مصر موتورز مجتمع السيارات - بيجو 504.... سيارة تحترم نفسها فاحترمها الناس

بعد 15 سنة مع البيجو 504 اقدر اقول ان العربية دى ماتعملش زيها ولا هيتعمل لان مفيش عربية تفضل فوق ال 30 سنة لسه بتجرى ومتقولش لأه
عربيتى مشيت بها والردياتير مخروم ومرة تانية من غير فرامل ولا دبرياج ومرة تالتة وطلمبة المياه بايظة ومرات ومرات ومرات بقول لكم 15 سنة (10 مع والدى الله يرحمه و5 معايا)
ال 504 هى الوحيدة اللى لما تتشد صح ترجع كانها خارجة من المصنع زييرو انا شديتها 3 مرات فى ال 15 سنة دول وكانت بنفش الفرش والمتور بتاع بلادها اكتر من 30 سنة والحاجة زى ماهى بس للاسف لانى مش فاضى العربية تعبت عالاخر وكانت المفروض تتظبط اليومين دول لكن للاسف برضه بعتها واشتريت عربية تانية ولولا ان كنت عايز فلوسها عشان اكمل عليها والله ماكنت بعتها كنت هاسيبها ولما ظروفى المادية تتحسن كنت هاظبطها اعلى تظبييط
ال 504 يعنى القوة والثبات والاتزان انا قريت فى التعليقات ناس بتقول انها خفيفة وناس بتقول انها مش ثابتة وفيها عيوب تصميمية ياجماعة الكلام ده لو حقيقى ماكنتش فضلت شغالة لغاية النهاردة وانا دلوقتى حاسس بقيمتها بعد ماركبت لانسر 99

وشكرا لكم واسف للاطالة