هقولك
عارف السلك الالمنيوم اللى بعض البيوت بتستخدمة فى البلكونة منشر غسيل
ايوة
السلك اللى بيشدوة فى البلكونة وينشروا علية الغسيل
هوة دة اللى انا استخدمتة
جبت متر تقريبا كان عامل 50 قرش
ودة شكلة
http://i1357.photobucket.com/albums/...psa90c3d65.jpg

وشكلت منة مربع 4 اضلاع ولحمتة فى بعضة
ودة كان شكلة
http://i1357.photobucket.com/albums/...ps7e56ab44.jpg

مقاسة 13.5 سم فى 15.8 سم
وجبت خيط محمل (متين) زى دة
http://i1357.photobucket.com/albums/...ps8a1c8c41.jpg

وربطتة فى اول الزاويا بتاعة المربع
عشان اعمل منة عصب يشيل خامة الفلتر
من غير ما الفلتر يتخن منى
يعنى الفكرة ان انا عاوز الخامة بتاعة الفلتر تبقى جوة المربع
مش فوق المربع
لانها اسفنجية
فانا لما احطها جوة المربع والف عليها الخيط المتين
هتاخد نفس تخانة سلك الهيكل بتاع الفلتر

وفى نفس الوقت الخيط المتين المشدود دة هيمنع المروحة انها تشفط خامة الفلتر لتحت وتبلعها
ودة اللى حصل معايا فى اول تجربة
وخطوات شد الخيط ووضع الفلتر بداخلها الصور هتقولها
http://i1357.photobucket.com/albums/...psa327a627.jpg

http://i1357.photobucket.com/albums/...ps70104496.jpg

http://i1357.photobucket.com/albums/...psb7c9d052.jpg

http://i1357.photobucket.com/albums/...ps381f8812.jpg

وفى الاخر خالص متنساش انك تربط الخيط جامد فى نهاية اللفة
وخلى بالك انت ممكن تستخدم حاجة تانية
رفيعة بردو واقوى من الخيط
خيط سنارة سمك
متين جدا ورفيع
وكان دة شكل الفلتر من الجنب وشوف سمكة (تخانتة) بقى عامل ازاى
http://i1357.photobucket.com/albums/...ps3affe14f.jpg

كدة بقة نبقى خلصنا الفلتر
وجهزنا المكان بتاعة
مش فاضل غير التركيب
بس استنى
لازم الاول تنضف مجال الهوا كلة
وبالذات المنطقة اللى تحت المساحات
لانك لو مفكيتهاش من فترة طويلة
هتتفاجأ بالزبالة والعفش والطين المتجمد الموجود فيها
يلا بينا على التنضيف

ـــــــــــــــــــــــــ ــــــــــــ
هتفك ال 3 مسامير البلاستيك دول
وهترفع الفبرة
http://i1357.photobucket.com/albums/...ps5145a422.jpg

هتلاقى مظراب المية البلاستيك دة
شيلة وبالمرة اغسلة
http://i1357.photobucket.com/albums/...psb563476e.jpg

وبعدين بص فى الفتحة دى بقة ناحية الشمال
هتلاقى ما لز وطاب
ملحوظة :الصورة دى بعد التضيف مش قبل التنضيف
http://i1357.photobucket.com/albums/...ps47d88849.jpg

ركز معايا بقة فى اللى انا هقولهولك دة
عشان تقلل صيد الزبالة بصوابعك عميانى وبالتحسيس
ايوة متستغربش من الجملة
10 دقايق بس وهتلاقى نفسك شغلا بتصطاد الزبالة بطراطيف صوابعك
وهتشتغل عميانى
مش هتبقى شايف حاجة
اصبر معايا

طبعا انت هتلاقى زبالة زى ما قولت لك
هتجيب فوطة او قماشة وتبلها مية عشان تعرف تمسك الزبالة بيها
http://i1357.photobucket.com/albums/...psbfef7435.jpg

وبعدين تدخل ايدك بالقماشة زى ما انا هعمل فى الصور
لحد اخر ما ايدك تجيب
http://i1357.photobucket.com/albums/...ps41f0c516.jpg

وهوب تروح قافش الزبالة وساحبها لبرة وراميها برة العربية
هتعتبر دراعك بالظبط زى الحفارات (الكراكات) اللى بيحفروا بيها الترع والمصارف
دخل دراعك للاخر
اقفش الزبالة
طلعا برة العربية وارميها
وعلى قد ما تقدر حاول تطلع كل الزبالة من المكان دة
لأن اللى هيفضل هتضطر توقعة فى العلبة اليمين بتاعة القايم
وتنزل تصطادة من تحت
طب احنا بنعمل كدة لية
لان كدة كدة فية شوية زبالة وتراب وطين مش هتطول تمسكهم
فهتجيب اى حاجة طويلة مرنة (انا جبت مساحة عربية قديمة)
وتقعد تنكش بيها التراب والعفش والزبالة اللى انت مش طايل تجيبها
واللى انت بتنكشة دة هينزل فى القايم اليمن بتاع العربية
ودى اجبارى مفيهاش اختيارات
هينزل من الحتة دى
http://i1357.photobucket.com/albums/...ps5e8ad071.jpg

فاحنا عايزين نقلل اللى هينزل عشان هنقعد نصطاد فية بطراطيف صوابعنا
هتفضل تنكش على قد ما تقدر الطين المتجمد والزبالة
وبعد كدة هتروح تجيب ازازة مية
وتميلها بالاتجاة الشمال
يعنى تمسك الازازة بالمقلوب وتبقى فتحة الازاة لتحت باتجاة الجزء اللى احنا عمالين ننضف فية
وتفتح الغطا بهدوء للاخر خالص وتشيلة
وسيب عوامل الطبيعة تقوم بدورها
المية هتاخد كل الزبالة وهتنزل بيها من الفتحة اللى انا شاورتلك عليها
تفضل شغال بالمية كذا مرة لحد ما تشوف بعينك ان المكان دة بقة نضيف زى الفل
بس خليك حريص انك تفتح غط الازازة جوة العربية
عشان المية متطرتش عشان متلاقيش المية نزلت فى الدواسة بتاعة العربية اللى جنب السواق

بعد كدة هتنزل تصطاد الزبالة اللى نزلت تحت فى اخر القايم بتاع العربية
http://i1357.photobucket.com/albums/...ps55122a11.jpg

هترفع العربية على الكوريك
وتفك العجلة
http://i1357.photobucket.com/albums/...psb04fa620.jpg

وبعدين تفك المسامير اللى ماسكة الفبر الداخلى (او الكارتيرة الفبر) على حسب التسمية
بس تفك من الناحية الشمال بس
مش هنحتاج نفكها كلها
http://i1357.photobucket.com/albums/...psc68c7cf0.jpg

http://i1357.photobucket.com/albums/...ps5bb8d6e6.jpg

هتلاقى طبة بلاستيك
طلعها عشان هنطلع الزبالة من هنا
http://i1357.photobucket.com/albums/...psa2028eb8.jpg

هتدخل صوابعك من هنا وتصطاد الزبالة اللى نزلت من فوق
طيب لو افترضنا ان انت معرفتش تطلع بصوابعك حاجة من هنا
ليها حل تانى
فاكر صفيحة المنشار اللى احنا قطمناها حتتين
اوعى تكون رميتها
هتجيبها وهتتنى بالذرادية (البنسة) اول 1 سم منها
بحيث تبقى عاملة زى حرف L
وهتبدأ تسحب بيها الزبالة من جوة

طيب احنا بنعمل كدة لية
لانك لو مطلعتش الزبالة دى من مكانها هتربيلك الخفيف
ايوة هتربيلك الخفيف
لان المكان دة هوة اللى مية المطر والغسيل بتتصرف منة من تحت
ففية شق صغير المية بتتصرف منة تحت
لكنة ما يعديش الزبالة
فلو انت سبت الزبالة فى مكانها ومشيت بالعربية الهوا بيندفع من الشق الصغير دة باتجاة عكسى لنزول المية
ويفضل يقلب وينكش فى الزبالة والتراب الموجودين فى المكان دة
وكل ما سرعة العربية تذيد كل ما الخرفشة تذيد وصوتها يعلى وهرشة الدماغ تذيد
اسالنى انا
دانا ضيعت نص يوم كامل وفكيت الجنب دة كلة بالرفرف عشان امنع الخرفشة دى
والاهم اعرف هيا جاية منين اصلا
مجاش فى دماغى خالص بعد ما نضفت الحتة اللى فوق
ان شوية الزبالة اللى نزلوا تحت هما اللى هيربولى الخفيف
وهيفضلوا يخربطوا ويخرفشوا فى العلبة بتاعة القايم اليمين
ويا سلام بقة لو حظك وحش
وشوية زبالة رجعوا لورا فى العلبة بتاعة القايم اليمين واستخبوا ورا الكنترول بتاع العربية
يبقى لازم تفك الكنترول من مكانة عشان تتطلع اللى وراة
اصل الحتة دى كلها منفدة على بعضها
عشان كدة اهتم قوى بتنضيف الحتة دى

وبعد ما تخلص تنضيف اديها مية من فوق خالص اكتر من مرة (زى ما شرحتلك قبل كدة) عشان تاخد كل الزبالة اللى موجودة وتنزل

وبعد ما تخلص قفل كل حاجة تانى زى ما كانت
وبعد كدة هنحط الفلتر فى مكانة
والحتة دى انا صورتها فيديو عشان اوضح للناس ان العملية بتاعة استخدام الفلتر هتكون سهلة وبسيطة وسريعة
دة الفيديو

http://www.youtube.com/watch?v=fTSqSJI8Z1s

كدة يبقى احنا خلصنا خالص
بس محتاجيين تقييم اللى اتعمل فى العربية
يعنى عاوزين نعرف اية السلبيات واية الايجابيات فى الفكرة اللى اتعملت
عشان يبقى شغل مهنى ومحترف

السلبيات :
السلبيات كلها بتتلخص فى حاجة واحدة بس وهيا انك بتخسر 30% من قوة اندفاع الهوا من الفتحات بتاعة التكييف على السرعة اللى شغال
وعلى فكرة دة امر طبيعى
اى منظومة هوا محطوط فيها فلتر .... الفلتر دة على حسب خامتة وتخانتة بيقاوم الهوا اللى بيمشى فى المنظومة
وعشان ابسط الفكرة خالص
هات المكنسة الكهربائية بتاعة البيت هتلاقى فيها الكيس الورق اللى بيتعبى فية التراب وبعد كدة هتلاقى فلترين او تلاتة
شيل الفلاتر دى كلها وامسك المكنسة وجرب ....
هتتفاجا بقوة الشفط الجبارة فى المكنسة وان تقريبا ممكن الموكيت او السجاد يلزق فيها من تحت من قوة الشفط
بس طبعا هتلاقى تراب طالع من الناحية التانية

يبقى السلبيات باختصار ووضوح هى الكالتالى :
هتخسر 30 % من قوة اندفاع الهوا من الفتحات
فلما تكون مشغل التكييف على 4 بالفلتر هيبقى كانك مشغلة على 3 بدون الفلتر
ولما تكون مشغل التكييف على 3 بالفلتر هيبقى كانك مشغلة على 2 بدون فلتر
ولما تكون مشغل التكييف على 2بالفلتر هيبقى كانك مشغلة على 1 بدون فلتر
ولما تشغلة على 1 تقريبا يعنى مش هتلاحظ الهوا اللى طالع

نيجى للايجابيات :
اولا هتضمن ان ريش التلاجة عمرها ما هيدخلها تراب ويسدها فدة هيديك 4 نتائج ايجابية
1- ضمان عمل التكييف طول السنة بكفاءتة الاصلية (تكييف تكييف يعنى)
2 - منع الورائح العفنة اللى كانت بتطلع مع بداية تشغيل التكييف
3 - راحة للكباس لانة هيوصل الكابينة لدرجة الحرارة المطلوبة بسرعة فهيفصل تلقائى وخصوصا لو عندك ترموستات
4 - مش هتحتاج تفك علبة التلاجة بالمشقة بتاعتها

كدة تمام
خلصنا كل حاجة
بس استنى
اوعى تنفذ اى حاجة قبل ما ننضف ريش التلاجة عشان تحس بكفاءة التكييف الحقيقية

بس زمن السحلة بتاع تنضيف التلاجة انتهى
بقى فية دلوقتى طريقة جديدة انا ابتكرتها لتنضيف التلاجة بدون ما نتسحل ونفك العلبة واللية الطويلة دى وان شاء الله هرفعها قبل
30 - 8 بس محتاج منك تشغل مخك معايا شوية وتقولى على الطريقة المحتملة واية اقتراحاتك

ازاى تنضف التلاجة ( تقريبا يعنى ) من غير ايديك ما تتوسخ
وانت لابس هدوم الخروج
عايزك تمخمخ كدة وتراجع كل الصور اللى فىالموضوع دة وتقولى
ازاى ننضف ريش التلاجة بدون ما نفك العلبة
بحيلة ماكرة وبسيطة وفى وقت قياسى وبشياكة

يلا يا معلم
مخمخ

فكر

اجتهد

اعصر دماغك

مستنى اقتراحات الرجالة
وعلى فكرة
الموضوع دة بتاع التضيف اسهل من التانى بكتير

http://i1357.photobucket.com/albums/...ps361eb2e4.jpg